ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒަށް ރ އަތޮޅު އަލިފުށިން ހޫނު މަރުހަބާއެއް ކިޔައިފި އެވެ. 

ހުވަދުއަތޮޅަށް ކުރައްވާ ރިޔާސީ ކެމްޕޭނު ދަތުރުފުޅު ނިންމަވާލެއްވުމަށްފަހު ޑރ މުއިއްޒު ރ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި ރ އަލިފުއްޓަށް ވަޑައިގަތީ މިއަދު ހެނދުނުގެ ވަގުތެއްގަ އެވެ. އޭރު އަލިފުއްޓަށް ދިޔައީ ބޯކޮށް ވާރޭ ވެހެމުންނެވެ. 

އެހެން ނަމަވެސް ޑރ މުއިއްޒުގެ އިސްތިގުބާލުގައި ގިނަ އަދަދެއްގެ ސަޕޯޓަރުން މާފަތިތައް ހިފައިގެން ތިބި މަންޒަރު ފެނިގެން ދިޔައެވެ. ޑރ މުއިއްޒު އެ ރަށަށް ވަޑައިގަތުމާއެކު ސަޕޯޓަރުން ވަނީ ވަރަށް ފޯރީގައި އެމަނިކުފާނަށް މަރުހަބާ ދަންނަވާފަ އެވެ. 

ޑރ މުއިއްޒަށް އަލިފުށިން ހޫނު މަރުހަބާއެއް ކިޔައިފި 

ވާރޭ ވެހެމުން ދިޔަ އެ ވަގުތުގައި ވެސް ސަޕޯޓަރުން ގެންދިޔައީ ޑރ މުއިއްޒަށް ހިތްވަރުދީ، އެމަނިކުފާނަށް މަރުހަބާ ދެންނެވުމަށް ހެދި މާފަތުތައް ކަރުގައި އަޅުވާ، އުފާ ފާޅުކޮށް ފޯރި ނަގަމުންނެވެ. 

ޑރ މުއިއްޒުވަނީ އަލިފުއްޓަށް ވަޑައިގެން އެމަނިކުފާނުގެ އިސްތިގުބާލުގައި ތިބި އެންމެނާއި ސަލާންކޮށްފަ އެވެ. 

އަލިފުއްޓަކީ ރ އަތޮޅަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގެ އެންމެ ފުރަތަމަ މަންޒިލެވެ. އެއާއެކު އަލިފުށިން ފެނިގެން ދިޔައީ ވަރަށް ފޯރިގަދަ މަންޒަރެކެވެ. 

ޑރ މުއިއްޒަށް އަލިފުށިން ހޫނު މަރުހަބާއެއް ކިޔައިފި 

އެމަނިކުފާނު ރ އަތޮޅަށް ކުރައްވާ ދަތުރުފުޅުގައި އެ އަތޮޅުގެ 6 ރަށަކަށް ދިއުމަށް އޮތީ ހަމަޖެހިފައެވެ. އެއީ އަލިފުށީގެ އިތުރުން، މަޑުއްވަރި، މީދޫ، އުނގޫފާރު، ދުވާފަރާއި އިނގުރައިދޫއެވެ.

ރ އަތޮޅުގެ ބޮޑު ޖަލްސާ މިރޭ ދުވާފަރުގައި ބޭއްވުމަށް ވަނީ ހަމަޖެހިފަ އެވެ. މި ޖަލްސާގައި ރ އަތޮޅަށް ޑރ މުއިއްޒުގެ ވެރިކަމެއްގައި ކޮށްދެއްވާނެ މުހިންމު ކަންތައްތަކާއި، އެމަނިކުފާނުގެ މެނިފެސްޓޯގައި ހިމެނޭ ތަރައްގީގެ މުހިންމު މަސައްކަތްތައް އިއުލާނު ކުރައްވާނެ އެވެ. 

ރިޔާސީ އިންތިޚާބުގެ ކެމްޕޭނު ފޯރިގަދަވަމުން އަންނައިރު، ޑރ މުއިއްޒު ވަނީ މި އިންތިޚާބު އެއްބުރުން އެމަނިކުފާނަށް ކާމިޔާބުކޮށްދިނުމަށްޓަކައި ކެމްޕޭނު ހަރަކާތްތައް ވަރުގަދަކޮށް ކުރިއަށް ގެންގޮސްދެއްވުމަށް އެދިވަޑައިގެންފަ އެވެ.