އިންތިޚާބީ ރައީސް ޑރ މުހައްމަދު މުއިއްޒު ވެރިރަމުގެ ޤާނޫނީ ހުވާކުރުމުގެ ރަސްމިއްޔާތުގައި ބައިވެރިވުމުގެ ފުރުސަތު އާންމު ރައްޔިތުންގެ ތެރެއިން 1000 މީހުންނަށް ދިނުމުގެ އިންތިޒާމުތައް ހަމަޖައްސަމުންދާކަމަށް އިންތިޤާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެ އެވެ.
އިންތިޚާބީ ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އިންތިޚާބީ ރައީސް ހުވާކުރުމުގެ ރަސްމިއްޔާތާއި ގުޅޭ މައުލޫމާތުތައް ހިއްސާކުރައްވަމުން ފިރުޒުލް ވިދާޅުވީ އެ ރަސްމިއްޔާތަށް ވާންޖެހޭ ތައްޔާރީތައް ރައްޔިތުންގެ މަޖިލީހުގެ އިދާރާއިން ކުރަމުން ގެންދާ ކަމަށެވެ.
އެ ރަސްމިއްޔާތުގައި ބައިވެރިވެވަޑައިގަތުމަށް ރަސްމީކޮށް 3500 ފަރާތަކަށް ދައުވަތުދިނުމަށް ނިންމާފައިވާ ކަމަށާއި، އަދި އޭގެ އިތުރުން އާންމުންގެ ތެރެއިން 1000 މީހުންނަށް ބައިވެރިވެވޭނެ ގޮތަށް އިންތިޒާމުތައް ހަމަޖައްސަމުން އަންނަކަމަށް މަޖިލީހުން ބުނެފައިވާކަން ފިރުޒުލް ފާހަގަކުރެއްވި އެވެ.
"އަޅުގަނޑުމެން މަސައްކަތްކުރަމުން މިދަނީ އިތުރު 1000 އާންމުންނަށް އާންމުކޮށް ހުޅުވާލައިގެން މި ރަސްމިއްޔާތުގައި ބައިވެރިވެވޭނެ ފުރުސަތު ހުޅުވާލުމަށް"
އިންތިގާލީ ތަރުޖަމާނު ފިރުޒުލް
އިންތިޚާބީ ރައީސް ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ޖުމްހޫރީ މައިދާނުގައެވެ. އެ ތަނުގައި ހުވާކުރުމުގެ ރަސްމިއްޔާތު ބޭއްވުމުގެ އިންތިޒާމުތައް ހަމަޖެއްސުމަށް 22 މިލިއަން ރުފިޔާއަށް ގައުމީ ދިފާއީ ބާރުގެ ވެލްފެއާ ކުންފުނި ސިވެކްއާއި ހަވާލުކޮށްފަ އެވެ.
ޖުމްހޫރީ މައިދާނުގައި ހުވާކުރުމުގެ ރަސްމިއްޔާތު ކުރިއަށް ގެންދިއުމަށް ނިންމީ ވީހާވެސް ގިނަ އާންމު ރައްޔިތުންނަށް ބައިވެރިވުމުގެ ފުރުސަތު ދިނުމުގެ ގޮތުންކަމަށް އިންތިޚާބީ ރައީސް ވަނީ ވިދާޅުވެފަ އެވެ.
އެހެން ނަމަވެސް މޫސުން ތަން ނުދޭނަމަ ހުވާކުރުމުގެ ޖަލްސާ ބާއްވާނީ މަޖިލީހުގެ އިދާރައިގައި ކަމަށް އެ އިދާރާއިން ވަނީ ހާމަކޮށްފަ އެވެ.
Advertisement
This content is created and paid for by advertisers and does not involve Voice Journalists
