ސަރުކާރުގެ ޕީއެސްއައިޕީ މަޝްރޫއުތައް ހިންގުމަށް 8.6 ބިލިއަން ރުފިޔާ އަންނަ އަހަރަށް ލަފާކޮށް ދައުލަތުން ހުށައަޅާފައިވާ ބަޖެޓުގައި ހިމަނައިފި އެވެ. 

ކެޕިޓަލް ޚަރަދުގެ އެންމެ ބޮޑު ބައެއް ހިއްސާކުރާ ޕީއެސްއައިޕީގެ ޚަރަދަކީ 2024 ވަނަ އަހަރުގެ ބަޖެޓުގެ 17.5 އިންސައްތަ އެވެ. މިއީ 2023 ވަނަ އަހަރުގެ ޕީއެސްއައިޕީ ޚަރަދާ އަޅަބަލާއިރު 26 އިންސައްތަ ދަށް މިންވަރެކެވެ. 

2024 ވަނަ އަހަރުގެ ބަޖެޓުގައި ޖުމްލަ 1،780 ޕީއެސްއައިޕީ މަޝްރޫއަކަށް 8،665.3 މިލިއަން ރުފިޔާ ހަރަދުކުރަން ވަނީ ހިމަނާފަ އެވެ.

އޭގެ ތެރޭގައި އަލަށް ފަށާ 317 މަޝްރޫއަކަށް 1،1660.3 މިލިއަން ރުފިޔާ ހިމަނާފައިވާއިރު، މިހާރު ހިނގަމުންދާ 487 މަޝްރޫއެއް ކުރިއަށް ގެންދަން 6،259.6 މިލިއަން ރުފިޔާ ހިމަނާފައިވެ އެވެ. އަދި މީގެ ކުރިން ބަޖެޓުގައި ހިމަނާފައިވީ ނަމަވެސް އަމަލީ މަސައްކަތް އަދި ނުފެށިފައިވާ 813 މަޝްރޫއަކަށް ބޭނުންވާ 1،093.8 މިލިއަން ރުފިޔާ ވެސް އަންނަ އަހަރުގެ ބަޖެޓުގައި ހިމަނާފައިވެ އެވެ.

2024 ވަނަ އަހަރަށް ހުށައަޅާ ބަޖެޓުގައި މައިގަނޑުގޮތެއްގައި އިސްކަންދީފައިވަނީ މިހާރު ހިނގަމުންދާ މަޝްރޫއުތައް ކުރިއަށް ގެންދިއުމަށެވެ. 

ބަޖެޓުގައި މިފަދައިން ހިމަނާފައި ވީ ނަމަވެސް 2024 ވަނަ އަހަރުގެ ބަޖެޓު ތައްޔާރުކުރާއި، އައު ސަރުކާރުން ދައުރު ފަށާފައި ނުވުމާއި އައު ސަރުކާރުގެ ތަރައްގީގެ ސިސާސަތުތައް ތަންފީޒުކުރުމަށް ރާވާގޮތް ކަނޑައަޅާފައި ނުވުމުން މެދުރާސްްތާގައި ޕީއެސްއައިޕީ މަޝްރޫއުތަކުގެ ދާއިރާތަކަށް ބަދަލުއައުމަކީ އެކަށީގެންވާ ކަމެއްކަމށް ބަޖެޓުގައި ހިމަނާފައި ވެއެވެ. 

އެެހެން ނަމަވެސް މެދުރާސްތާގެ ޕީއެސްއައިޕީ ޚަރަދުގެ އެންމެ ބޮޑު ހިއްސާއަކީ އެކި ރަށްތަކުގައި ކުރިއަށް ގެންދިއުމަށް ރާވާފައިވަނީ ވައިގެ ބަނދަރުތައް ބިނާކުރުމާއި ބިން ހިއްކުމުގެ މަޝްރޫއުތައްކަން ފާހަގަކޮށްލެވެއެވެ. އޭގެ އިތުރުން ފުށި ދިއްގަރުފަޅު ހިއްކުމުގެ މަޝްރޫއުވެސް ހިމަނާފައިވާކަން ފާހަގަކޮށްލެވެ އެވެ.