މި އަހަރުގެ ރިޔާސީ އިންތިހާބު ކާމިޔާބު ކުރެވި ވެރިކަމަށް އާދެވިއްޖެ ނަމަ ވެރިކަމުގެ ފުރަތަމަ އަހަރުގައި ސަންގްރިއްލާ ރިޒޯޓް ހުޅުވައިދޭނެ ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

މުއިއްޒު މިފަދައިން ވިދާޅުވީ އަންނަ މަހު 9 ގައި ބާއްވާ ރިޔާސީ އިންތިހާބުގެ ކެމްޕެއިނަށް އިއްޔެ އައްޑުއަށް ފެއްޓެވި ދެ ދުވަހުގެ ދަތުރުގައި މިއަދު ހުޅުދޫއަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައެވެ. 

2009 ވަނަ ސަންގްރިއްލާ ރިޒޯޓްވަނީ ކޮވިޑް ބަލިމަޑުކަމުގައި 2020 ގައި ބަންދުކޮށްފައެވެ. އެކަމުގެ ސަބަބުން އައްޑޫގެ ގިނަ އަދަދެއްގެ ބައެއްގެ ވަޒީފާ ވަނީ ގެއްލިފައެވެ.

އެހެންނަމަވެސް ވެރިކަމުގެ ފުރަތަމަ އަހަރުގައި ސަންގްރިއްލާ ހުޅުވައިދޭނެކަމަށް ވިދާޅުވެ މުއިއްޒުވަނީ، އައްޑޫގެ ޓޫރިޒަމް ފުޅާ ކުރުމުގެ ސިޔާސަތެއްގެ ދަށުން، އިތުރު މަންޒިލްތަކަށް އުދުހޭ ގޮތަށް އައްޑޫ ބައިނަލްއަގުވާމީ އެއާޕޯޓު ތަރައްގީކޮށްދެއްވާނެ ކަމުގައިވެސް ވިދާޅުވެފައެވެ. 

މީގެ އިތުރުން މުއިއްޒު ވިދާޅުވީ، އައްޑުއަށް އެންމެ ބޮޑަށް ބޭނުންޖެހިފައި އޮތް ގެދޮރުވެރިކަމާ އެކު ޓޫރިޒަމް ފުޅާކޮށް، ވަޒީފާ އިތުރުކޮށް، އިގްތިސާދީ ވަރުގަދަ ހަރަކާތްތައް ހިންގާނެކަމަށާއި އެ މަނިކުފާނުގެ ސަރުކާރެއްގައި އެކަން ހަގީގަތަކަށް ހައްްދަވައިދެއްވާނެ ކަަމަށެވެ. 

ރިޔާސީ އިންތިހާބުގެ ކެމްޕެއިންގައި މިއަދު މުއިއްޒުއާއި ކެމްޕެއިން ޓީމުން ހުޅުމީދުއަށް ވަޑައިގަތުމުން އެރަށުގެ ގިނަ އަދަދެއްގެ މީހުން ވަނީ މަރުހަބާ ވިދާޅުވެފައެވެ.