އިސްރަށްވެހިންނަކީ މި ޤައުމު މިހާ ހިސާބަށް ގެނެސްދިނުމުގައި އެންމެ މުހިއްމު ދައުރެއް އަދާކުރެެއްވި ފަރާތްތައް ކަމަށާއި ވެރިކަން ލިބިއްޖެ ނަމަ ރާއްޖޭގެ އެކި ކަންކޮޅުތަކުގައި އިސް ރަށްވެހިންގެ މަރުޒަކުތައް ގާއުމުކޮށްދެއްވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިނަށް ށ. ފުނަދޫގައި ރޭ ބޭއްވި ޖަލްސާގައި ވާހަކަދައްކަވަމުން މުއިއްޒު ވިދާޅުވީ އަބަދުވެސް ސަރުކާރުތަކުން ހަމައެކަނި ޒުވާނުންނަށް ހާއްސަ ސަމާލުކަމެއް ދެއްވާކަމަށް ވިދާޅުވެ ބައެއް ބޭބޭފުޅުންގެ ކަންބޮޑުވުން ލިބެމުން އަންނަ ކަމަށެވެ. 

ވުމާއެކު ޒުވާނުންވެސް ބާކީ ނުވާނެހެން މުއިއްޒުގެ ވެރިކަމެއްގައި މުޅި ރާއްޖޭގެ އެކި ކަންކޮޅުތަކުގައި އިސް ރަށްވެހިންގެ މަރުކަޒުތައް ގާއުމުކޮށްދެއްވާނެ ކަމަށް ވައުދުވެވަޑައިގެންނެވިއެވެ.

މުއިއްޒު ވިދާޅުވި ގޮތުގައި އެތަންތަން ތަރައްގީ ކުރާނީ މުނިފޫހި ފިލުވޭނެ ވަސީލަތްތައް ވެސް ހިމެނޭހެން އެކި ޚިދުމަތްތައްވެސް ލިބޭނެހެން ކަމުގައިއެވެ. އަދި މި މަރުކަޒުތައް ގާއިމް ކުރާނީ ހަމައެކަނި މާލޭގައި ނޫންކަމަށާއި ރާއްޖޭގެ އެކި ސަރަހައްދުތަކަށް ބަހާލައިގެން ކަމުގައި މުއިއްޒުވަނީ ވިދާޅުވެފައެވެ.

މުއިއްޒު ދެއްވި ޔަގީން ކަމަކީ އޭނާގެ ވެރިކަމެއްގައި ޒުވާނުންގެ އިތުރުން އިސް ރަށްވެހިންނަށް އިސްކަން ދެއްވާނެކަމެވެ.

ރިޔާސީ އިންތިހާބުގައި ވާދަކުރާ ޕީޕީއެމް/ޕީއެންސީގެ ރިޔާސީ ކެންޑިޑޭޓް، ޑރ މުހައްމަދު މުއިއްޒުގެ ކެމްޕެއިންގައި ށ އަތޮޅަށް ކުރަމުން ގެންދާ ދަތުރުތަކުގައި އެ އަތޮޅުން ބޮޑު ތަރުހީބެއް އެ ފަރާތްތަކަށް ލިބެމުން އަންނަކަން ފާހަގަކޮށްލެވެއެވެ.