ހުޅުމާލޭގައި ސަރުކާރުން އަލަށް އިމާރާތްކުރި ސްކޫލުގެ ތިމް ކުލައަކަށް ރީނދޫކުލަ ހަމަޖައްސައި މިއަދު އެ ސްކޫލުގައި ކިޔަވައިދޭން ފަށައިފިއެވެ.

ހުޅުމާލޭ ދެވަނަ ފިޔަވަހީގައި އިމާރާތްކުރި މި ސްކޫލުގެ ކިޔެވުން މި ދިރާސި އައު އަހަރާއެކު މިއަދު ފެށީ، ސްކޫލުގެ އިމާރާތުގެ މަސައްކަތްވެސް އެއްކޮށް ނުނިންމައިކަމުން ޢާންމުންގެ މީސްމީޑީއާގައި އަންނަނީ ކަންބޮޑުވުން ފާޅުކުރަމުންނެވެ.

ސަލާހުއްދީން ސްކޫލުގެ މަސައްކަތް ނުނިމި އެ ސްކޫލުގައި ކިޔަަވައިދޭން މިއަދު ފެށި އިރު އިމާރާތުގެ ބައެއް ސަރަހައްދުތަކުގައި ދަވާދާއި ކުލަ ނުހިކޭކަމަށާއި އަދި އިމާރާތުގެ އެކި ސަރަހައްދުތަކުގައި ބޯ ހިރަފުސް ހުރިކަމުގައި ބުނެ ގިނަ ބަޔަކު އަންނަނީ މީސް މީޑިޔާގައި ސަރުކާރަށް ވަރަށް ބޮޑަށް ފާޑުކިޔަމުންނެވެ.

ޞަލާހުއްދީން ސްކޫލްގެ ތަސްވީރުތަކެއް ޓުވީޓާގައި ހިއްސާ ކުރަމުން އާންމު ފަރާތަކުން ބުނެފައިވަނީ މަސައްކަތް ނުނިމޭކަމަށާއި ހިރަފުހުން ފުރިފައިވާ މާހައުލެއްގައި ކިޔަވައިދިނުމަކީ ރައްކާތެރިކަމެއް ނޫންކަމުގައެވެ. 

ރިޔާސީ އިންތިހާބާއި ދިމާކޮށް ސަރުކާރުން އިމާރާތްކުރި ސީއެޗްއެސްސީ ގެ އައު އިމާރާތުގައިވެސް މިއަދު ކިޔެވުން ފެށި އިރު، އެ ސްކޫލުގެ މަސައްކަތްތައްވެސް އެއްކޮށް ނިމިފައެއް ނުވެއެވެ.

އެގޮތުން މިއަދު ކިޔެވުން ފެށުނު އިރުވެސް އެ އިމާރާތުގެ މަސައްކަތް ކުރާ ފަރާތްތަކުން އިމާރާތުގެ އެކި ތަންތަނުގައި ދަވާދުލަމުންދިޔަ ކަމަށް މައުލޫމާތު ލިބެއެެވެ. 

އަލަށް ހުޅުވައި މިއަދު ކިޔަވައިދޭން ފެށި ޞަލާހުއްދީން ސްކޫލްގެ މުވަޒަފުން ރީނދޫކުލައިގެ ހެދުމުގައި ސްކޫލްއަށް އައުމަށް ވަނީ އަންގާފައި

އިންތިހާބުގެ ދުވަސް މިހާ ކައިރި ވެފައިވަނިކޮށް ސަރުކާރުން ހުޅުވި އައު ސްކޫލުގެ މަސައްކަތް ނުނިންމާ ސަރުކާރު ހިންގާ ޕާޓީގެ ކުލައާއި ގުޅުވައިގެން ސްކޫލުގެ ކުލަ ހަމަޖެއްސުމުން ތައުލީމީ ދާއިރާއަށްވެސް ސިޔާސީ ކުލަވަރު ވައްދަން ސަރުކާރުން މަސައްކަތް ކުރާކަމުގެ ތުހުމަތު ގިނަ ބަޔަކު އަންނަނީ ކުރަމުންނެވެ. 

ދިރާސީ އައު އަހަރުގެ ކިޔެވުން މިއަދު ފެށިފައިވާއިރު، ކިޔެވުމަށް ތައްޔާރުވުމުގެ ގޮތުން ކުރަންޖެހޭ ގިނަ މަސައްކަތްތަކެއް ފުރިހަމަ ކުރެވިފައިވާކަމަށް އެޑިއުކޭޝަން މިނިސްޓްރީން ބުނެފައިވާއިރު، އޭގެތެރެއިން  ދަރިވަރުންނަށް ބޭނުންވާ ޓެކްސް ފޮތްތައް ސްކޫލުތަކަށް ފޮނުވުމުގެ މަސައްކަތްވެސް މިހާރު ނިމިފައިވާކަމަށާއި، ސްކޫލުތަކަށް ބޭނުންވާ މުދައްރިސުންވެސް މިހާރު ހަމަވެފައިވާ ކަމަށް އެ މިނިސްޓްރީން ބުނެއެވެ.

އެގޮތުން ސަރުކާރު ސްކޫލުތަކުގައި ދިވެހި 6516 މުދައްރިސުންނާއި، 1843 ބިދޭސީ މުވައްޒަފުން މަސައްކަތް ކުރާނެ ކަމަށް މިނިސްޓްރީން ވިދާޅުވެއެވެ.