ކުރިއަށް ސެޕްޓެމްބަރު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ފިޔަވާ އެހެން ކެންޑިޑޭޓަކަށް ދެވޭ ވޯޓަކީ ރާއްޖޭގެ މުސްތަގުބަލު ގެއްލުވައިލުމަށް ދެވޭ ވޯޓެއް ކަމުގައިވެގެންދާނެ ކަމުގައި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެވެ.
އަބްދުއްރަހީމު މިފަދައިން ވިދާޅުވީ، ރިޔާސީ އިންތިހާބުގެ ކެމްޕެއިންގައި ށ ކަނޑިތީމަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
މި ވާހަކަ ފުޅުގައި ރާއްޖެ މިއަދު މި އޮތް ހާލަތު އިތުރަށް ދާއްކާވަރަށްވުރެ ތަފްސީލުކޮށް އެންމެނަށް މިހާރު އެނގޭކަމަށް އަބްދުއްރަހީމް ވަނީ ވިދާޅުވެފައެވެ.
ޑރ މުހައްމަދު މުއިއްޒުގެ ކެމްޕެއިންގައި މުޅިންވެސް ދައްކަވަނީ އެހެން ބޭފުޅެއްގެ ސިޔާސަތުގެ ވާހަކަތައް ކަމަށާއި އެހެން ބޭފުޅެއް މިނިވަންކުރާ ވާހަކަކަމަށް ވިދާޅުވެ އެހެން ކެނޑިޑޭޓުން ދައްކަވާ ވާހަކަތަކަށް ރައްދުދެއްވައި އަބްދުރަހީމް ވިދާޅުވީ، 2018 ވަނަ އަހަރު އެމްޑީޕީން ވެރިކަމަށް އައި އިރު ރައީސް ޔާމިނު ތަންފީޒުކުރެއްވި ސިޔާސަތު އެ ބޭފުޅުންވެސް ތަންފީޒުކުރެއްވި ނަމަ މިއަދު ރައްޔިތުން އެތިބި ހާލަތަށް ރައްޔިތުން ނުދިޔައީސް ކަމުގައެވެ.
މީގެ އިތުރުން އަބްދުއްރަހީމް ވިދާޅުވީ ކޮންމެ ރަށަކަށް ވެސް ވަޑައިގަތުމުން އެ ރަށެއްގެ ރައްޔިތުން ނިކަމެތިވެފައި ތިިބި ކަމަށާއި ޒުވާނުން މަގުމަތިވެފައިވާކަމަށާއި، ޖީބުތައް ހުސްވެފައިވާ ކަމުގެ ކަންބޮޑުވުންތައް އިވެމުންދާ ކަމުގައެވެ.
އެކަމަކު މި ބޭފުޅުން އެބަ ވިދާޅުވޭ ރާއްޖޭގައި ފަގީރުކަން ނެތި ހިނގައްޖެއޭ، އަޅުގަނޑަކަށް ނޭނގެ މި ދެ ވާހަކަ ގުޅުވާނެ ގޮތެއް
އަބްދުއްރަހީމް
އަބްދުއްރަހީމު އިތުރަށް ވިދާޅުވީ، ޑރ މުއިއްޒުގެ ވެރިކަމެއްގައި ރައީސް ޔާމިނު ސިޔާސަތުތައް ތަންފީޒުކުރާނީ، ރައީސް ޔާމިނު ގައުމާ ދޭތެރޭ ގެންގުޅުއްވި ސިޔާސަތަކީ މުހިއްމު ސިޔާސަތަކަށްވާތީ ކަމުގައެވެ.
ރިޔާސީ އިންތިހާބުގެ ކެމްޕެއިންގައި ޑރ މުހައްމަދު މުއިއްޒާއި ކެމްޕެއިން ޓީމުން ށ ކަނޑިތީމަށް ވަޑައިގަތުމުން އެރަށުގެ ސަޕޯޓަރުންވަނީ އެ މަނިކުފާނާއި ޓީމަށް ހޫނު މަރުހަބާއެއް ކިޔައިފައެވެ.
Advertisement
This content is created and paid for by advertisers and does not involve Voice Journalists
