ކެނެޑާގެ ރައްޔިތެއް ކަމަށްވާ ސިކު އެކްޓިވިސްޓެއްގެ މަރާ އިންޑިއާ ސަރުކާރާ ގުޅުން ހުރިކަމަށް ބުނެ، ކެނެޑާގައި ހުރި އިންޑިއާގެ ޑިޕްލޮމެޓް އެގައުމުން ފޮނުވާލައިފިއެވެ. 

މިދިޔަ ޖޫން މަހު 18 ވަނަ ދުވަހު ބްރިޓިޝް ކޮލަމްބިއާގައި، މަރާލި ސިކް ލީޑަރު ހަރްދީޕް ސިންގް ނިއްޖާރު މަރާލުމުގައި އިންޑިއާ ސަރުކާރުގެ އެޖެންޓުންގެ ބައިވެރިވުން އޮތް ކަމަށް ތުހުމަތު ކުރެވޭ ކަމަށް ކެނެޑާގެ ގާނޫނު ހަދާ މަޖިލީހުގައި އިއްޔެ ވާހަކަފުޅު ދައްކަވަމުން ބޮޑުވަޒީރު ޖަސްޓިން ޓްރޫޑޯ ވަނީ ވިދާޅުވެފަ އެވެ. ހަރުދީޕް ސިންގަކީ އިންޑިއާގެ ސިކުންގެ ހައްގުތަކާ މެދު ވަކާލާތު ކުރި ކެނެޑާގެ އެކްޓިވިސްޓެކެވެ.

ކެނެޑާގެ ބޮޑުވަޒީރު ވިދާޅުވިގޮތުގައި ސިކު ލީޑަރު މަރާލި މައްސަލައާ ބެހޭ ވޮތުން ޖީ20 ސަމިޓުގެ ތެރެއިން ބައްދަލު ކުރައްވައި އިންޑިއާގެ ބޮޑުވަޒީރު ނަރަންދުރަ މޯދީއަށް ކަންބޮޑުވުން ފާޅުކުރެއްވި ކަމަށެވެ. އަދި ބޭރު ގައުމެއްގެ ސަރުކާރަކުން ކެނެޑާގެ ރައްޔިތަކު ކެނެޑާގެ ބިމުގައި މަރާލުމަކީ ކެނެޑާގެ "ސިޔާދަތަށް އަރައިގަތުން" އެއީ "ބަލައިގަނެވޭނެ ކަމެއް ނޫން" ކަމަށެވެ. އެހެން ކަމުން އިންޑިއާ ސަރުކާރަށް އޭނާ ގޮވައިލެއްވީ މައްސަލައިގެ އެންމެ އަޑިއަށް ދިއުމަށް ކުރަމުންދާ މަސައްކަތަށް ފުރިހަމަ އެއްބާރުލުން ދިނުމަށެވެ.

Advertisement

މި ކަމާއި ގުޅިގެން ކެނެޑާގެ ފޮރިން މިނިސްޓަރު މެލެނީ ޖޯލީ ވިދާޅުވި ސިކު ލީޑަރު މެރުމަކީ އެ ގައުމުގެ މިނިވަންކަމަށް އަރައިގަތުން ކަމުގައި ބެލެވޭ ކަމަށާ، މި މައްސަލައާ ގުޅިގެން ކެނެޑާއިން އެ ގައުމުގައި ހުންނަ އިންޑިއަން އެމްބަސީގެ ޑިޕްލޮމެޓެއް އެ ގައުމުން ފޮނުވައިލައިފައިވާ ކަމަށެވެ. 

އޭގެ ރައްދުގައި އިންޑިއާއިން ވަނީ އިންޑިއާގައި ހުންނަ ކެނެޑާގެ ސީނިއަރ ޑިޕްލޮމެޓެއްް އެގައުމުން ދިޔުމަށް އަންގާފައިވާނެ ކަމަށް ބުނެފައެވެ. އަދި އެކަމަށްޓަކައި އޭނާއަށް 5 ދުވަހުގެ މުއްދަތު ދީފައިވާނެ ކަމަށްވެސް އިންޑިއާއިން ބުނެއެވެ. 

ހަރުދީޕް ސިންގްގެ މައްސަލާގައި އިންޑިއާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައި ވަނީ އިންޑިއާގައި ޚާލިސްތާނުގެ ނަމުގައި ވަކި ގައުމެއް އުފައްދަން މަސައްކަތް ކުރާ ސިކް ޓެރަރިސްޓް ގްރޫޕަށް ކެނެޑާއިން ވާގިވެރިވަމުން އަންނަ ކަމަށެވެ. އަދި ހަރުދީޕް ސިންގުގެ މަރާ އިންޑިއާ އާ ގުޅުވަނީ އެ ތުހުމަތުތަކުން ސަލާމަތްވުމަށް ކަމަށް ވެސް އެ ބަޔާނުގައިވެ އެވެ.