ރާއްޖޭގެ އެކި ކަންކޮޅުތަކުގައި ކުލަގަދަކޮށް އީދުގެ މުނާސަބާ ފާހަގަކުރައްވާނެ ކަމަށް އިންތިޚާބީ ރައީސް ޑރ މުހައްމަދު މުއިއްޒު ވެލެއްވި ވައުދު ފުއްދުމަށްޓަކައި އަންނަ އަހަރަށް ލަފާކޮށް ހުށައަޅާފައިވާ ދައުލަތުގެ ބަޖެޓުގައި 50 މިލިއަން ރުފިޔާ ހިމަނުއްވައިފި އެވެ. 

ރިޔާސީ އިންތިޚާބު ނިންމަވާލެއްވުމަށްފަހު ރައްޔިތުންނާއި ބައްދަލުކުރެއްވުމަށް ޑރ މުއިއްޒު އެންމެ ފުރަތަމަ ބޭއްވި ބައްދަލުވުމުގައި ވާހަކަދައްކަވަމުން ވަނީ އެމަނިކުފާނުގެ ވެރިކަމުގައި ވަރަށް ކުލަ ގަދަކޮށް އީދު ފާހަގަކުރައްވާނެ ކަމަށް ވިދާޅުވެފަ އެވެ. 

މި އަހަރުގެ ބޮޑު އީދު ކުލަގަދަކޮށް ފާހަގަކުރުމަށް މާލެ ސިޓީ ކައުންސިލުން އިސްގަނައިގެން ކުލަ ބޮކިތަކުން މާލެތެރެ ޒީނަތްތެރިކޮށް، ތަކުބީރުގެ އަޑުއިވޭގޮތަށް ސްޕީކަރުތައް ހަރުކޮށް ހިންގި ހަރަކާތަށް ގިނަ ބައެއް ތައުރީފު ލިބިފައިވެއެވެ. 

އެކަމަށް އިޝާރާތްކުރައްވާ އެ ބައްދަލުވުމުގައި ޑރ މުއިއްޒު ވިދާޅުވީ އިސްލާމީވަންތަކަށް ދިރުވާ އާލާކުރަން ދިވެހީން ބޭނުންވާ ކަމަށާއި، ޢީދާއި ދިމާކޮށް ރަށުތެރެ ޒީނަތްތެރިކޮށް ތަކުބީރުގެ އަޑުއިވިގެން ދިއުމަކީ ރައްޔިތުންނަށް ހިތްހަމަޖެހުމާއި އުފާވެރިކަން ގެނެސްދިން ކަމެއްކަމަށް ރައްޔިތުން ބުނަމުން އައިސްފައިވާ ކަމަށެވެ.

އަދި އެމަނިކުފާނުގެ ވެރިކަމުގައި ރާއްޖޭގެ އެކި ކަންކޮޅިތަކުގައި ޢީދަށް ތައްޔާރުވުމުގެ ހަރަކާތްތައް ކުރިއަށް ގެންދަވާނެ ކަމަށް ޑރ މުއިއްޒު ވިދާޅުވި އެވެ. 

އެގޮތުން ފިނޭންސް މިނިސްޓްރީން އާންމުކޮށްފައިވާ އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި ވަނީ ޢީދު ފާހަގަކުރުމަށް ހޯމް މިނިސްޓްރީއަށް 50 މިލިއަން ރުފިޔާގެ ބަޖެޓެއް ކަނޑައަޅާފައެވެ. 

ޑރ މުއިއްޒު ވިދާޅުވެފައި ވަނީ ސަރުކާރުގެ ކެރިފޯރުންތެރިކަން ހުންނަ މިންވަރަކުން ރާއްޖޭގެ އެކި ކަންކޮޅުތަކުގައި ކުލަގަދަކޮށް ޢީދު ފާހަގަކުރުމުގެ މަސައްކަތްތައް ކުރައްވާނެ ކަމަށެވެ. 

އަންނަ އަހަރަށް ލަފާކޮށް ދައުލަތުން ވަނީ 47.3 ބިލިއަން ރުފިޔާގެ ބަޖެޓެއް ހުށައަޅުއްވާފައެވެ. އެ ބަޖެޓުގައި އާ ސަރުކާރުގެ ވައުދުތައް ފުއްދުމަށާއި، ބޯހިޔާވަހިކަމާއި ގުޅުންހުރި މަސައްކަތްތައް ކުރިއަށް ގެންދިއުމަށް ހިމަނާފައިވާކަން ފާހަގަކޮށްލެވެއެވެ.