ސިނަމާލެ ބްރިޖުގެ ހައިވޭގައި ހަރުކޮށްފައިވާ ސޯލާ ޕެނަލްތައް އެތަނުން ނަގައި އެކަމަށް ޚާއްސަ ރަށަކަށް ބަދަލުކުރަައްވާނެ ކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
ހުޅުމާލޭ ފޭސް-1 ގެ ރައްޔިތުންނާއި ބައްދަލުކުރައްވާ ވާހަކަދައްކަވަމުން ޑރ މުއިއްޒު ވިދާޅުވީ ހުޅުމާލޭގެ ހައިވޭ މިހާރު ފެންނަމުންދަނީ ވަރަށް ހާސްކަން ބޮޑުކޮށް ކަމަށެވެ.
ތިލަމާލެ ބްރިޖާއި ހައިވޭ ތަރައްގީކޮށްފައިވަނީ ހިތްގައިމުކަމާއެކު، ކަނޑުގެ މަންޒަރުތައް އެ ސަރަހައްދުން ފެންނަމުންދާނެ ފަދަ ގޮތަކަށް ކަމަށާއި، އަދި އެ ޕެނަލްތަކުގެ ސަބަބުން އެ ސަރަހައްދުގެ ހިތްގައިމުކަން ގެއްލިފައިވާ ކަމަށް ޑރ މުއިއްޒު ވިދާޅުވި އެވެ.
ޑރ މުއިއްޒު ވިދާޅުވީ އިޔާދަކުރަނިވި ހަކަތައިގެ މަޝްރޫއަކީ މުހިންމު މަޝްރޫއެއް ކަމަށެވެ. އަދި އެމަނިކުފާނުގެ ސަރުކާރުގައި ވެސް އެފަދަ މަޝްރޫއުތައް ހިންގަވާނެ ކަމަށެވެ.
އެހެން ނަަމަވެސް މިހާރު ހައިވޭގައި އެ މަޝްރޫއު ހިންގާފައިވާ ގޮތަށްވުރެ ރަނގަޅަށް އެކަންކަން ކުރެވޭނެ ގޮތް ހުންނާނެ ކަމަށާއި، ހައިވޭގައި ޖަހާފައިވާ ސޯލާ ފެނަލްތައް ނަގައި އެހެން ރަށަކަށް ބަދަލުކުރައްވާނެ ކަމަށް ޑރ މުއިއްޒު ވިދާޅުވި އެވެ.
އެގޮތުން ޕެނަލްތައް އެތަނުން ގެންގެވުމަށްފަހު ރަށުގެ ކުޑަ ބޮޑުމިނަށް ބަލައި، ކަނޑައެޅޭ ރަށްތަކަށް އެ ޕެނަލްތައް ބަދަލުކުރައްވާނެކަމަށް ޑރ މުއިއްޒު ވިދާޅުވި އެވެ. އަދި އެކަން އެގޮތަށް ކުރުމަށް އެ މަޝްރޫއަށް ފަންޑުކުރި ފަރާތާއެކު މަޝްވަރާކުރައްވާނެ ކަމަށް ޑރ މުއިއްޒު ވިދާޅުވި އެވެ.
"ކުޑަ އަދި މެދު ސައިޒުގެ މި ދެންނެވި އެއް ރަށް ނޫނީ ދެރަށަކަށް، އެއްކޮށް އެދެރަށް ނޫނީ އެއްރަށް، އެއްކޮށް ސޯލާ ޕަވާއެއް ހިންގޭގޮތަށް އެތަކެތި ގެންގޮސް އެ ކަމާއި ފަންޑުކުރި ފަރާތާއި ވެސް މަޝްވަރާކޮށްގެން ނަގައިގެން ގެންގޮސް އެއް ރަށް ނުވަތަ ދެރަށް އެއްކޮަށް ސޯލާ ޕަވާއިން ހިންގާގޮތަށް ބަދަލުކުރުމަށް މިތަކެތި މިތަނުން ނަގައިގެން ގެންދަން. "
އިންތިޚާބީ ރައީސް ޑރ މުހައްމަދު މުއިއްޒު
ހުޅުމާލެ ލިންކް ރޯޑުގައި ގާއިމްކުރާ 5 މެގަވޮޓްގެ ސޯލާ ޕީވީ އިންސްޓޯލްމަންޓަކީ ރާއްޖޭގައި އެއް ގްރިޑެއްގައި މިހާރު ކުރިއަށްދާ އެންމެ ބޮޑު ސޯލާ ޕީވީ އިންސްޓޯލްމަންޓެވެ.
މިއީ ތައިލެންޑްގެ އެންސިސް ކޯ ލިމިޓެޑާ ޙަވާލުކޮށްގެން ކުރިއަށްގެންދާ މަޝްރޫޢެކެވެ. މިއީ ދެމެހެއްޓެނިވި ގޮތެއްގައި އިއާދަކުރަނިވި ހަކަތައިގެ ނިޒާމު ކުރިއަރުވަން އަމިއްލަ ފަރާތްތަކުން ކުރިއަށްގެންދާ އިންވެސްޓްމަންޓްތައް ހަލުވިކުރުމަށް ވޯލްޑްބޭންކުން އެހީވުމަށް ހިންގާ އެސްޕަޔަރގެ އެހީގައި ގިންގާ މަޝްރޫއެކެވެ.
އެ މަޝްރޫއު މިހާރު ހިންގާ ގޮތުގެ ސަބަބުން ހައިވޭގެ ރީތިކަމާއި ހިތްގައި މަންޒަރު ގެއްލޭކަން ފާހަގަކޮށް ގިނަ ފާޑުކިޔުންތަކެއް ވެސް ވަނީ މި ސަރުކާރަށް އަމާޒުވެފަ އެވެ. އަދި ހައިވޭގައި ޖަހާފައިވާ ސޯލާ ޕެނަލްތަކުން އުފައްދާ ކަރަންޓަށް ބަލާއިރު މާލެ ސަރަހައްދުގައި ދިރިއުޅޭ ރައްޔިތުންގެ ކަރަންޓިބިލުތަކަށް ކުޑަވެސް ލުޔެއް ނުލިބޭނެ ކަމަށް ސަރުކާރުގެ ކަރަންޓު ކުންފުނި ސްޓެލްކޯއިން ވެސް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
