ރިޔާސީ އިންތިޚާބުތަކަށް ފަހު، ވެރިކަން ބަދަލުވުމާއެކު އާ ސަރުކާރުން މީހުން ވަޒީފާއިން ކަނޑާ ވާހަކަ ދައްކާލަ ދައްކާލަ ތިބޭތާ 15 އަހަރު ވެގެން ގޮސްފައިވާކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު ހަސަން މުހައްމަދު (ހަސަންޓޭ) ވިދާޅުވެއްޖެ އެވެ.
ހަސަންޓޭ މިފަދައިން ވިދާޅުވެފައި ވަނީ ސިޔާސީ ނޫން ވަޒީފާތަކުން އާންމު ވަކި ނުކުރައްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ ކެމްޕޭނުގައި ވެވަޑައިގެންނެވި ވައުދާ ޚިލާފަށް ފެނަކަ ކޯޕަރޭޝަނުން މުވައްޒަފުން ވަކިކުރަމުން ގެންދާ ކަމަށް ބުނެ ރައްޔިތުންގެ މަޖިލީހަށް ހުށައެޅިފައިވާ ކުއްލި މައްސަލައަށް މިއަދުގެ ޖަލްސާގައި ވާހަކަދައްކަވަމުން ނެވެ.
ހަސަންޓޭ ވިދާޅުވީ އިންތިޚާބުތައް އޮންނަ ގޮތުން ވޭތުވެދިޔަ 15 އަހަރު ރައްޔިތުންނަށް ތިބެން ޖެހިފައިވަނީ ކޮންމެވެސް "ސިޔާސީ ސަކަރާތްގަނޑެއް" ގެ ތެރޭގައި ކަމަށެވެ. ސިޔާސީ ކަންކަން ހުއްޓާލާ ހިންދެމިލައިގެން މަސައްކަތް ކުރާނެ ވަގުތު ރައްޔިތަކަށް ނުލިބޭކަމަށް އޭނާ ވިދާޅުވި އެވެ.
ކޮންމެ އިންތިޚާބަކާއި ދިމާކޮށް ވަޒީފާ ދިނުމާއި ވަޒީފާއިން ކެނޑުމުގެ ވާހަކައަކީ މިއަދަކު އަލަށް ދައްކާ ވާހަކައެއް ނޫން ކަމަށާއި، މީ ވޭތުވެދިޔަ 15 އަހަރުވެސް ދައްކަމުން އައި އެހެން ނަމަވެސް ޙައްލު ނުވެ އޮތް މައްސަލައެއް ކަމަށް އޭނާ ވިދާޅުވި އެވެ.
އެކަން ފާހަގަކުރައްވާ ހަސަންޓޭ ވިދާޅުވީ 19 ވަނަ ރައްޔިތުންގެ މަޖިލީހުން އިސްނަގައިގެން މި މައްސަލަތަކަށް ޤާނޫނީ ޙައްލު ހޯދުމަށް އޭނާ ގޮވާލައްވާ ކަމަށެވެ.
އެގޮތުން ރިޔާސީ އިންތިޚާބާއި، މަޖިލީސް އިންތިޚާބާއި އަދި ކައުންސިލް އިންތިޚާބު ވެސް އެކުއެގީގައި ނިމޭނެ ކަހަލަ ގޮތަކަށް ގާނޫނު ފާސްކުރެވިއްޖެ ނަމަ، މި މައްސަލަތަކާއި ޝަކުވާތަކަށް ޙައްލު ލިބި ސަރުކާރު ހިންގަން ތިބޭ ބަޔަކަށް ވެސް ކުރިއަށް ދާންވީ ގޮތް ސާފުވެގެންދާނެ ކަމަށް އޭނާ ވިދާޅުވި އެވެ.
"ހިނގާބަލަ ގާނޫނު އަސާސީއަށް ބަދަލެއް ގެނެސްލާފައި، ހަމަ މި މެޖޯރިޓީގައި އިންތިޚާބުތައް ރައީސުލްޖުމްހޫރިއްޔާ އިންތިޚާބާއި މަޖިލީސް އިންތިޚާބާއި، ކައުންސިލް އިންތިޚާބާއި އެއް މުދަތަކަށް އެއް ތާރީހަކަށް ލާފައި ނިންމާލީމާ މި ޝަކުވާއެއް ވެސް ކުރާކަށް ނުޖެހޭނެ، އޭރުން ފުރުސަތު ވެސް ރައްޔިތުންނަށް މަސައްކަތްކުރަން ލިބުނީ އޭރަށް ސިޔާސީ ޕާޓީތަކަށް މިނިވަންކަމާއެކު މަސައްކަތްކުރަން ވަގުތުތައް ވެސް ލިބުނީ އަނެއް ފަސް އަހަރަށް (މަސައްކަތް) ކުރަން"
އުނގޫފާރު ދާއިރާގެ މެމްބަރު ހަސަން މުހައްމަދު
ހަސަންޓޭ ވިދާޅުވީ އެއްވެސް ސަރުކާރަކުން އެއްވެސް ރައްޔިތަކަށް ދެރައެއް ލިބޭ ގޮތަށް ކަމެއް ކުރުމަކީ އޭނާ ބަލައިގަންނާނެ ކަމެއް ނޫން ކަމަށެވެ.
އެގޮތުން އެއްވެސް ރައްޔިތަކު ހުރި ވަޒީފާއަކުން ވަކިކޮށްގެން ވެސް ނުވާނެ ކަމަށާއި، އަދި ބޭއިންސާފުން އެއްވެސް ރައްޔިތަކާއި ދޭތެރޭ ސަރުކާރަކުން ކަމެއް ކޮށްގެން ވެސް ނުވާނެ ކަމަށް އޭނާ ވިދާޅުވި އެވެ.
އެހެން ނަމަވެސް ފާއިތުވި 15 އަހަރު އެއް ޝަކުވާއެއް ކުރަމުންދާއިރު، ގާނޫނީ ގޮތުން މި މައްސަލަ ޙައްލުކުރެވެން ޖެހޭކަމަށް ހަސަންޓޭ ވިދާޅުވި އެވެ. އަދި ބަދަލުވާ ކޮންމެ ސަރުކާރަކާއެކު ވަޒީފާތަކުން މީހުން ނުކެނޑޭނެ ފަދަ ގޮތަކަށް ރައްޔިތުންގެ މަޖިލީހުން ގާނޫނު ފާސްކުރުމުން ދެން އިތުރަށް އެ ޝަކުވާތައް ނުކުރެވޭނެ ކަން އޭނާގެ ވާހަކައިގައި ވަނީ ފާހަގަކުރައްވާފަ އެވެ.
Advertisement
This content is created and paid for by advertisers and does not involve Voice Journalists
