މޯލްޑިވްސް އެންޓި ކޮރަޕްޝަން ޓްރަސްޓް ފަންޑު ރަސްމީކޮށް އިފްތިތާހުކޮށްފި އެވެ. 

މިއީ ރާއްޖޭގައި ދެމެހެއްޓެވި ގޮތެއްގައި ކޮރަޕްޝަނާއި ދެކޮޅަށް ކުރެވޭ މަސައްކަތްތަކާއި، މާލީ ލޮޅުންތަކުގެ އަސަރު ކުޑަކުރެވިފައިވާ ހަރަކާތްތަކަކަށް ހެދުމާއި، އަހަރުގެ ވަކި ހިސާބަކުން ބަޖެޓަށް ގެނެވޭ އުނިކަމުގެ ނޭދެވޭ އަސަރުން އެފަދަ ހަރަކާތްތައް ބުރޫ ނާރާނެފަދަ ގޮތަކަށް ކުރިއަށް ގެންދިއުމުގެ މަގްސަދުގައި، ކޮމިޝަނުގެ އާ މެންބަރުންގެ ނިންމުމެއްގެ ދަށުން ގާއިމް ކުރެވުނު ފަންޑެކެވެ.

މި ފަންޑް ރަސްމީކޮށް އިފްތިތާހުކޮށްދެއްވީ ބައިނަލްއަގްވާމީ އެންޓި-ކޮރަޕްޝަން ދުވަސް ފާހަގަކުރުމަށް ބުރާސްފަތި ދުވަހު ދަރުބާރުގޭގައި ބޭއްވި ހާއްސަ ޖަލްސާގައި ޖަޕާނު ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަޓަކިއޫޗީ މިޑޯރީ އެވެ.

މި ފަންޑާއި ގުޅޭ ތަފްސީލުތައް ހާމަކުރަމުން އޭސީސީން ބުނީ މި ފަންޑުގައި ޖަމާކުރެވޭނީ ރާއްޖެއާއި ރާއްޖެއިން ބޭރުގެ އެކި އެކި ފަރާތްތަކުން، ކޮރަޕްޝަނާ ދެކޮޅަށް މަސައްކަތް ކުރުމަށާއި ނަޒާހަތްތެރިކަން ކުރިއެރުވުމަށް މަސައްކަތް ކުރުމުގެ ގޮތުން އެހީގެ ގޮތުގައި ލިބޭ ފައިސާއާއި، މޯލްޑިވްސް ނޭޝަނަލް އެންޓި-ކޮރަޕްޝަން އެކެޑަމީން ހިންގާ ކޯސް ތަކުގެ އިދާރީ ފީއާއި ކޯސް ފީ އިން ލިބޭ ފައިސާއާއި، ކޮމިޝަނުގެ ކޮންފަރެންސް ހޯލާއި އެ ހޯލާ ގުޅިފައިވާ ވަސީލަތްތައް ކުއްޔަށް ދޫކޮށްގެން ހޯދާ ފައިސާގެ އިތުރުން ކޮމިޝަނުގެ އެންގުންތަކާ ހިލާފުވުމުން ނަގާ ފައިސާ އާއި ކޮމިޝަނަށް ލިބޭ ސްޕޮންސަރޝިޕްތަކުގެ ދަށުން މުވައްޒަފުންނަށް ދެވޭ ޓްރެއިނިންގައި މުވައްޒަފުން ބޮންޑާ ހިލާފުވެ ފައިސާ ދައްކަންޖެހޭ ހާލަތްތަކުގައި ލިބޭ ފައިސާއާއި، ކުށް ކުރުމަށް ބޭނުންކުރާ ފައިސާގެ ތެރެއިން އަނބުރާ ދައުލަތަށް ހޯދޭ ފައިސާއާ އެއިން ހޯދާ މަންފާއާއި، ކުށް ކޮށްގެން ހޯދާ ފައިސާ އާއި އެއިން ހޯދާ މަންފާއިން ލިބޭ ފައިސާ ކަމަށެވެ. 

މީގެ އިތުރުން ކުށް ކޮށްގެން ހޯދާ މުދަލާއި އެ މުދަލުން ހޯދާ މަންފާ އަނބުރާ ދައުލަތަށް ނަގާ ހާލަތުގައި، އެ ތަކެތި ބޭނުންކޮށްގެން ދައުލަތަށް މަންފާ ހޯދާ ހާލަތުގައި ލިބޭ މަންފާއިން މާލީ ވުޒާރާއާއި އެންޓި-ކޮރަޕްޝަން ކޮމިޝަނުން އެއްބަސްވާ ފައިސާގެ އަދަދެއް ވެސް މި ފަންޑަށް ޖަމާކުރުމަށް ނިންމާފައިވާކަމަށް އޭސީސީން ވަނީ ބުނެފަ އެވެ.

އޭސީސީން ބުނީ މި ފަންޑަށް ޖަމާކުރެވޭ ފައިސާ ބޭނުން ކުރާނީ ކޮރަޕްޝަނުގެ އަމަލުތަކުން ލިބޭ ގެއްލުމާއި އެ އަމަލުތަކުގެ ނުބައިކަމުގެ މައްޗަށް ދައުލަތުގެ އިދާރާތަކުގެ މުވައްޒަފުންނާއި އާންމުން ހޭލުންތެރި ކުރުވައި ނަޒާހަތްތެރިކަން ކުރިއެރުވުމަށް ހިންގަންޖެހޭ ހަރަކާތްތައް ހިންގުމަށް ކަމަށެވެ.

ހަމައެއާއެކު، ކޮރަޕްޝަނުގެ އަމަލުތައް ހުއްޓުވުމަށްޓަކައި ކުރަންޖެހޭ ދިރާސާތައް ކުރުމަށް ވެސް މި ފަންޑުގެ ބޭނުން ހިފާނެކަމަށް އޭސީސީން ވަނީ ބުނެފައެވެ. 

އޭގެ އިތުރުން، އެހެނިހެން އެންޓި-ކޮރަޕްޝަން އޭޖެންސީތަކާ ގުޅިގެން ކުރިއަށް ގެންދާ ހަރަކާތްތައް ހިންގައި ގުޅުން ބަދަހި ކުރުމަށާއި، ކޮރަޕްޝަނުގެ މައްސަލަތަކުގެ ތަހުގީގުގެ މަސައްކަތްތައް ކުރިއެރުވުމަށް އިންވެސްޓިގޭޝަން ދާއިރާއިން ފަންނީ އެހީތެރިކަން ހޯދުމާއި، މުވައްޒަފުން ތަމްރީނު ކުރުމާއި ތާޒާ ކުރުމަށް ކުރަންޖެހޭ މަސައްކަތްތަކަށާއި، ވަސީލަތްތައް ގާއިމު ކުރުމުގެ ގޮތުން އިންފްރާސްޓްރަކްޗަރ ވަރުގަދަ ކުރުމާއި ޒަމާނީ ފިކުރީ އަދި މަޢުނަވީ އާލާތްތައް ހޯދުމާއި ކުރިއެވުމަށާއި، މޯލްޑިވްސް ނެޝަނަލް އެންޓި-ކޮރަޕްޝަން އެކެޑަމީ ތަރައްގީކޮށް ހަރުދަނާކުރުމަށް ކުރާ މަސައްކަތްތަކަށް ވެސް އެ ފަންޑުން ޚަރަދުކުރުމަށް ނިންމާފައިވާކަމަށް އޭސީސީން ވަނީ ބުނެފައެވެ.