ރައީސުލްޖުމްހޫރިއްޔާ ޑރ މުހައްމަދު މުއިއްޒު ރިޔާސީ އިންތިޚާބުގެ ކެމްޕޭނު ތެރޭގައި ވައުދުވެވަޑައިގެންނެވި ގޮތަށް ހުޅުމާލޭގެ ދެވަނަ ފިޔަވަހީގައި އަޅާފައިވާ ހިޔާ ޓަވަރުތަކުގައި އިތުރު ފްލެޓު ހަރުކުރުމުގެ މަސައްކަތް އާބަންކޯއިން ފަށާފައިވާކަން އެ ކުންފުނީގެ މެނޭޖިން ޑިރެކްޓަރު ފަޒުލް ރަޝީދު ހާމަކުރައްވައިފި އެވެ.
ފަޒުލް މިފަދައިން ހާމަކުރައްވާފައިވަނީ ހިޔާ ފްލެޓުގެ ފިނިޝިން މަސައްކަތް ކުރުމަށް ރައްޔިތުންގެ ޖީބުން ކުރި ޚަރަދު އަނބުރާ ލިބޭނެ ފަދަ ލުއި އިންތިޒާމުތަކެއް ސަރުކާރުން ހަމަޖެއްސުމާއި ގުޅިގެން، އެ މަސައްކަތް ކުރިއަށް ގެންދާނެ ގޮތުގެ ތަފްސީލު މީޑިއާއަށް ހާމަކުރުމަށް އާބަންކޯއިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ނެވެ.
ފަޒުލް ވިދާޅުވީ ހުޅުމާލޭގެ ދެވަނަ ފިޔަވަހީގައި ހަދާފައިވާ ހިޔާ ޓަވަރުތަކުގައި، ކޮންމެ ޓަރެއްގައި ދެ ލިފްޓު އިތުރަށް ހަރުކޮށްދެއްވާނެކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ރިޔާސީ އިންތިޚާބުގެ ކެމްޕޭނުގެ ތެރޭގައި ވިދާޅުވެފައި ވާ ކަމަށެވެ.
އެ ކަމަކީ އެމަނިކުފާނު ވެރިކަމުގެ މަސްއޫލިއްޔަތުތަކާއި ހަވާލުވެވަޑައިގަތުމަށް ފަހު އެންމެ އިސްކަމެއް ދެއްވައިގެން ކުރައްވާނެ ކަންކަން ހިމެނޭހެން އެކުލަވާލައްވާފައިވާ ހަފްތާ 14 މަގުޗާޓުގައި ވެސް ހިމެނޭ ކަމެއްކަން ފަޒުލް ފާހަގަކުރެއްވި އެވެ.
އެއާއެކު އޭނާ ވިދާޅުވީ އެ މަސައްކަތް މިހާރު އާބަންކޯއިން ފަށާފައިވާ ކަމަށެވެ.
"ލިފްޓުގެ ކަންތަކުގައި، މިހާރު ލިފްޓުގެ ކަންތަކުގައި އަޅުގަނޑުމެން މިހާރު މަސައްކަތް ފަށައިފިން. 14 ހަފްތާގެ ޕްލެޖުގެ ތެރޭގައި ހިމެނޭކަމެއް ތިވިދާޅުވީ"
އާބަންކޯގެ އެމްޑީ ފަޒުލް ރަޝީދު
ފަޒުލް އިތުރަށް ވިދާޅުވީ ހިޔާ ފްލެޓުތަކާއި ވިނަރެސް ފްލެޓުތަކުގެ މަސައްކަތްތައް ވެސް ބަލައި، ހުރި މައްސަލަތައް ދެނެގަތުމުގެ މަސައްކަތް އާބަންކޯއިން ކުރަމުންދާ ކަމަށެވެ.
އޭގެ އިތުރުން އެ ކުންފުނިން މަސައްކަތް ކުރާނީ ރައްޔިތުންނަށް ދިމާވެފައިވާ މައްސަލަތައް ވީ އެންމެ އަވަހަކަށް ޙައްލުކޮށްދެއްވުމަށް ކަމަށާއި، އެކަން ކުރައްވާނެ ކަމުގެ ފުރިހަމަ ޔަގީންކަން ދެއްވާކަމަށް ވެސް ފަޒުލް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
