މިއަހަރުގެ ރިޔާސީ އިންތިހާބު ކާމިޔާބުވެވަޑައިގެން ވެރިކަމަށް އާދެވިއްޖެނަމަ ނ ކެނދިކުޅުދޫ ލަފާފުރުމުގެ ދަތިކަން ހައްލުކުރުމުގެ ގޮތުން އެ ރަށުގެ ދެ އަވަށުގައި ދެ ބަނދަރު ގާއިމްކޮށްދޭނެކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިންގައި ނ ކެނދިކުޅުދޫއަށް ވަޑައިގެން އެރަށުގެ ސަޕޯޓަރުންނާއި ވާހަކަދައްކަވަމުން މުއިއްޒު ވިދާޅުވީ، ކެނދިކުޅުދޫފަދަ ބޮޑު ރަށެއްގައި ލަފާ ފުރުމުގެ ކަންކަމަށް އެންމެ ބަނދަރެއް އޮތުމަކީ ގިނަ ދަތިތަކަކާއި ކުރިމަތި ވާނެކަމަކަމަށެވެ.
ދެ އަވަށަށް ދެ ބަނދަރު އޮވެއްޖިޔާ އެންމެ ފަސޭހަވާނީ، އެހެންވީމަ އެގޮތަށް އަޅުގަނޑުމެން މަޝްރޫއު ރާވާނެ ވާހަކަ ދަންނަވަން
ޑރ މުހައްމަދު މުއިއްޒު
މީގެ އިތުރުން މުއިއްޒު ވިދާޅުވީ، ކެނދިކުޅުދޫފަދަ ބޮޑު ރަށެއްގައި އެހެން ރަށްތަކާއި ޚިލާފަށް ދަތުރުފަތުރު ކުރުމުގެ ކަންކަން ދަތިވާނެ ކަމަށާއި, އެކަމުގެ ހައްލެއްގެ ގޮތުން ކެނދިކުޅުދޫގެ މަގުތައް ހެދުމުގައި ބޮޑެތި މަގުތަކަށް ހާއްސަ އިސްކަމެއް ދީގެން އެ ރަށުގެ މަގުތައް ތާރު އަޅައިގެން ތަރައްގީ ކުރައްވާނެ ކަމުގައެވެ.
އެގޮތުން މި މަޝްރޫއު ހިންގަނީ އަސާސީ ހިދުމަތެއްގެ ގޮތުގައި ހާއްސަ އިސްކަމެއް ދީގެން ކަމުގައި ޑރ މުއިއްޒު ވަނީ ވިދާޅުވެފައެވެ.
އަދި މީގެ އިތުރުން ބަހުގެ ހިދުމަތް ރަނގަޅުކުރުމަށްޓަކައި ގިނަ ވަގުތު ގިނަ ދަތުރުތައް ކުރެވެނެހެން ސްކޫލު ކުދިންނަށް ދެމުންގެންދާ ބަހުގެ ހިދުމަތްވެސް ފުޅާ ކުރައްވާނެ ކަމުގައި މުއިއްޒުވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
