ސިޔާސީ ހަރަކާތްތައް ހިންގުމަށް ދަނީ ހަމަހަމަކޮށް ފުރުސަތު ދެމުން ކަމަށް މާލެ ސިޓީ ކައުންސިލުން ބުނެފިއެވެ.

އެކައުންސިލުން މިހެން ބުނެފައިވަނީ މިއަދު އެކައުންސިލުން ކޮށްފައިވާ ޓްވީޓެއްގައެވެ.

އެކައުންސިލުން ބުނެފައިވަނީ ސިޔާސީ ޙަރަކާތްތައް ހިންގުމަށް ހުއްދައަށްއެދިފައިވާ ސިޓީތަކަށް ޖަވާބު ދިނުމަށް ވަގުތުނަގާފައިވަނީ މިއަހަރުގެ ރިޔާސީ އިންތިޚާބުގައި ވާދަކުރައްވާ ހުރިހާ ކެންޑިޑޭޓުންވެސް ސިޔާސީ ޙަރަކާތްތައް ހިންގުމަށް މާލެސިޓީ ކައުންސިލްގެ ބެލުމުގެދަށުގައިވާ ސަރަޙައްދުތައް ބޭނުންވެގެން އެދިފައިވާތީ ކަމަށާއި، މަޝްވަރާކުރެވި، އެއްވެސް ބަޔަކަށް ދަތިނުވާނެހެން އެކަން ހަމަޖެއްސުމަށްޓަކައި ކަމަށެވެ.

Advertisement

އަދި ހަމަހަމަ ފުރުޞަތުތަކެއް ހުރިހާ ފަރާތްތަކަށް ދިނުމަށްޓަކައި މަޝްވަރާކުރެވި ކައުންސިލުން މިހާރުވެސް ދަނީ މިފަދަ ހުއްދަތައް ދެމުންކަމަށެވެ.

ސިޓީ ކައުންސިލުން މިފަދައިން ޓްވީޓެއް ކުރައްވައިފައިމިވަނީ ރައީސް އިބްރާހިމް މުޙައްމަދު ޞާލިޙުގެ އިންތިޚާބީ ތަރުޖަމާނު އަދި ދިފާޢީ ވަޒީރު މާރިޔާ އަޙްމަދު ދީދީ، ރައީސް ޞާލިޙުގެ ކެމްޕޭނު ޖަލްސާއެއް ބާއްވަން މާލޭ ސިޓީ ކައުންސިލުން ހުއްދަ ނުދިން ކަމަށް މިއަދު ވިދާޅުވެފައިވަނިކޮށެވެ.