އިންތިޚާބީ ރައީސް ޑރ މުހައްމަދު މުޢިއްޒު ވެވަޑައިގެންނެވި ވަޢުދާއި އެއްގޮތަށް ސ.ހިތަދޫ-ހުޅުމީދޫ 15 ކިލޯމީޓަރުގެ ބުރިޖު މަޝްރޫއު ހިންގުމަށް ކުރަންޖެހޭ ސާވޭ މަސައްކަތް ކުރުމަށް 30 މިލިއަން ރުފިޔާ އަންނަ އަހަރުގެ ދައުލަތުގެ ބަޖެޓްގައި ހިމަނައިފިއެވެ. 

މުޢިއްޒުގެ ވެރިކަމެއްގައި އައްޑޫގައި ވަކިން އޮންނަ ހުޅުމީދޫ އާއި ވެރިރަށް ހިތަދޫ ގުޅާލުމަށް ބްރިޖު އަޅުއްވާނެ ކަމުގެ ޔަގީންކަން ރިޔާސީ އިންތިހާބުގެ ކެމްޕެއިން ތެރެއިން އެމަނިކުފާނު ވަނީ ދެއްވާފައެވެ. 

އަދި އެ ބްރިޖް ވެގެންދާނީ އައްޑޫގައި އެޅިގެންދާނެ "ތަރައްގީގެ ފާލަމެއް" ކަމަށާ، އެއީ އައްޑޫގެ ޓޫރިޒަމް ފުޅާ ކުރުމަށް އެމަނިކުފާނު ގެންގުޅުއްވާނެ 'އައްސޭރި ޓޫރިޒަމް' ކޮންސެޕްޓު ކާމިޔާބު ކުރުމަށް ވެސް ލިބޭނެ ބާރެއް ކަމަށް އެމަނިކުފާނު ވަނީ އޭރު ވިދާޅުވެފައެވެ. 

Advertisement

'އައްސޭރި ޓޫރިޒަމް'ގެ ކޮންސެޕްޓް އަކީ ސަރުކާރުން އިންވެސްޓުކޮށްގެން އައްޑޫގެ ޓޫރިޒަމް ފުޅާކޮށް، 6،000 އެނދާ އެކު 10،000 ވަޒީފާ އުފެއްދުމަށް މުޢިއްޒު ކުރިއަށް ގެންދަވާނެ ކަމަށް ވިދާޅުވެފައިވާ ކޮންސެޕްޓެކެވެ. 

މިއަހަރުގެ ރިޔާސީ އިންތިހާބަށް ކުރީގެ ރައީސް ޔާމީން އަބްދުލްގައްޔޫމް ވާދަކުރައްވާނެ ކަން އިއުލާން ކުރައްވައި އައްޑޫ އަށް ކުރެއްވި ދަތުރުފުޅުގެ ތެރެއިން އެމަނިކުފާނު ވެސް ވަނީ ހުޅުމީދޫ އާއި ހިތަދޫ ބްރިޖަކުން ގުޅާލުމަށް ވައުދުވެވަޑައިގެންފަ އެވެ.