ރައްޔިތުންގެ މަޖިލީހުގެ މެޖޯރިޓީ ލީޑަރު، އެމްޑީޕީގެ ޕާލަމެންޓްރީ ގުރޫޕުގެ ލީޑަރު މުޙައްމަދު އަސްލަމް ގޮތް ދޫކުރައްވައިގެން ނޫނީ މަޖިލީހުގައި އެޅުވިފައިވާ މަރުތަޅު ފިލުވާ މަޖިލީހުގެ މަސައްކަތްތައް ކުރިއަށް ގެންދެވޭނެ ގޮތެއް ފެނިވަޑައި ނުގަންނަވާކަމަށް މައިނޯރިޓީ ލީޑަރު އަދި ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ސަލީމު ވިދާޅުވެއްޖެ އެވެ. 

ރައްޔިތުންގެ މަޖިލީހުގެ ޖަލްސާއެއް މިއަދަށް އެޖެންޑާކޮށްފައި ނެތް ނަމަވެސް، އިދިކޮޅު (ޕީޕީއެމް-ޕީއެންސީ) މެމްބަރުން މިއަދު ވަނީ މަޖިލީހަށް ވަޑައިގެންފަ އެވެ. އަދި އެބޭފުޅުން ވަނީ މަޖިލީސް ހުއްޓިފައި އޮތް އޮތުމާއި ގުޅޭގޮތުން އޮތް ކަންބޮޑުވުންތައް މީޑިއާއަށް ހިއްސާކޮށްފަ އެވެ. 

އެގޮތުން ޕީޕީއެމްގެ ޕީޖީ ލީޑަރު އަހުމަދު ސަލީމު ވިދާޅުވީ މަޖިލީހުގައި މަރިތަޅު އެޅުވުނީ މަޖިލީހުގެ ރައީސާއި ނައިބު ރައީސްގެ މައްސަލަ އެއްފަހަރާ ހުށައެޅުމުން، އެ ދެބޭފުޅުން ވެސް މަޖިލީހުގެ ރިޔާސަތު ބެލެހެއްޓުމަށް އުޒުރުވެރިވި ހިސާބުން ކަމަށެވެ. 

މަޖިލީހުގެ މަސައްކަތްތައް ކުރިއަށް ގެންދިއުމަށް ކޮންމެވެސް އެއްބޭފުޅެއްގެ މައްސަލަ އަނބުރާ ގެންދިއުމަށް މަޖިލީހުގެ ރައީސް މުޙައްމަދު ނަޝީދު ވަނީ ހުށައަޅުއްވާފަ އެވެ. އަދި އެގޮތަށް އެކަން ކުރުމަށް އެމްޑީޕީ ޕާލަމެންޓްރީ ގުރޫޕަށް އެއްވެސް ހުރަހެއް ނޯންނާނެކަމަށް އެމަނިކުފާނު ވިދާޅުވެފައި ވެއެވެ. 

އެހެން ނަމަވެސް އަންގާރަ ދުވަހު އެމްޑިޕީ ޕާލަމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އެމްޑީޕީގެ ޕީޖީ ލީޑަރު އަސްލަމް ވިދާޅުވީ "މަރުތަޅު" ފިލުވަން ނަޝީދު ހުށައެޅުއްވި ޚިޔާލު ބަލައިގަނެ އެމްޑީޕީގެ ޕާލަމެންޓްރީ ގުރޫޕުގެ ނިންމުން ބަދަލު ނުކުރައްވާނެ ކަމަށެވެ. 

އޭގެ އިތުރުން އޭނާ ވިދާޅުވީ ނަޝީދަށް ޖެހިވަޑައިގަންނަވާނީ މަޖިލީސް ހިންގަން ކަމަށެވެ. އެހެން ނޫން ނަމަ އިސްތިއުފާދެއްވަން ކަމަށެވެ. 

މަޖިލީހުގެ މައިނޯރިޓީން ވަނީ އެމްޑީޕީގެ ތެރޭގައި އުފެދިފައިވާ މި ޚިޔާލުތަފާތުވުންތަކާއި ގުޅިގެން ކަންބޮޑުވުން ފާޅުކުރައްވާފަ އެވެ. 

އެކަމަށް އަލިއަޅުވާލާ ޕީޕީއެމްގެ ޕީޖީ ލީޑަރު ސަލީމު ވިދާޅުވީ މަޖިލީހުގައި އެޅުވިފައިވާ މަރުތަޅު ފިލުވާލެވޭނެ ހަމައެކަނި ގޮތަކީ މަޖިލީހުގެ މެޖޯރިޓީ ލީޑަރު (އަސްލަމް) ގޮތް ދޫކުރައްވާ މީގެކުރިން އަމަލުކުރަމުން ގެންދިޔަ އުސޫލާއި އެއްގޮތަށް ކަންކަން ކުރެއްވުމަށް ދޫދިނުން ކަމަށެވެ. 

މައިނޯރިޓީ ލީޑަރު ސަލީމު މީޑިއާއަށް މައުލޫމާތު ދެއްވަނީ

ސަލީމު އިތުރަށް ވިދާޅުވީ އެމްޑީޕީ ޕީޖީން މަޖިލީހުގައި މަރިތަޅު އެޅުވީ ފޯޅަވަހި މައްސަލައާއި ގުޅިގެން ބަންޑާރަނައިބު މަޖިލީހަށް ހާޒިރުކޮށް، އެމަނިކުފާނުގެ އިތުބާރު ނެތްކަމުގެ މައްސަލަ ކުރިއަށް ގެންދާން ފެށުމުން އެކަމަށް ހުރަސްއެޅުމަށް ކަމަށެވެ. 

ނައިބު ރައީސްގެ އިތުބާރު ނެތްކަމުގެ މައްސަލަ ލާފައި އޮއްވާ، ރައީސްގެ މައްސަލަ ހުށައެޅި ވަގުތަށް ބަލާލުމުން ވެސް އެކަން ވަރަށް ސާފުވެގެންދާނެ ކަމަށް ސަލީމު ވިދާޅުވި އެވެ.