އައްޑޫ ސިޓީގައި ބަހައްޓާފައިވާ އާރުއޯ ޕްލާންޓުގެ ވީއެފްޑީ ޑްރައިވަށް ދިމާވި މައްސަލައަކާއި ގުޅިގެން އައްޑޫ ސިޓީގެ ގުޅިފައިވާ ރަށްތަކުން ފެން ކެނޑިފައިވާއިރު، އެ މައްސަލަ މުޅިން ހައްލުކޮށް އެންމެ ލަސްވެގެން މިރޭ އެ ސިޓީއަށް ފެނުގެ ޚިދުމަތް ފޯރުކޮށްދޭން ފެށޭނެކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓާ މުއާޒް މުހައްމަދު ރަޝީދު ވިދާޅުވެއްޖެ އެވެ.

އާރޯ ޕްލާންޓުގެ ވީއެފްޑީ ޑްރައިވަށް ދިމާވި މައްސަލައަކާއި ގުޅިގެން އައްޑޫ ސިޓީގެ ގުޅިފައިވާ ރަށްތަކުން ފެން ކެނޑިވައިފަވީ މި މަހުގެ 7 ވަނަ ދުވަހުގައެވެ. 

އެހާ ހިސާބުން އެ މައްސަލަ ޙައްލުކުރުމުގެ މަސައްކަތް ފެނަކަ ކޯޕަރޭޝަނުން ވަނީ ފަށާފައެވެ. 

އެގޮތުން އާރޯޕްލާންޓަށް ދިމާވި މައްސަލަ ހައްލުކުރުމަށް ބޭނުންވާ ސާމާނު ރޭގެ ވަގުތެއްގައި އައްޑޫއަށް ވަނީ ގެނެސްފައެވެ.

މާލެއިން ގެންދެވުނު ވީއެފްޑީ ޑްރައިވް ހަރުކުރެވި، ކޮންޓްރޯލް ކޭބަލް ކޮންފިގަރޭޝަން އަދި ސިސްޓަމް ޕްރޮގްރާމިންގެ މަސައްކަތް ރޭ ކުރިއަށް ގެންގޮސްފައިވީ ނަމަވެސް، ފެން ނުލިބި ލަސްވަނީ ރޭ ގެންދިޔަ ވީއެފްޑީގައި ފޯލްޓެއް ހުރުމުން މަސައްކަތް ނުކުރާތީއެވެ. 

އެކަން ޙައްލުކުރުމަށް އިތުރު ވީއެފްޑީ ޑިވައިސެއް މިއަދު 3:00 ގައި ފުވައްމުލަކަށް ދިއުމަށް ހަމަޖެހިފައިވާ ފްލައިޓުން ގެންދެވޭނެކަމަށް ފެނަކަ އެމްޑީ މުއާޒު ވަނީ ވިދާޅުވެފަ އެވެ. އަދި އެ ޑިވައިސް ފޮނުވުމުގެ ކުރިން އިންޖިނިއަރުން ޓެސްޓުކޮށް، މަސައްކަތް ކުރާނެކަން ކަށަވަރުކޮށްފައިވާ ކަމަށް ވެސް މުއާޒު ވިދާޅުވި އެވެ. 

އޭގެ އިތުރުން މުއާޒު ވިދާޅުވީ އެ ޑިވައިސް މިއަދުގެ 5:00 ހާއިރު އައްޑޫ ސިޓީއަށް ގެންދެވި، މައްސަލަ ޙައްލުކުރުމުގެ މަސައްކަތް ފެށިގެންދާނެ ކަމަށެވެ. އަދި މިރޭގެ ވަގުތެއްގައި އައްޑޫ ސިޓީގެ ފެންކެނޑިފައިވާ ރަށްތަކަށް އަލުން ފެން ފޯރުކޮށްދޭން ފެއްޓޭނެކަމަށް އޭނާ ވިދާޅުވި އެވެ. 

