މިހާތަނަށް ބެލި ބެލުމުން އިންޑިއާ ސިފައިންގެ 89 މީހުން ރާއްޖޭގައި ތިބިކަން ދެނެގަނެވިފައިވާ ކަމަށާއި، އެހެން ނަމަވެސް މި އަދަދަށް ބަދަލުތަކެއް އައުމަކީ އެކަށީގެންވާ ކަމެއްކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ. 

ރައީސުލްޖުމްހޫރިއްޔާ ޑރ މުއިއްޒު މިފަދައިން ވިދާޅުވެފައި ވަނީ މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރާއްޖޭގައި ތިބި އިންޑިއާ ސިފައިންގެ އަދަދާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ. 

ރައީސް އޮފީހުން ބޭއްވި އެންމެ ފުރަތަމަ ނޫސްވެރިންގެ ބައްދަލުވުމުގައި، ރައީސް އޮފީހުގެ އަންޑަ ސެކެޓްރީ މުހައްމަފު ފިރުޒުލް ވިދާޅުވީ އެހާތަނަށް ބެލިބެލުމުން ރާއްޖޭގައި 77 އިންޑިއާ ސިފައިން ތިބިކަން ދެނެގަނެވިފައިވާ ކަމަށެވެ. އެއީ އިންޑިއާއިން ރާއްޖެއަށް ހަދިޔާކުރި ހެލިކޮޕްޓަރާއި ޑޯނިއާ ބެލެހެއްޓުމަށް ތިބި ސިފައިންކަމަށް ފިރުޒުލް އެ ދުވަހު ވިދާޅުވި އެވެ. 

އޭގެ އިތުރުން ފިރުޒުލް ވިދާޅުވީ ރާއްޖެއާއި އިންޑިއާ ސަރުކާރާއި މެދު 100 އެއްހާ އެއްބަސްވުން ހަދާފައިވާ ކަމަށާއި، އެ އެއްބަސްވުންތައް ދިރާސާ ކުރުމުގެ މަސައްކަތްތައް ސަރުކާރުން ކުރަމުންދާ ކަމަށެވެ. އަދި އެކަމުގެ ތަފްސީލުތައް ވެސް މީޑިއާއާއި ހިއްސާކުރާނެ ކަމަށެވެ. 

މިއަދުގެ ނޫސްވެރިންގެ ބައްދަލުވުމުގައި އިންޑިއާ ސިފައިންނާއި ގުޅޭގޮތުން މައުލޫމާތު ދެއްވަމުން ރައީސުލްޖުމްހޫރިއްޔާ ޑރ މުއިއްޒު ވިދާޅުވީ އިންޑިއާ ސިފައިން ތިބި އަދަދު މުޅިން ސާފު ނުވާ ކަމަށެވެ. 

އެހެން ނަމަވެސް މިހާތަނަށް ބެލި ބެލުމުން 89 ސިފައިން ތިބިކަން ސާފުވެފައިވާ ކަމަށާއި، އެ އަދަދަށް ބަދަލުއައުމަކީ އެކަށީގެންވާ ކަމެއްކަމަށް ރައީސުލްޖުމްހޫރިއްޔާ ވިދާޅުވި އެވެ. އަދި އެމަނިކުފާނު ވިދާޅުވީ އިންޑިއާ ސިފައިން ތިބި އަދަދާއި ގުޅޭގޮތުން އެކި އިދާރާގެ އެކި ލިޔުންތަކުގައި ތަފާތު އަދަދުތައް ހިމަނާފައި ވުމުން، އަދަދުތައް ސާފުކުރުމުގެ މަސައްކަތް ސަރުކާރުން ކުރަމުންދާ ކަމަށެވެ. 

ޤަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި ތިބި އިންޑިއާ ސިފައިން އަނބުރާ ފޮނުވާލުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ. 

އެމަނިކުފާނު ވެރިކަމުގެ މަސްއޫލިއްޔަތުތަކާއި ހަވާލުވެވަޑައިގެން ފުރަތަމަ ދުވަހު އެ މަސައްކަތްޕުޅު ފައްޓަވާފައިވާއިރު، ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އެ ގައުމުން އެއްބަސްވެފައިވާ ކަމަށާއި، ޑިޕްލޮމެސީގެ އުސޫލުން އެކަން ކުރުމަށް ހައިލެވެލް ކޮމެޓީއެއް އެކުލަވާލާފައިވާކަމަށް ރައީސުލްޖުމްހޫރިއްޔާ ޑރ މުއިއްޒު ވަނީ ވިދާޅުވެފަ އެވެ.