އާދިއްތަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގެ ރިޔާސަތު ބަލެހެއްޓެވި މަޖިލީހުގެ ވިލުފުށި ދާއިރާގެ މެމްބަރު ހަސަން އަފީފު މަޖިލީހުގެ އިމްތިޔާޒަށް އަރައިގެންފައިވާކަމަށް ބުނެ އެމްޑީޕީން މަޖިލީހުގެ ސުލޫކު ކޮމެޓީއަށް މައްސަލައެއް ހުށައަޅައިފި އެވެ. 

އެ މައްސަލަ ހުށަހަޅާފައި ވަނީ އެމްޑީޕީ ޕީޖީ ގްރޫޕްގެ ލީޑަރު މުހައްމަދު އަސްލަމް އެވެ.

އަސްލަމް ހުށަހެޅުއްވި މައްސަލައިގައި ފާހަގަކުރައްވާފައި ވަނީ މިއަދުގެ ޖަލްސާގައި އަފީފް ކަން ކުރައްވާފައި ވަނީ މަޖިލީހުގެ ގަވާއިދާ ކަނޑައެޅިގެން ހިލާފަށް ކަމަށެވެ. އަފީފުގެ އެ އަމަލަކީ މުޅި މަޖިލީހަށް އުނިކަން އަންނަ ފަދަ އަމަލެއް ކަން އަސްލަމް ހުށައެޅުއްވި މައްސަލައިގައި ފާހަގަކުރައްވާފައިވެ އެވެ.

އަސްލަމް ހުށައެޅުއްވި އެ މައްސަލައިގައި ބުނެފައި ވަނީ ރައީސް ނަޝީދު މަޖިލީހުގެ ރިޔާސަތުން ވަކިކުރުމުގެ މައްސަލައިގެ ޖަލްސާއަކީ މަޖިލީހުގެ ގަވައިދު ބުނާގޮތުން ރައްޔިތުންގެ މަޖިލީހުގެ އިދާރާއިން އެޖެންޑާކޮށް އިންތިޒާމުކުރާ ޖަލްސާއެއް ކަމަށެވެ. އަދި މަޖިލީހުގެ ތަޅުމަށް މައްސަލައެއް، ނުވަތަ ބިލެއް، ނުވަތަ ގަރާރެއް ގެނައުމަށްފަހު އެ ބިލު ނުވަތަ ގަރާރާއި ގުޅިގެން ގޮތެއް ނުނިންމާ އެ ބިލު ނުވަތަ ގަރާރެއް ނިންމާލުމުގެ ބާރު މަޖިލީހުގެ ގަވައިދުގެ ދަށުން މަޖިލީހުގެ ރިޔާސަތަށް ލިބިގެން ނުވާކަމަށެވެ. 

ރައްޔިތުންގެ މަޖިލީހުގެ ރިޔާސަތު ބަލަހައްޓަވާ މެމްބަރަކަށް މަޖިލީހުގެ ޖަލްސާގެ ރިޔާސަތުގައި އިންނަވާ ވަގުތު ލިބިގެންވަނީ މަޖިލީހުގެ ގަވައިދުގެ ދަށުން މަޖިލީހުގެ ރައީސަށް ލިބިގެންވާ ބާރުތައްކަށް ރައްޔިތުންގެ މަޖިލީހުގެ ގަވައިދުގެ 44 ވަނަ މާއްދާގެ (ކ) އިން އެނގެން އޮތް ނަމަވެސް މިއަދު ބޭއްވި މަޖިލީހުގެ ތިންވަނަ ދައުރުގެ 15 ވަނަ ޖަލްސާ، އެ ޖަލްސާގެ ރިޔާސަތު ބެލެހެއްޓެވި ވިލުފުށީ ދާއިރާގެ މެމްބަރު ހަސަން އަފީފު ނިންމާލާފައިވަނީ މަޖިލީހުގެ ގަވައިދާއި ކަނޑައެޅިގެން ޚިލާފަށްކަމަށެވެ. 

އެހެންކަމުން އަފީފުގެ އެ އަމަލުތަކަކީ މަޖިލީހުގެ ގަވައިދުގެ 182 ވަނަ މާއްދާގެ (ށ) ގެ ދަށުން މުޅި މަޖިލީހުގެ ހައްގަށް އަދި އިމްތިޔާޒަށް ޖުމްލަގޮތެއްގައި އުނިކަން އަންނަ ފަދަ އަމަލުތަކެއް ކަމަށްވާތީ މަޖިލީހުގެ ގަދަރާއި މަޖިލީހުގެ ޖަލްސާތަކުގެ ސައްހަކަމަށް އުނިކަމެއް އަންނަފަދަ އަމަލެއްކަމަށް ވާތީ އެ މައްސަލަ އިމްތިޔާޒާއި ބެހޭ މައްސަލައެއްގެ ގޮތުގައި ބަލައިދިނުމަށް ހުށައަޅާކަމަށް އަސްލަމްގެ މައްސަލައިގައި ބުނެފައި ވެއެވެ.

ހެނދުނު ބޭއްވި ޖަލްސާގައި، މަޖިލީހުގެ 49 މެމްބަރުންގެ ސޮޔާއެކު ނަޝީދު ވަކިކުރަން ހުށަހަޅާފައިވާ ގަރާރު އަފީފު ވަނީ ބޭރުކޮށްލާފަ އެވެ.

އަފީފް މި ގަރާރު ބޭރުކޮށްލާފައި ވަނީ ދަ ޑިމޮކްރެޓްސްގެ ޕީޖީ ގްރޫޕްގެ ލީޑަރު، މެދު ހެންވޭރު ދާއިރާގެ މެމްބަރު އަލީ އާޒިމް ހުށަހެޅުއްވި ސުލޫކީ މައްސަލަ ބަލައިގަނެ، އެއީ ގަވާއިދާ ހިލާފަށް ހުށަހަޅާފައިވާ ގަރާރެއް ކަމަށް ނިންމާފަ އެވެ.

މެމްބަރުން ނެންގެވި ސުލޫކީ މައްސަލައިގައި ފާހަގަކުރައްވާފައި ވަނީ ނަޝީދު ވަކިކުރަން ހުށަހަޅާފައިވާ ގަރާރުގައި، ގަވާއިދުގެ 168 ވަނަ މާއްދާގައިވާ ޝަރުތުތައް ފުރިހަމަ ނުވާ ކަމަށެވެ. އެގޮތުން، ގަވާއިދުގައި ބަޔާންކޮށްފައިވާ ދީބާޖާއެއް ނެތް ކަމަށް ވިދާޅުވެފައިވެ އެވެ.  

ބޭރުކުރި ގަރާރު ހުށައެޅުމަށް މިއަދު ބޭއްވި ދެވަނަ ޖަލްސާ ވެސް ރިޔާސަތުގައި މަޖިލީހުގެ ނައިބު ރައީސް އީވާ އަބްދުﷲ އިންނަވާ ވަނީ ކުރިއަށް ނުގެންގޮސް ނިންމަވާލައްވާފަ އެވެ.