ސަރުކާރުން އިއުލާނުކުރި ބޯހިޔާވަހިކަމުގެ މަޝްރޫއަށް އެދި އެއްވެސް ރައްޔިތަކު ހުށައެޅި ފޯމެއް ބާތިލެއް ނުކުރާނެ ކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
ހުޅުމާލޭ ރައްޔިތުންނާއި ބައްދަލުކުރައްވާ ވާހަކަދައްކަވަމުން ޑރ މުއިއްޒު ވިދާޅުވީ މި ސަރުކާރުން އިންތިގާލީ މަރުހަލާ ކުރިއަށް ދާއިރުވެސް ބޯހިޔާވަހިކަމުގެ މަޝްރޫއުތަކަށް ހުޅުވާލާ މިފަހުން ވެސް ފޯމުތަކެއް ހުށައަޅާފައިވާ ކަމަށެވެ. އަދި ސަރުކާރު ބަދަލުވުމާއެކު އެ މަޝްރޫއުތަކަށް ވާނެ ގޮތްތަކާއި މެދު ރައްޔިތުންގެ ބޮޑު ކަންބޮޑުވުމެއް އޮތްކަން ފާހަގަކުރެވިފައިވާކަމަށް ޑރ މުއިއްޒު ވިދާޅުވި އެވެ.
އެކަން ފާހަގަކުރައްވާ އެމަނިކުފާނު ވިދާޅުވީ ރައްޔިތަކަށް އުންމީދަށް ލިބޭ އެއްވެސް މަޝްރޫއެއް، ނުވަތަ ބޯހިޔާވަހިކަމަށް އެދި ރައްޔިތަކުން ހުށައަޅާފައިވާ އެއްވެސް ފޯމެއް އެމަނިކުފާނުގެ ސަރުކާރުގައި ބާތިލް ނުކުރައްވާނެ ކަމަށެވެ.
އެގޮތުން މި ސަރުކާރުން އެންމެ ފަހުން އިއުލާނުކުރި މަޝްރޫއަށް ހުށައެޅި ފޯމުތަކާއި، އޭގެ ކުރިން ހުށައެޅި ފޯމުތައް ވެސް ބާތިލު ނުކުރައްވާނެ ކަމަށާއި، އަދި ފޯމު ހުށައެޅި ރައްޔިތުން އަލުން އެ ފޯމުތައް ހުށައެޅުމުގެ ބުރަ ޑރ މުއިއްޒުގެ ސަރުކާރުން ނުޖައްސާނެކަމަށް ޑރ މުއިއްޒު ވިދާޅުވި އެވެ.
"މިސާލަކަށް މި ދައުރު ނިމުމުގެ ކުރީގައި އެބޭފުުން އެއްކޮށް ޕްރޮސެސް ނިންމާ ފައިނަލް ލިސްޓު ނެރެ ރައްޔިތުންނަށް އެކަމުގައި ޔަގީންކަމެއް ދެވޭ ހިސާބަށް ގެންގޮސްފިއްޔާ، އެ ގެންދިޔަ ހިސާބެއްގައި ހިފަހައްޓާނަން. އަޅުގަނޑު ނުވާކަން މި ސަރުކާރުން އައިއްސަ ކުރީގައި ރއީސް ޔާމީން ސަރުކާރުގައި ގެދޮރު ލިބޭނެކަމަށް ލިޔުންދީ ދާއިމީ ގެޒެޓު ކުރެވުނު މީހުންނާއި ދޭތެރޭގައި ކަންކުރިގޮތަށް ކުރާނެ މީހަކަށް"
އިންތިޚާބީ ރައީސް ޑރ މުހައްމަދު މުއިއްޒު
އެމަނިކުފާނު ވިދާޅުވީ އެމަނިކުފާނުގެ ސަރުކާރުން މަސައްކަތް ކުރަމުން ގެންދާނީ ރައްޔިތުންނަށް ވީހާ ވެސް ތަކުލީފު ކުޑަވާނެ ގޮތަށް މަޝްރޫއުތައް ކުރިއަށް ގެންދިއުމަށް ކަމަށެވެ.
މި ސަރުކާރުން އިއުލާނު ކުރި މަޝްރޫއުތައް ކުރިއަށް ގެންދިއުމުގައި ވެސް އެންމެ ގިނަ ރައްޔިތުންނަށް ބައިވެރިވެވޭނެ، ރައްޔިތުންނަށް އެންމެ ފައިދާހުރި ގޮތަކީ ކޮބައިތޯ ބަލައިގެން ކުރިއަށް ގެންދާނެކަމަށް ޑރ މުއިއްޒު ވިދާޅުވި އެވެ.
އޭގެ އިތުރުން އެމަނިކުފާނު ވިދާޅުވީ ބޯހިޔާވަހިކަމުގެ ސިޔާސަތަކީ އެމަނިކުފާނުގެ ވެރިކަމުގައި އެންމެ ބޮޑު އިސްކަމެއް ދެއްވާނެ ސިޔާސަތު ކަމަށެވެ. އަދި އެއްވެސް ރައްޔިތަކު ތަފާތުކުރުމެއް ނެތި ހުރިހާ ރައްޔިތުންނަށް ވެސް އެކަށީގެންވާ ބޯހިޔާވަހިކަމެއް ފޯރުކޯށްދިނުމަކީ އެމަނިކުފާނުގެ ސަރުކާރުގެ އަމާޒުކަމަށް ޑރ މުއިއްޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
