ގެދޮރުވެރިޔާ ސްކީމުގެ ވަގުތީ ލިސްޓާއި ގުޅިގެން ހުށަހެޅި ޝަކުވާތަށް ބަލައި، ފައިނަލް ލިސްޓު އަންނަ ހަފާތްގައި ނެރެވޭނެ ކަމަށް ޕްލޭނިންގ މިނިސްޓްރީން ބުނެފިއެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފުލެޓުތަކަށް އެދުމަށް މިދިޔަ އަހަރުގެ ޖޫން 26 ގައި ހުޅުވާލި ފުރުސަތުގައި 20،697 މީހުން ފްލެޓަށް އެދި ފޯމު ހުށަހަޅައިފައިވެއެވެ. އެތަނުން ފްލެޓް ލިބޭ މީހުންގެ ވަގުތީ ލިސްޓު ޕްލޭނިންގ މިނިސްޓްރީން އާއްމުކުރީ މިދިޔަ އޯގަސްޓް މަހުގެ 8 ވަނަ ދުވަހުއެވެ. އަދި ލިސްޓަށް ޝަކުވާ ހުށަހެޅުމުގެ ފުރުޞަތު އޯގަސްޓް 22ގެ ނިޔަލަށް ހުޅުވާލިއެވެ.

ޝަކުވާތައް ބަލައި ގަނެ، ޕްލޭނިންގ ސްޓޭޓަސްއަށް އައި ބަދަލު މިހާރު ޕޯރޓަލްއިން ފެންނާނެ ކަމަށް ޕްލޭނިންގ މިނިސްޓްރީން ވަނީ ބުނެފައެވެ.

އަދި ފުލެޓަށް ކުރިމަތިލި މީހުންގެ ދިރިއުޅުމުގެ ހާލަތު ބެލުމުގެ މަސައްކަތް މިހާރު ޕްލޭނިންގ މިނިސްޓްރީން ފަށާފައިވާއިރު، ފުލެޓް ލިބުނު މީހުންގެ ދާއިމީ ލިސްޓް އަންނަ ހަފްތާގެ ތެރޭގައި ނެރުމަށް މަސައްކަތް ކުރަމުން އަންނަކަމަށް ޕްލޭނިންގ މިނިސްޓްރީން ބުނެއެވެ.

ފުލެޓް ލިބޭ މީހުންގެ ވަގުތީ ލިސްޓުގައި ވާގޮތުން 15000ށް ވުރެ ގިނަ މީހުން ފްލެޓަށް ޝަރުތު ހަމަވެއެވެ. އެ ޝަރުތު ހަމަވި އެންމެނަށް ފުލެޓް ދޭން ސަރުކާރުން ނިންމާފައިވާއިރު، އެ މީހުންނަށް ފްލެޓު ދިނުމަށްޓަކައ އިތުރު 3،500 ޔުނިޓު އިމާރާތް ކުރަން ސަރުކާރުން ނިންމާފައިވާ ކަމަށް، ހައުސިން މިނިސްޓްރީގެ ސްޓޭޓު މިނިސްޓަރު އަދި ފްލެޓު ކޮމިޓީގެ ޗެއާ އަކްރަމް ކަމާލުއްދީން ވަނީ ވިދާޅުވެފަ އެވެ.