ސަރުކާރާއި އިދިކޮޅު ކެންޑިޑޭޓް ދެއްކުމުން ހޯމް މިނިސްޓަރ އިމްރާން އަބްދުاللهގެ ބުއްދި ފިލައިފި ކަމަށް ރައްޔިތުން މަޖިލީހުގެ މަޑުއްވަރީ ދާއިރާގެ މެންބަރު އަހްމަދު ޠާރިގު (ޓޮމް) ވިދާޅުވެއްޖެއެވެ.

ތާރިގު މިހެން ވިދާޅުވެފައި ވަނީ އިއްޔެ ރޭ ބ.ތުޅާދޫގައި ބޭއްވި އެމްޑީޕީގެ ކެންޕެއިން ޖަލާސާގައި އިމްރާން ދެއްކެވި ވާހަކަފުޅަށް އިޝާރާތް ކުރައްވާ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ދެއްކެވި ވާހަކައަށް ތާއީދު ކުރައްވައި ކުރެއްވި ޓްވީޓެއްގައެވެ. 

އެގޮތުން ތުޅާދޫ ކެންޕެއިން ޖަލްސާގައި ފޯރިއެއް ނެތުމުން އެކަން ފާހަގަކުރައްވައި އިމްރާން ދެއްކެވި ވާހަކަތަކާއި ގުޅިގެން ވައްޑެ ވަނީ މުޅި ބ.އަތޮޅުންނާ މާލެއިން މީހުން ގެންގޮސްގެން ތުޅާދޫގައި އަދި ޖަލްސާއެއް ބޭއްވިޔަކަސް ތުޅާދޫގެ ފޯރިއެއް ނުފެންނާނެ ކަމަށެވެ.

Advertisement

ވައްޑެގެ ވާހަކަތަކަށް ތާއީދު ކުރައްވައި ޠާރިގު ވިދާޅުވީ އިމްރާން ކުރިން އުޅުނީ ޕީޕީއެމް/ޕީއެންސީ ކެންޑިޑޭޓް ނުފެނިގެން ކަމަށާއި ނަމަވެސް ކެންޑިޑޭޓް ފެނުނުއިރު އޭނާގެ ބުއްދި ފިލައިފި ކަމަށެވެ.

ތާރިގު މިހެން ވިދާޅުވެފައި ވާއިރު ތުޅާދޫގެ ޖަލްސާގައި ވާހަކަދައްކަވަމުންވެސް ޢިމްރާން ވަނީ ޕީޕީއެމް/ޕީއެންސީގެ ކެންޑިޑޭޓަށް ގިނަ ބަހުގެ ހަމަލާތަކެއް އަމާޒު ކުރައްވާފައެވެ.