ފިނޭންސް މިނިސްޓްރީން ރައްޔިތުންގެ މަޖިލީހަށް ހުށައަޅާފައިވާ 6.5 ބިލިއަން ރުފިޔާގެ ސަޕްލިމެންޓްރީ ބަޖެޓުގައި މާލިއްޔަތު ގާނޫނުން ލާޒިމުކުރާ ތަފްސީލުތައް ހިމެނުމަށްފަހު އަލުން ހުށައެޅުމަށް ރައްޔިތުންގެ މަޖިލީހުގެ އިދާރާއިން ފިނޭންސް މިނިސްޓްރީއަށް އަންގައިފި އެވެ. 

މަޖިލީހުންގެ އިދާރާއިން ބުނެފައިވަނީ އެ އިދާރާއަށް ފިނޭންސް މިނިސްޓްރީން ފޮނުވި ބަޖެޓުގައި ގާނޫނުގައި ފުރިހަމަކުރަން ޖެހޭ ކަންތައްތަކެއް ފުރިހަމަނުވެ އޮތް ކަމަށެވެ. އަދި އެ ކަންކަން ފުރިހަމަ ކުރުމަށް މަޖިލީހުގެ ރައީސް ސޮއިކުރައްވާ ލިޔުމުން އަންގާފައިވާނެ ކަމަށް އިދާރާއިން ވަނީ ބުނެފައެވެ. 

ފިނޭންސް މިނިސްޓްރީން މަޖިލީހަށް ސަޕްލިމެންޓްރީ ބަޖެޓު ހުށައެޅުން ބުދަ ދުވަހުގެ ޖަލްސާގައި އެޖެންޑާކޮށްފައި އޮތް ނަމަވެސް، މަޖިލީހުގެ ކޯރަމް ހަމަނުވާތީ އެ ޖަލްސާވަނީ ކުރިއަށް ގެންދެވޭ ގޮތް ނުވެފައެވެ. 

އޭގެ އިތުރުން ސަޕްލިމެންޓްރީ ބަޖެޓު ގާނޫނާއި އެއްގޮތަށް ހުށައެޅުމަށް މަޖިލީހުގެ އިދާރާއިން އަންގާފައިވާއިރު، މިއަދު އެ ބަޖެޓު ހުށައެޅުމަށް އެޖެންޑާކޮށްފައެއް ނުވެއެވެ. އެކަމާއި ގުޅިގެން އެމްޑީޕީއަށް ނިސްބަތްވާ ބައެއް މެމްބަރުން ވަނީ މިއަދުގެ ޖަލްސާގައި ނުރުހުން ފާޅުކުރައްވާފަ އެވެ. 

ފިނޭންސް މިނިސްޓްރީން މަޖިލީހަށް ހުށައެޅި 6.5 ބިލިއަން ރުފިޔާގެ ސަޕްލިމެންޓްރީ ބަޖެޓާއި ގުޅޭގޮތުން މަޖިލީހުގެ މައިނޯރިޓީ ލީޑަރު އަލީ އާޒިމް ވަނީ އެއީ ޤާނޫނާއި ޚިލާފަށް ހުށައަޅާފައިވާ ބަޖެޓެއްކަމަށް ވިދާޅުވެފަ އެވެ. އަދި އެ ބަޖެޓު ހުށައަޅާއިރު ފާއިތުވި އަހަރު ދައުލަތަށް ލިބުނު އާމްދަނީއާއި ކުރި ޚަރަދުފަދަ މައުލޫމާތުތައް ހިމަނަން ޖެހޭނެކަން އާޒިމް ފާހަގަކުރެއްވި އެވެ. 

އޭގެ އިތުރުން ދައުލަތުން މިއަހަރުގެ ބަޖެޓު ހުށައަޅަމުން ފިނޭންސް މިނިސްޓަރު ދެއްވި މެދުރާސްތާ ފިސްކަލް ސްޓްރެޓެޖީގެ ބަޔާނުގައި ކަނޑައެޅުއްވި ލަނޑުދަޑިތަކަށް މިފަހަރުގެ ސަޕްލިމެންޓްރީ ބަޖެޓުގެ ސަބަބުން ބަދަލު އަންނާނެތީ ބެޖޓު ޕޮސިޝަން ރިޕޯޓަށް އައި ބަދަލު ބަޔާންކޮށް، އާ ރިޕޯޓެއް ހުށައަޅަންޖެހޭނެ ކަމަށް ފެންނަ ކަމަށް ވެސް އަލީ އާޒިމް ސަޕްލިމެންޓްރީ ބަޖެޓާއި ގުޅިގެން މަޖިލީހުގެ ރައީސް މުހައްމަދު ނަޝީދަށް ފޮނުވި ސިޓީގައި ބަޔާންކޮށްފައި ވެއެވެ. 

ސަޕްލިމެންޓްރީ ބަޖެޓެއް ހުށައެޅުމުގެ މަސައްކަތް ކުރިއަށް ދާއިރު، އަންނަ އަހަރަށް ލަފާކޮށް ދައުލަތުން ހުށައަޅާ ބަޖެޓުވެސް މި މަހުގެ ތެރޭގައި މަޖިލީހަށް ހުށައެޅިގެންދާނެ އެވެ.