އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުއިއްޒު އަދި ނައިބު ރައީސް ހުސެއިން މުހައްމަދު ލަތީފު ހުވާކުރެއްވުމުގެ ރަސްމިއްޔާތަށް 3500 މީހުންނަށް ދައުވަތު އަރުވަން ނިންމާފައިވާކަމަށް ރައްޔިތުންގެ މަޖިލީހުން ހާމަކޮށްފި އެވެ.

ނޮވެމްބަރު މަހުގެ 17 ވަނަ ދުވަހުގައި ޑރ މުއިއްޒު ހުވާކުރައްވާއިރު، އެ ރަސްމިއްޔާތުގައި ވީހާވެސް ގިނަ ބަޔަކަށް ބައިވެރިވެވޭނެ ގޮތަށް އިންތިޒާމުތައް ހަމަޖެއްސުމުގެ މަސައްކަތް ރައްޔިތުންގެ މަޖިލީހުން އަންނަނީ ކުރަމުންނެވެ. 

އިންތިޚާބީ ރައީސް ޑރ މުހައްމަދު މުއިއްޒު ހުވާކުރައްވާ ރަސްމިއްޔާތަށް ދައުވަތުދެއްވާނެ ބޭފުޅުންނާއި ގުޅޭގޮތުން އިންތިޚާބީ ރައީސްގެ އޮފީހާއި މަޖިލީހުގެ އިދާރާއިން މަޝްވަރާތައް ފަށާފައިވާއިރު، މި ބައްދަލުވުމުގައި ހުވާކުރައްވާ ދުވަހުގެ ރަސްމިއްޔާތުގައި ބައިވެރިވެވަޑައިގަންނަވާނެ ގައުމުތަކުގެ ވެރިންނާއި އިސް ފަރާތްތަކާއި ގުޅޭ މަޝްވަރާތައް ވެސް ވަނީ ކުރައްވާފަ އެވެ. 

Advertisement

އެގޮތުން މި ރަސްމިއްޔާތަށް 3500 އެއްހާ ފަރާތްތަށް ދައުވަތު ދެއްވުމަށް ތައްޔާރުވަމުންދާކަމަށް ރައްޔިތުންގެ މަޖިލީހުން ވަނީ ބުނެފައެވެ. 

އިންތިޚާބީ ރައީސް ޑރ މުއިއްޒު ހުވާކުރެއްވުގެ ރަސްމިއްޔާތު ބޭއްވުމަށް އެންމެ ފުރަތަމަ ނިންމާފައިވަނީ ޖުމްހޫރީ މައިދާނުގައެވެ.

އެހެން ނަމަވެސް މޫސުން ގޯސްވެ އެ ތަނުގައި ރަސްމިއްޔާތު ކުރިއަށް ނުގެންދެވޭނެ ފަދަ ހާލަތެއް ދިމާވެއްޖެ ނަމަ ރަސްމިއްޔާތު އެހެން ތަނެއްގައި ބޭއްވުމާއި މެދު ގޮތެއް ނިންމާނެކަމަށް މަޖިލީހުން ވަނީ ބުނެފައެވެ. 

ޖުމްހޫރީ މައިދާނުގައި ހުވާކުރުމުގެ ރަސްމިއްޔާތު ބޭއްވުމަށް ނިންމީ ވީހާ ވެސް ގިނަ ބަޔަކަށް އެ ރަސްމިއްޔާތުގައި ބައިވެރިވުމުގެ ފުރުސަތު ދެއްވުމަށް ކަމަށް އިންތިޚާބީ ރައީސް ޑރ މުހައްމަދު މުއިއްޒު ވަނީ ވިދާޅުވެފަ އެވެ.