ދައުލަތް ހިންގުމުގެ ތިން ބާރުގެ ތެރެއިން އެއްބާރު ކަމުގައިވާ ރައްޔިތުންގެ މަޖިލިސް އޮތީ ހުއްޓުމަށަ އައިސްފައި ކަމަށާ، އަދި އަނެއް ބާރު ކަމުގައިވާ ޝަރުޢީ ނިޒާމް އޮތީ ރައީސުލްޖުމްހޫރިއްޔާގެ މުށުތެރޭގައި ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ރަނިންގމޭޓް ހުސެއިން މުހައްމަދު ލަތީފް (ސެމްބެ) ވިދާޅުވެއްޖެއެވެ.
ރިޔާސީ ކެމްޕެއިނަށް ތ.ވިލުފުއްޓަށް ވަޑައިގެން އެ ރަށު ރައްޔިތުންނާ ވާހަކަ ދައްކަވަމުން ސެމްބެ ވިދާޅުވީ އިދިކޮޅު ލީޑަރު އަދި ކުރީގެ ރައީސް އަބްދުالله ޔާމީން އަބްދުލް ގައްޔޫމަކީ މިދިވެހި ގައުމަށް ދިރުން ގެނެސް ދެއްވި ވެރިއެއް ކަމަށާ އެހެން ނަމަވެސް އެމަނިކުފާނު މިވަގުތު އޮންނެވީ ބައެއްގެ އަނިޔާވެރި ކަމުގެ ދަށުގައި ކަމަށެވެ.
ރާއްޖެއަށް މިއިން ދުވަހަކުވެސް ނުގެންނަ ވަރުގެ ބިޔަ ބޮޑެތި މަޝްރޫއުތަކެއް ގެނެސްދެއްވާ، ރާއްޖޭގެ ރައްޔިތުންނަށް ފުދުންތެރިކަން ގެނެސްދެއްވާ، ރައްޔިތުންގެ ޖީބަށް މިހާރު ތިވާ އުނދަގޫތައް އެއިރު ނުވޭ، ފަސޭހަކަމާއި އެކީގައި އަނބިދަރިން ގޮވައިގެން އުޅެވޭނެ މަގު ފަހިކޮށްދެއްވި ލީޑަރު މިއަދު އޮތީ ޖަލުގައި، ބައެއްގެ އަނިޔާވެރި ކަމާއި އެކީގައި."
ހުސައިން މުހައްމަދު ލަތީފް (ސެމްބެ)
އެހެންކަމުން އިދިކޮޅުުން ކުރަމުންދާ މަސައްކަތަކީ އެމަނިކުފާނު މިނިވަން ކުރުމުގެ މަސައްކަތް ކަމަށާ، އެމަނިކުފާނު ޖަލުން ސަލާމަތް ކުރެވެން އޮތީ، ސެޕްޓްމެބަރު ނުވައެއްގައި ނަގާ ވޯޓުން ކަމަށް ސެމްބެ ވިދާޅުވި އެވެ. އަދި އެ ވޯޓަކީ ބޮޑު ބަޑި އަކަށްވުރެވެސް ވަރުގަދަ ހަތިޔާރެއް ކަމަށް ސެމްބެ ވަނީ ސިފަކުރައްވާފައެވެ.
"އެ ވޯޓަކީ ރައްޔިތުންނަށް ލިބިދީފައިވާ ބޮޑު ބަޑިއަކަށްވުރެވެސް މާ ވަރުގަދަ ހަތިޔާރެއް، ބޮޑެތި ޓޭންކަރުތަކާއި ބޮޑެތި ޖެޓްތަކަށްވުރެވެސް ރައްޔިތަކަށް ލިބިފައިވާ އެންމެ ބާރުގަދަ ހަތިޔާއަކީ އެ ދުވަހު ލިބޭ ވޯޓު ކަރުދާހުގައި ޖަހާ ފާހަގަ. މީގެން އެ ނިންމާލެވެނީ ރައްޔިތުންގެ މުސްތަގުބަލު. ރައްޔިތުންގެ ދަރިންގެ މުސްތަގުބަލާމެދު ނިންމާ ނިންމުން. ގައުމުގެ ހާލަތާއި މެދު ނިންމާ ނިންމުން."
ހުސައިން މުހައްމަދު ލަތީފް (ސެމްބެ)
ސެމްބެ ތ.އަތޮޅުގެ ރަށްތަކަށް ކުރައްވަމުން ގެންދަވާ ދަތުރުގެ ތެރެއިން - ފޮޓޯ: ޕީޕިއެމް
ސެމްބެ އިތުރަށް ވިދާޅުވީ ސަރުކާރުން ދައުލަތް ހިންގުމަށްޓަކައި ވަލިއްޔުލް އަމުރަކަށް ހަވާލުކޮށްފައި ހުރި ބޭފުޅާއަށް މި ގައުމުގައި ހުރި ބޮޑެތި މައްސަލަތައް ހައްލު ކުރަން ނޭނގޭ ކަަމަށާ އެހެންކަމުން އެމަނިކުފާނަށް ދެވަނަ ދައުރެއް ދޭންޖެހޭ ސަބަބެއް ނުފެންނަ ކަމަށެވެ.
"ދައުލަތުގެ ހިމެނެނީ ތިން ބާރު، އެއީ ދައުލަތް ހިންގުމުގެ ބާރު (އެއީ ސަރުކާރު)، ގާނޫނު ހަދާ މަޖިލީސް (އެއީ ރައްޔިތުންގެ މަންދޫބުން)، ޝަރުއީ ނިޒާމް. މި ތިން ބާރުގެ ތެރެއިން މި އޮތީ އެއް ބާރު ހުއްޓުމަކަށް އައިސްއޭ ދެންނެވޭނީ، އަނެއް ބާރު އެ އޮތީ މުށުތެރެއަށް ލާފައި ވިއްދާފައި، މިހެން އޮތް ނިޒާމަކަށް ރައްޔިތުންނަށް ކޮން އިތުބާރެއްތޯ އޮތީ، މާދަމާ އަނެއްކާ ވެރިކަމަށް ވަޑައިގެން ކޮން ކަންތައްތަކެއް ރައްޔިތުންނާއި ކުރިމަތިލާން ޖެހޭނީ."
ހުސެއިން މުހައްމަދު ލަތީފު (ސެމްބެ)
ސެމްބެ ވިދާޅުވިީ މިހާރު ފެންނަމުން ދަނީ ރައްޔިތުން ނިކަމެތި ވަމުންދާ ތަން ކަމަށެވެ. އެހެންކަމުން ހިޔާލު ތަފާތުވުންތަކެއް ހުރިކަމުގައިވިޔަސް، އެ ހިޔާލު ތަފާތުވުންތައް އެއްފަރާތް ކޮށްލެއްވުމަށްފަހު ކުރިއަށް އޮތް އިންތިހާބުގައި ކާމިޔާބަށް ވާސިލްވުމަށް މަސައްކަތްކޮށްދިނުމަށް އޭނާ ވަނީ އެދިވަޑައިގަންނަވާފައެވެ.
"އޭރުން ކުރިއަށް އޮތް ފަސް އަހަރަކީ الله ގެ ތަނަވަސް ރަހުމަތުން ތިޔާގި އުފާވެރި ދުވަސްތަކެއް ކަމުގައި ލައްވާނެ." ސެމްބެ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
