ރައީސް އިބްރާހިމް މުޙައްމަދު ޞާލިހުގެ ސަރުކާރު ނިމުމުގެ ކުރިން ހުށައެޅި 6.5 ބިލިއަން ރުފިޔާގެ ސަޕްލިމެންޓްރީ ބަޖެޓު ރައްޔިތުންގެ މަޖިލީހުން ފާސްކޮށްފި އެވެ. 

2023 ވަނަ އަހަރަށް ފާސްކުރި ދައުލަތުގެ ބަޖެޓުގެ އިތުރުން 6.5 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށައަޅާފައިވާއިރު، މިއަދު ކުރިއަށް ގެންދިޔަ ރައްޔިތުންގެ މަޖިލީހުގެ ޖަލްސާގައި ވަނީ، ސަޕްލިމެންޓްރީ ބަޖެޓު ކޮމިޓީން ފާސްކުރި ގޮތަށް ޖަލްސާގައި ބައިވެރިވި 57 މެންބަރުންގެ ވޯޓުން ފާސްކޮށްފަ އެވެ.

ސަޕްލިމެންޓްރީ ބަޖެޓު ފާސްކުރުމާއި ދެކޮޅަށް ވޯޓު ދެއްވީ އެންމެ 10 މެންބަރުން ނެވެ. 

ފިނޭންސް މިނިސްޓްރީން ބަޖެޓަށް ހުށަހެޅި 6.5 ބިލިއަން ރުފިޔާއާ އެކު މި އަހަރު ދައުލަތުގެ ބަޖެޓް 49.4 ބިލިއަން ރުފިޔާ އަށް އިތުރުވާނެއެވެ.

ބަޖެޓަށް އިތުރު ކުރަން ހުށަހެޅި އަދަދުތަކުގެ ތަފުސީލުތައކުގެ ތެރޭގައި ހިމެނެނީ ޖުމްލަ ރިކަރަންޓް ހަރަދުގެ ގޮތުގައި 3.1 ބިލިއަން ރުފިޔާ، އަދި ކެޕިޓަލް ހަރަދުގެ ގޮތުގައި 3.3 ބިލިއަން ރުފިޔާއެވެ.

ފިނޭންސް މިނިސްޓްރީން ރިކަރަންޓް ހަރަދަށް އިތުރު ކުރަން ހުށަހެޅި ފައިސާގެ ތެރެއިން ސަބްސިޑީ އަށް 1.8 ބިލިއަން ރުފިޔާ އިތުރަށް ހަރަދު ކުރުމަށް ނިންމާފައިވާއިރު، އާސަންދަ އަށް 1.2 ބިލިއަން ރުފިޔާ ވަނީ ކަނޑައަޅާފައެވެ.

އާސަންދަ އަށް އިތުރު ކުރި 1.2 ބިލިއަން ރުފިޔާއާ އެކު އާސަންދަ އަށް ކުރާ ހޭދަ 2.3 ބިލިއަން ރުފިޔާ އަށް އިތުރުވާނެކަން ވެސް ފާހަގަކޮށްލެވެ އެވެ.

ސަޕްލިމެންޓްރީ ބަޖެޓުގައި ކެޕިޓަލް ހަރަދު އިތުރު ކޮށްފައި ވަނީ ޕީއެސްއައިޕީ އަށް ކުރާ ހޭދަ އިތުރުވުމުންކަން ފާހަގަކޮށްފައި ވެއެވެ.

އެގޮތުން، އަލަށް ބަޖެޓަށް އިތުރުކުރި ފައިސާގެ ތެރެއިން ޕީއެސްއައިޕީގެ 12 މަޝްރޫއަށް 1.7 ބިލިއަން ރުފިޔާ ވަނީ ކަނޑައަޅައިފަ އެވެ. ޕީއެސްއައިޕީ މަޝްރޫއުތަކުގެ ތެރެއިން، އެންމެ ބޮޑު ހޭދައެއް އޮތީ އައްޑޫ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއަށެވެ. އެ މަޝްރޫއަށް 344 މިލިއަން ރުފިޔާ ވަނީ ކަނޑައަޅައިފަ އެވެ.

ހަމައެއާއެކު ހދ. ހަނިމާދޫ އެއާޕޯޓުގެ ޕްރޮޖެކްޓަށް 335 މިލިއަން ރުފިޔާ ބަޖެޓުން ކަނޑައެޅި އިރު 34 ރަށެއްގެ ނަރުދަމާ ހެދުމަށް 290 މިލިއަން ރުފިޔާ ހަމަޖައްސާފައިވެއެވެ. އަދި ޕޮލްކޯ ހައުސިން ޔުނިޓްތަކުގެ މަޝްރޫއު ނިންމަން 150 މިލިއަން ރުފިޔާ އާއި މާލެ-ތިލަފުށި ބްރިޖުގެ މަޝްރޫއުގެ މަސައްކަތަށް 146 މިލިއަން ރުފިޔާ ވެސް ހިމަނާފައި އެބައޮތެވެ.

ސަޕްލިމެންޓްރީ ބަޖެޓު ފާސްކުރުމުން، ބަޖެޓަށް އިތުރުކުރި 6.5 ބިލިއަން ރުފިޔާއާ އެކު ދައުލަތުގެ ރިކަރަންޓް ހަރަދު 31.7 ބިލިއަން ރުފިޔާ އަށް އިތުރުވާނެއެވެ.