ވެރިކަން ލިބިވަޑައިގެންފި ނަމަ ޚާއްސަ އިސްކަމެއް ދީގެން ވެރިކަމުގެ ފުރަތަމަ އަހަރު އައްޑޫ ސިޓީ ޝަންގްރިއްލާ ރިސޯޓު އޮޕަރޭޝަނަށް ގެނެސްދެއްވާނެކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

އައްޑޫ ސިޓީ ޝަންގްރިއްލާ ރިސޯޓަކީ ރާއްޖޭގެ އެންމެ މަތީ ފަންތީގެ ރިސޯޓުތަކުގެ ތެރޭގއި ހިމެނޭ 284 އެނދުގެ ރިސޯޓެކެވެ. އެ ރިސޯޓު ބަންދުކޮށްފައިވަނީ ކޯވިޑާއި ގުޅިގެން 2020 ވަނަ އަހަރުގެ މެދުތެރޭގަ އެވެ.

އެފަހުން އެ ރިސޯޓު ހުޅުވުމަށް މަސައްކަތްކުރަމުންދާ ކަމަށް ސަރުކާރުން ބުނި ނަމަވެސް އެކަން ލަސްވަމުންދާތީ އައްޑޫ ސިޓީގެ ރައްޔިތުން ގެންދަނީ ބޮޑެތި ކަންބޮޑުވުންތަކެއް ފާޅުކުރަމުން ނެވެ. 

Advertisement

ޝަންގްރިއްލާ ނުހުޅުވި އޮތް މައްސަލައާއި ގުޅޭގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އައްޑޫ ސިޓީއަށް ކުރެއްވި ދަތުރުފުޅުގެއްގައި ވިދާޅުވީ، އެ ރިސޯޓު ހުޅުވެން އޮތީ ސަރުކާރުގެ ހިއްސާ ދޫކޮށްލައިގެން ކަމަށެވެ. އައްޑޫ ރައްޔިތުން އެގޮތަށް އެކަން ކުރަން ބޭނުންވާނަމަ، ހިއްސާ ދޫކޮށްލައްވާނެ ކަމަށް ރައީސް ޞާލިހު ވިދާޅުވި އެވެ. 

އެހެން ނަމަވެސް އެކަން އެގޮތަށް ކޮށްފިކަމަށް ވާނަމަ ދިވެހި ސަރުކާރުން 70 މިލިއަން ޑޮލަރު ދައްކަން ޖެހޭނެއެވެ. 

އައްޑޫ ސިޓީގައި ފަތުރުވެރިކަމުގެ ސިނާއަތު ފުޅާކޮށް، އެ ސިނާއަތުގެ ތެރެއިން އާ ވަޒީފާތައް އުފައްދަވާނެކަމަށް ވައުދުވެވަޑައިގެންފައިވާ ޑރ މުއިއްޒު މިއަދު ހުޅުދޫ ޖަލްސާގައި ވާހަކަދައްކަވަމުން ވަނީ ޝަންގްރިއްލާ ރިސޯޓު މައްސަލައިގައި އެމަނިކުފާނު އަމަލުކުރައްވާނެ ގޮތް ހިއްސާކުރައްވާފަ އެވެ. 

އެގޮތުން ޑރ މުއިއްޒު ވިދާޅުވީ ވެރިކަމަށް ހުވާ ކުރައްވާތާ ފުރަތަމަ އަހަރުގެ ތެރޭގައި ޝަންގްރިއްލާ އޮޕަރޭޝަނަށް ގެނެސްދެއްވާނެ ކަމަށެވެ. އަދި އެއީ ޚާއްސަ އިސްކަމެއް ދީގެން ކުރައްވާނެ މަސައްކަތެއްކަން ޑރ މުއިއްޒުގެ ވާހަކައިގައި ފާހަގަކުރެއްވި އެވެ. 

އެއާއެކު އެމަނިކުފާނު ވިދާޅުވީ ބޭނުންވަނީ ފުރުސަތު ކަމަށެވެ. އަދި ރައްޔިތުންގެ އިތުބާރު ކަމަށެވެ. މި ރިޔާސީ އިންތިޚާބުގައި އައްޑޫ ރައްޔިތުންގެ ތާއީދާއި، އަގުލަބިއްޔަތު ދެއްވައި، ޕްރޮގްރެސިވް ކޮންގްރެސް ކޯލިޝަނަށް ވެރިކަން ލިބިއްޖެ ނަމަ އައްޑޫ ސިޓީއަށް ދިމާވެފައިވާ މައްސަލަތައް ޙައްލުކޮށްދީ ސިޓީގެ ތަރައްގީއަށް ކުރަންހުރި ކަންކަން ފުރިހަމަކޮށްދެއްވާނެ ކަމުގެ ޔަގީންކަން ޑރ މުއިއްޒު ވަނީ ދެއްވާފަ އެވެ.