ނޫސްވެރިންނަށާއި އެއްވެ އުޅުމުގެ މިނިވަންކަމަށް ފުލުހުން ހުރަސްއަޅަމުން ގެންދާ މައްސަލަ ޓްރާންސްޕޭރެންސީ މޯލްޑިވްސް އިން ހަރުކަށި އިބާރާތުން ކުށްވެރިކޮށްފިއެވެ.

ރޭ އިދިކޮޅު ކޯލިޝަނުން ބޭއްވި މުޒާހަރާއެއްގައި ފުލުހުން ވަނީ ބާރުގެ ބޭނުން ބޭނުންކޮށް އިދިކޮޅުގެ މެމްބަރުންނަށާއި މުޒާހަރާ ކަވަރު ކުރަމުން ދިޔަ ނޫސްވެރިންނަށް ހުރަސް އަޅައި، ޕެޕާ ސްފްރޭ ޖަހާފައެވެ.

މިކަމާއި ގުޅިގެން މިއަދު ޓްރާންސްޕޭރެންސީ މޯލްޑިވްސް އިން ކުރި ޓްވީޓެއްގައި ބުނެފައިވަނީ އިދިކޮޅު ކޯލިޝަންގެ ރޭގެ މުޒާހަރާގައި ފުލުހުން ބޭނުންކޮށްފައިވާ ހަތިޔާރާއި ބާރަކީ އިންސާނީ ހައްގުތަކާއި، މި ފަދަ ކަންކަން ކޮންމެހެން ބޭނުންކުރެވޭ އުސޫލުތަކާއި، ބޭނުންކުރާ ނިސްބަތާއި، ގާނޫނީ ގޮތުން ހުއްދަވާ މިންވަރާއި މެދު އޮތް ކަންބޮޑުވުން ވަރުގަދަ ކުރުވާ ކަމެއް ކަމަށެވެ.

އެހެންކަމުން ޓްރާންސްޕޭރެންސީ އިން ވަނީ ހިއުމަން ރައިޓްސް ކޮމިޝަނާއި، ނޭޝަނަލް އިންޓެގްރިޓީ ކޮމިޝަނާއި، ޕްރޮސެކިއުޓަރ ޖެނަރަލްސް އޮފީހަށް އެބަޔެއްގެ މައްޗަށް މަޖްބޫރުވާ ޒިންމާތައް އުފުލައި، ހިޔާލު ފާޅުކުރުމާއި އެއްވެ އުޅުމުގެ މިނިވަންކަމުގެ ހައްގު ބޭނުންކޮށްފައިވާ ފަރާތްތަކުގެ މައްޗަށް ފުލުހުން ނަހަމަ ނިސްބަތަކަށް ބޭނުންކޮށްފައިވާ ބާރު ތަހްގީގު ކުރުމަށް ގޮވާލާފައެވެ.

މިއާއިއެކު މި ހައްގުތަކަށް އަރައިގަތުމުންވެސް ފުލުހުންނަށް އަދަބު ނުލިބި ދެމިއޮންނަ އޮތުމާއި ފުލުހުންގެ އިދާރާއާއި މުޒައްޒަފުން މިހާރުން މިހާރަށް ތަހްގީގު ކުރުމަށް ޓްރާންޕޭރެންސީއިން ވަނީ މި މުއައްސަސާތަކަށް ގޮވާލާފައެވެ.

މީގެ އިތުރުން ޓްރާންޕޭރެންސީއިން ވަނީ އިންސާނީ ހައްގުތަކާއި ބެހޭ ބައިނަލްއަޤްވާމީ ގާނޫނުތަކާއި އެއްގޮތަށް ރާއްޖޭގެ ގާނޫނު އަސާސީ ގެނައުމަށާއި، ސުލްހަވެރިކަމާއިއެކު އެއްވެ އުޅުން ނާޖާއިޒު ގޮތުގައި ހަނިކުރާ މާއްދާތައް ބާތިލް ކުރުމަށް ރާއްޖޭގެ ސަރުކާރާއި ރައްޔިތުންގެ މަޖިލިސް ގުޅިގެން މަސައްކަތްކުރުމަށް ގޮވާލާފައެވެ.