ކުރިއަށް އޮތް އަހަރުގައި، ދައުލަތުގެ ޚަރަދުތައް ކުޑަ ކުރުމަށް މައިގަނޑު ތިން ކަމެއް، އަންނަ އަހަރަށް ލަފާކުރާ ބަޖެޓުގައި ސަރުކާރުން ހިމަނައިފިއެވެ. 

މިއަދު އޮތް ރައްޔިތުން މަޖިލީހުގެ ޖަލްސާގައި ބަޖެޓުގެ މައުލޫމާތު ދެއްވަމުން ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވީ، ފިސްކަލް އަދި ދެމެހެއްޓެނިވިކަން ކަށަވަރު ކުރުމަށްޓަކައި ދައުލަތުގެ ޚަރަދާއި ފައިނޭންސް ހޯދަންޖެހޭ މިންވަރު ކުޑަކުރަންޖެހޭ ކަމަށެވެ. އެހެންކަމުން ޚަރަދު ކުޑަކުރުމުގެ ގޮތުން ފިޔަވަޅުތައް އެޅުމަކީ މުހިންމު ކަމެއް ކަމުގައިވާ އިރު، ސަރުކާރުން މުހިންމު ތިން ފިޔަވަޅެއް އަޅަން ނިންމާފައިވާ ކަމަށް މިނިސްޓަރ ވިދާޅުވި އެވެ. 

އެގޮތުން ޚަރަދު ކުޑަ ކުރުމަށް ސަރުކާރުން ބަޖެޓްގައި ހިމަނާފައިވާ ކަންކަމަކީ؛ 

1. އިންޑައިރެކްޓްސް ބައެއް ސަބްސިޑީތައް ސަރުކާރުގެއެހީތެރިކަން ޖެހިފައިވާ މީހުންނަށް ޚާއްސަ ކުރެވޭ ގޮތަށް ޑައިރެކްޓް ސަބްސިޑީއަކަށް ބަދަލު ކުރުން.

2. އާސަންދައިގެ ނިޒާމު ހަރުދަނާކޮށް މުރާޖައާ ކުރުން.

3. ސަރުކާރުގެ ވެލްފެއަރގެ ގޮތުގައި އެހީ ދޭ ނިޒާމު ހަރުދަނާ ކުރުން.

މިނިސްޓަރ އިތުރަށް ވިދާޅުވީ, ސަރުކާރުގެ މިސިޔާސަތު ތައް އަންނަ އަހަރުގެ ޖުލައި މަހުގައި ތަންފީޒު ކުރުމަށްޓަކައި ކަމާބެހޭ ފަރާތްތަކާ އެކު މަޝްވަރާ ކުރައްވަމުން ގެންދަވާ ކަމަށާ، އެކަށީގެންވާ ގޮތެއްގައިި ޚަރަދު ކުޑަކުރެވޭނީ އެގޮތުގެ މަތިން ކަމަށެވެ. 

ހަރަދު ކުޑަ ކުރަން ފިޔަވަޅު އަޅަމުން ދިޔަ ނަމަވެސް ފަށާފައިވާ މަޝްރޫއުތައް ކުރިއަށް ގެންދާނެ ކަމަށް މިނިސްޓަރ ވަނީ ވިދާޅުވެފަ އެވެ. 

އަންނަ އަހަރަށް ލަފާކޮށް މަޖިލީހަށް ފޮނުވާފައި ވަނީ 49.5 ބިލިއަން ރުފިޔާގެ ބަޖެޓެކެވެ. މި ބަޖެޓުގައި އެ ބަޖެޓުގައި އާމްދަނީ އާއި ހިލޭ އެހީގެ ގޮތުގައި 33.547 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު، ހަރަދު ވާނެ ކަމަށް ލަފާކޮށްފައިވަނީ 47.317 ބިލިއަން ރުފިޔާ އެވެ. އަދި ބަޖެޓަށް އިތުރަށް 17.2 ބިލިއަން ރުފިޔާ ހޯދަން ޖެހެއެވެ. މީގެ އިތުރުން، މުޅި ބަޖެޓުގެ 70 ޕަސެންޓް ހޭދަވަނީ ރިކަރަންޓް ޚަރަދުގެ ގޮތުގައެވެ.