ފެނަކަ ކޯޕަރޭޝަންގެ ހާލަތު ދެނެގަތުމާއި ކުންފުނީގެ ހިންގުން ހަރުދަނާކުރުމަށް އެތެރޭގެ އޮޑިޓެއް ހަދަން ނިންމާފައިވާކަމަށް އެ ކުންފުނީގެ މެނޭޖިން ޑިރެކްޓާ މުއާޒު މުހައްމަދު ރަޝީދު ވިދާޅުވެއްޖެ އެވެ. 

ނިމިގެންދިޔަ ސަރުކާރުގައި ފެނަކަ ކުންފުނި ސަރުކާރުގެ "ކޮރަޕްޝަން ހާއްޔަކަށް" ހަދާފައިވާކަމަށް ބުނެ ގިނަ ފާޑުކިޔުންތަކެއް ވަނީ އަމާޒުވެގެން ގޮސްފައެވެ. 

އެގޮތުން ރިޔާސީ އިންތިޚާބުގެ ތެރޭގައި ކުންފުންޏަށް ބޭނުން ނުވާރަށް މުވައްޒަފުން ނެގުމާއި، ނުއަގުގައި މަޝްރޫއުތއް ހިންގުންފަދަ އެތައް ކަމެއް ފެނައިން ކޮށްފައިވާކަމަށް ތުހުމަތު އޮތްއިރު، އެ ކުންފުނީގެ ދަރަނި ދެ ބިލިއަނަށް ވުރެ މައްޗަށް ގޮސްފައިވާކަން ތަފާސް ހިސާބުތަކުން ދައްކައެވެ. 

Advertisement

ފެނަކަ ކުންފުނީގެ ހުރި މިފަދަ މައްސަލަތައް ބަލައި ހައްލުކުރުމުގެ ގޮތުން ކުންފުނި އޮޑިޓްކުރުމުގެ މަސައްކަތް ފަށާފައިވާކަން ހާމަކުރައްވާ މުއާޒު މުހައްމަދު ރަޝީދު ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ވިދާޅުވީ ފެނަކަ ކުންފުންޏަށް ނުކަތާވަރަށް މީހުން އެ ކުންފުންޏަށް ނަގާފައިވާ ކަމަށެވެ.

އޭގެ އިތުރުން މިހާތަނަށް ބެލިބެލުމުން ނުއަގުގައި ކުންފުންޏަށް މުދާ ގަނެފައިވާކަން ވެސް ހާމަވާން އޮތްކަމަށް އޭނާ ވިދާޅުވި އެވެ. އަދި އެގޮތަށް އެކަން ކުރުމުގެ ސަބަބުން ކުންފުނީގެ ދަރަނި ވަރަށް ބޮޑަށް އިތުރުވެފައިވާކަން އޭނާ ފާހަގަކުރެއްވި އެވެ. 

މުއާޒު ވިދާޅުވީ ކުރިއަށް އޮތް ދެ މަސްތެރޭ ކުންފުނި އޮޑިޓްކޮށް ލިބޭ މައުލޫމާތުތައް ކަމާބެހޭ ފަރާތްތަކާއި ހިއްސާކުރައްވާނެ ކަމަށެވެ.

ފެނަކަ ކުންފުނީގެ ދަރަނި އިންތިހާއަށް އިތުރުވެފައިވާއިރު، މުވައްޒަފުންގެ މުސާރައިގެ ގޮތުގައި އެކަނިވެސް 79 މިލިއަން ރުފިޔާ ހޭދަކުރަން ޖެހޭކަމަށް އެ ކުންފުނިން ވަނީ ހާމަކޮށްފަ އެވެ. 

މުއާޒު ކުންފުންޏާއި ހަވާލުވުމަށްފަހު، ވަނީ ކޮންޓްރެކްޓް ހަމަވެފައިވާ މުވައްޒަފުންގެ ކޮންޓްރެކްޓް އާކުރުމުގެ އުސޫލަށް ބަދަލުގެނެސްފަ އެވެ. އެގޮތުން މަސައްކަތެއް ނެތް ކޮންޓްރެކްޓު މުވައްޒަފުންގެ މުސާރަ އާކޮށްނުދިނުމަށް މުއާޒު ވަނީ ނިންމަވާފަ އެވެ. 

އޭގެ އިތުރުން ވެސް ކުންފުނީގެ ހިންގުން ހަރަދަނާކޮށް، ކުންފުނި އަރަނިވެރި ކުރުމަށް ކުރެވެން އޮތް މަސައްކަތްތައް ކުރައްވާނެކަމަށް މުއާޒު ވަނީ ވިދާޅުވެފަ އެވެ.