މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯއަކީ 100 އިންސައްތަ ސަރުކާރު ހިއްސާވާ ކުންފުންޏަކަށް ހެދުމަށް މިއަދު ސަރުކާރުން ނިންމައިފިއެވެ. 

ސަރުކާރުން މިއަދު ނިންމާފައިވާ މުހިންމު ބައެއް ނިންމުންތަކާއި ގުޅޭ ގޮތުން މައުލޫމާތު ދެއްވުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒާއި އެމަނިކުފާނުގެ ކެބިނެޓުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، މަސްވެރިކަމުގެ ދާއިރާ އަކީ ރާއްޖޭގެ އިގްތިސާދަށް އެންމެ މުހިންމު އެއް ދާއިރާ ކަމަށެވެ. 

އެގޮތުން އެ ދާއީރާ ކުރިއެރުވުމަށް، ރައީސް މުޢިއްޒުގެ ސަރުކާރުގެ މެނިފެސްޓޯގައި ހިމަނުއްވާފައިވާ އެންމެ މުހިންމު އެއް މަސައްކަތަކީ މިފްކޯ އަކީ އެސްޓީއޯގެ ސަބްސިޑިއަރީ ކުންފުންޏެއްގެ ގޮތުގައި އޮތް އޮތުން ބަދަލުކޮށް، އެއީ %100 ސަރުކާރު ހިއްސާވާ ކުންފުންޏަކަށް ހެދުން ކަމަށް އެމަނިކުފާނު ވިދާޅުވި އެވެ. 

Advertisement

މިފްކޯ އަކީ 100 އިންސައްތަ ސަރުކާރު ހިއްސާވާ ކުންފުންޏަކަށް ހެދުމަށް ނިންމި ސަބަބަށް އަލިއަޅުވާލައި ރައީސް މުޢިއްޒު ވިދާޅުވީ، އެއީ މަސްވެރިކަމުގެ ދާއިރާ ހަރުދަނާކޮށް، މަސްވެރިންނަށް ވެވަޑައިގެންފައިވާ ވައުދުތައް ފުއްދައިދިނުމަށް މަގުފަހި ކުރެއްވުމަށް ނިންމެވި ނިންމެވުމެއް ކަމަށެވެ. އަދި އެކަން ހަކުވި ދުވެލީގައި ކުރިއަށްދާނެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ. 

މީގެ އިތުރުން ރައީސް މުޢިއްޒު ވަނީ، މަސްވެރިންނަށް ޚާއްސަ ކޯޕަރޭޓިވްއެއް ގާއިމްކުރައްވައި، އެ ކޯޕަރޭޓިވް އަކީ މިފްކޯގެ ހިއްސާދާރަކަށް ހެދުމަށް ސަރުކާރުން ނިންމަވާފައިވާ ނިންމެވުމަށް މަގުފަހިވެގެންދާނީ މިފްކޯ އަކީ ސަރުކާރުގެ ހިއްސާވާ ކުންފުންޏަކަށް ހެދުމުން ކަން ފާހަގަކުރައްވާފައެވެ. 

އަދި މަސްވެރިކަން ކުރި އެރުވުމަށް މިފްކޯގެ ދައުރު ބޮޑުކަމަށްވެސް އެމަނިކުފާނު ވިދާޅުވި އެވެ.