ވެރިކަމެއް ނިމުމަކަށް ދާއިރު އެ ވެރިކަމަކުން ފެންނާނެ އެންމެހައި ކަންކަމެއް މި ވެރިކަމުން ފެންނަމުން އެބަ ދާކަމުގައި ޕީޕީއެމްގެ ނައިބް ރައީސް، އަދި ނައިފަރު ދާއިރާގެ މަޖިލީސް މެންބަރު އަހްމަދު ޝިޔާމް ވިދާޅުވެއްޖެއެވެ. 

ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ކެމްޕެއިންގައި ރޭ ށ ފުނަދޫގައި ބެއްވި ޖަލްސާގައި ފާއިތުވި 48 ގަޑި އިރުތެރޭގައި އެމްޑީޕީން 200 މެންބަރު ވަކިވި ވަކިވުމަށް އިޝާރާތް ކުރައްވައި ޝިޔާމް ވިދާޅުވީ، އެ ރޭޓުން ދާނަމަ ކުރިއަށް އޮތް ހަމަސްދުވަސް ތެރޭގައި އެމްޑީޕީ ދޫކުރައްވާ ހުރިހާ ދިވެހި ރައްޔިތުން ޕީޕީއެމާއި ގުޅިވަޑައިގަންނާވާނެ ކަމަށް ފެންނަމުންދާ ކަމަށެވެ.

ހަމަ އެޔާއެކު ޝިޔާމް ވިދާޅުވީ، ޒުވާނުން ވަޒީފާތަކުން ވަކިކުރުމާއި އެގުރިމެންޓުތަކުގައި ސޮއިކުރުމަކީ ވެރިކަމެއް ނިމެންދާއިރު ފެންނާނެ އަލާމާތްތައް ކަމަށާއި ކެމްޕޭނަށް އަރާ ހުރިހާ ރަށަކުން މީހުން ހައްޔަރު ކުރުމާއި ފުލުހުން ބޭނުންކޮށްގެން ތަކެއްޗަށް ގެއްލުންދިނުންވެސް ހިމެނެނީ މިކަމުގެ ތެރޭގައި ކަމަށެވެ. 

މީގެ އިތުރުންވެސް ޝިޔާމް ވިދާޅުވީ، މިހާރު ފެންނަމުންދާ މަންޒަރުން ކުރިއަށް އޮތް އިންތިހާބުތަގައި ރައީސް ޞާލިޙް ބޮޑުތަނުން ބަލިވަމުން ދާ މަންޒަރު ފެންނަމަށެވެ. 

ށ. އަތޮޅަކީ ރައީސް ސޯލަހު އެވިދާޅުވާ ތާއީދު ސަރުކާރަށް އޮތް ހިސާބެއް ނޫން ކަމަށާއި އެ އަތޮޅުގެ ރައްޔިތުން އެދެނީ އެ ރައްޔިތުން އެދޭ ތަރައްގީ ގެނެސްދެއްވާނެ ވެރިއެއްކަން އެ އަތޮޅުގެ ސާދަ ރަށަށް ދަތުރު ކުރެވުނު އިރު ފެނުނުނު މަންޒަރުން ހާމަވާ ކަމުގައި ޝިޔާމް ވިދާޅުވިއެވެ.