ހުޅުމާލޭ މާސްޓަރ ޕްލޭނާއި ހިލާފަށް ހުޅުމާލޭ ފަޅުން ބޮޑުބައެއް ހިއްކަން ރައީސް އިބްރާހިމް މުހައްމަދު ޞާލިހްގެ ސަރުކާރުން މަސައްކަތްކުރަމުންދާތީ އެކަން ހުއްޓުވުމަށް ގޮވާލައި ޕެޓިޝަނެއްގައި ސޮއިކުރުމަށް އާންމު އަމިއްލަ ޖަމިއްޔާއަކުން ނިންމައިފިއެވެ.

މި ހަރަކާތުގައި އިސްކޮށް އުޅުއްވާ ފަރާތަކުން ކުރެއްވި ޓުވީޓެއްގައި ޕެޓިޝަން އެއްހީރަސްކޮށް ބުނެފައިވަނީ، މިރޭ ޕްރޮގްރެސިވް ކޯލިޝަނުން ބޭއްވުމަށް ހަމަޖެހިފައިވާ ޖަލްސާގައި އެ ޖަމިއްޔާގެ ފަރާތުން މޭޒެއް ބެހެއްޓުމަށް ހަމަޖެހިފައިވާ ކަމަށާއި، ޖަލްސާއަށް ވަޑައިގަންނަވާ ވީހާވެސް ގިނަ ފަރާތްތަކުން އެ ޕެޓިޝަނުގައި ސޮއިކުރުމަށެވެ.

އެ ޕެޓިޝަނުގައި ގޮވާލައިފައިވަނީ ސަރުކާރުގެ ފަހުރުވެރި ގެދޮރުވެރިޔާ ސްކީމް ގެ ދަށުން ހުޅުމާލެއިން ގޯތި ދިނުމަށްކަމަށް ބުނެ ހުޅުމާލެ ފަޅުން ބޮޑުބައެއް ހިއްކަން ނިންމުމަކީ ހުޅުމާލޭގައި ދިރިއުޅެ ފަރާތްތަކުން ނުހަނު ކަންބޮޑުވާ ކަމެއްކަމުގައެވެ. 

https://x.com/midh_am/status/1693222883559137717?s=46&t=Tj-_47fWMsad04xOFjp11A

 އެގޮތުން ހުޅުމާލެ ފަޅު ހިއްކުމުގެ ކުރިން އިގްތިސާދީ ގޮތުންނާއި ތިމާވެށީގެ ގޮތުން ކޮށްފާނެ އެއްވެސް އަސަރެއް ދެނެގަތުމަށް ސަރުކާރުން އެއްވެސް ދިރާސާއެއް ކޮށްފައި ނުވާތީ، ހުޅުމާލޭގެ މާސްޓަރ ޕްލޭންގައި ދުނިޔޭގެ ފެންވަރުގެ ޒަމާނީ ޔޮޓްމެރީނާ އަކާއި އަދި ކްރޫޒްލައިނާތައް ބަނދަރުކޮށް ސަރވިސް ކުރެވޭނެ ބަނދަރެއް ހެދުމަށް ނިންމާފައިވާ ސަރަހައްދެއް ހިއްކުމަކީ ރާއްޖޭގެ މާލިއްޔަތަށް ވަންނާނެ ގިނަ ފައިސާތަކެއް ވަންނާނެ ދޮރެއް ބަންދުވުން ކަމުގައި އެ ޕެޓިޝަނުގައި ބުނެފައިވެއެވެ. 

ވުމާއެކު ހުޅުމާލޭ ފަޅުން ސަރުކާރުން ހިއްކުމަށް ނިންމާފައިވާ ބިން ހިއްކުން މިހާރުން މިހާރަށް ހިއްކުން ހުއްޓާލުމަށް އެ ޕެޓިޝަނުގައި ވަނީ ސަރުކާރަށް ގޮވާލައިފައެވެ. 

މާލޭގައި ދަތިހާލުގައި އުޅޭ ފަރާތްތަކަށް ބޯހިޔާވަހިކަން ހޯދައިދިނުމަށްކަމަށްބުނެ ސަރުކާރުން ތައާރަފުކުރި " ފަހުރުވެރި ބިންވެރިޔާ" ސްކީމުގައި ދަށުން 9001 ގޯތި ދިނުމަށް ހުޅުމާލޭ ފަޅުން ބޮޑުބައެއް ހިއްކުމަށް ވަނީ ނިންމާފައެވެ.