މާލޭގެ އަމީނީ މަގުގެ ނުނިމި ހުރި ސެގްމަންޓުތަކުގެ މަސައްކަތް ރޯޑް ޑިވެލޮޕްމަންޓު ކޯޕަރޭޝަން (އާރުޑީސީން) ފަށައިފި އެވެ. 

ނިމިދިޔަ ސަރުކާރުން ޕްލޭނިން މިނިސްޓްރީ މެދުވެރިކޮށް މާލެ ސިޓީ ކައުންސިލް އަތުން އަތުލާ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އާއި އަމީނީ މަގު ހެދުމުގެ މަސައްކަތް ހަވާލުކޮށްފައި ވަނީ މިދިޔަ ޖުލައި މަހުގައެވެ. 

އެ މަސައްކަތް އާރުޑީސީއާއި ހަވާލުކޮށްފައިވަނީ ސިޓީ ކައުންސިލުން އެ މަސައްކަތް ކުރަން ނިންމި އަގަށްވުރެ ތިން ގުނަ އަގުބޮޑުކޮށް 84 މިލިއަން ރުފިޔާއަށެވެ. އަދި އެއީ 10 މަސްތެރޭ ނިންމުމަށް ކޮންޓްރެކްޓު ކުރެވުނު މަޝްރޫއެވެ. 

1.7 ކިލޯމިޓަރު ތާރުއަޅައިގެން ޒަމާނީ ފެންވަރަށް ތަރައްގީކުރުމަށް އާރުޑީސީއާއި އަމީނީ މަގުގެ މަސައްކަތް ހަވާލުކުރެވުނު ނަމަވެސް، މުއްދަތަށް އެ މަސައްކަތް ނިންމާލެވިފައެއް ނުވެއެވެ. 

ނުވިތާކަށް މަސައްކަތް ލަސްވެ ދިގުލައިގެންދާތީ އާންމުންގެ ބޮޑެތި ޝަކުވާތަކެއް ވެސް ކޮށްފައި ވެއެވެ. 

ރައީސް އިބްރާހިމް މުހައްމަދު ޞާލިހުގެ ދައުރު ނިމުނުއިރު ވެސް އަމީނީ މަގުގެ މަސައްކަތް ނިންމާލެވިފައި ނުވާއިރު، އެ މަސައްކަތް ނިންމުން މިވަނީ މިހާރު ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ އަތްޕުޅު މައްޗަށް ނުވަތަ އެމަނިކުފާނުގެ ސަރުކާރަށް ހަވާލުވެފަ އެވެ.

އާރުޑީސީން އަމީނީ މަގުގެ މަސައްކަތް ކުރިއަށް ގެންދަނީ

އެގޮތުން މިއަދު އާރުޑީސީން ހާމަކުރީ އަމީނީ މަގުގެ ނުނިމި އޮތް ދެ ސެގްމަންޓު 12 އަދި 13 ނިންމުމުގެ މަސައްކަތް މިއަދު އެ ކުންފުނިން ފަށާފައިވާ ކަމަށެވެ. 

ވީހާވެސް އަވަހަށް އެ މަސައްކަތް ނިންމާ މަގުގެ ބޭނުން ހިފޭނެ ގޮތް ހަދައިދޭނެކަމަށް ސަރުކާރުން ވަނީ ބުނެފައެވެ. 

އޭގެ އިތުރުން ގައުމީ ފެންވަރުގެ މަގުހެދުމުގެ މަޝްރޫއެއް ކުރިއަށް ގެންދިއުމަށް ރައީސް ޑރ މުހައްމަދު މުއިއްޒު ވަނީ ނިންމަވާފައެވެ. އެ މަޝްރޫއުގެ ދަށުން، މާލެ އަދު އަތޮޅުތެރޭގެ ގިނަ ރަށްރަކެއްގައި ޒަމާނީ ފެންވަރުގެ މަގުތައް ހެދިގެންދާނެ އެވެ.