އައްޑޫ ސިޓީގެ ގުޅިފައިވާ ރަށްތަކަށް ފެންކެނޑުމާއި ގުޅިގެން ދިމާވާ ދަތިތައް ބަލައި، ހާލަތު ދެނެގަތުމަށް ނެޝަނަލް ޑިޒާސްޓާ މެނޭޖުމެންޓު ސެންޓަރާއި ގުޅިގެން މަސައްކަތް ކުރަމުންދާކަން މުއާޒު ފާހަގަކުރެއްވި އެވެ. 

އޭނާ ވިދާޅުވީ ފެނުގެ ޚިދުމަތް މެދުކެނޑިފައިވީ ނަމަވެސް، ގިނަ ގެތަކުގައި ބޭނުންކުރަމުންދަނީ ވަޅުފެން ކަމަށްވާތީ ނުރައްކާވާ ލެވެލްއަށް ކަންކަން ގޯސްނޫންކަން ފާހަގަކުރެވިފައިވާ ކަމަށެވެ. 

ފެނުގެ ދަތިކަން އެންމެ ބޮޑަށް ދިމާވެފައިވައި ވަނީ ރޯ ހައިސްތަކުގައި ދިރިއުޅޭ ފަރާތްތަކަށް ކަމަށާއި، އެ މީހުންނަށް ކުރިމަތިވާ ތަކުލީފުތައް ކުޑަކޮށްދިނުމަށްޓަކައި މަސައްކަތް ކުރެވެމުންދާކަމަށް މުއާޒު ވިދާޅުވި އެވެ. 

އައްޑޫ ސިޓީއަކީ އެހެން ރަށަކުން ފެން އުފުލައިގެން ފެން ފޯރުކޮށްދޭ ވަރަށްވިރެ އާބާދީ ބޮޑު ތަނަކަށްވާތީ އެކަން ކުރުމުގައި ވެސް ގޮންޖެހުންތަކެއް ހުރިކަމަށް އޭނާ ވިދާޅުވި އެވެ. 

އެއާއެކުވެސް އައްޑޫ ސިޓީއަށް ދިމާވެފައިވާ މައްސަލަ ޙައްލުކުރުމަށް ހުއްޓުމެއްނެތި ފެނަކައިން މަސައްކަތްކުރަމުންދާ ކަމުގެ ޔަގީންކަން ދެއްވާކަމަށް މުއާޒު ވިދާޅުވި އެވެ. އަދި މައްސަލަ ޙައްލުވެ މިރެއާއި ހަމަޔަށް ފެން ލިބިގެންދާނެ ކަމަށް ވެސް އޭނާ ވިދާޅުވި އެވެ. 

އައްޑޫ ސިޓީގައި ބަހައްޓާފައިވާ އާރުއޯ ޕްލާންޓުގެ ވީއެފްޑީ ޑްރައިވަށް ދިމާވި މައްސަލައަކާއި ގުޅިގެން ގުޅިފައިވާ ރަށްތަކުން ފެންކެނޑިފައިވާއިރު، މިކަން ދިމާވާން މެދުވެރިވި ސަބަބަކީ ފެނަކައިގެ ކުރީގެ މެނޭޖުމަންޓުން މެއިންޓަނެންސް މަސައްކަތްތައް ކުރުމުގައި ފަރުވާކުޑަކޮށް، ގަވައިދުން އެ މަސައްކަތް ކުރަމުން ގޮސްފައި ނުވުންކަން ފާހަގަކޮށްލެވެ އެވެ. 

އެނާޖީ އޮތޯރިޓީން ވަނީ އައްޑޫގެ ކަރަންޓުގެ ހާލަތާ ގުޅޭ ރިޕޯޓެއް މިދިޔަ އަހަރުހަދާފަ އެވެ. އަދި އާރޯޕްލާންޓުގެ މެއިންޓަނެސް މަސައްކަތްތައް ކުރިއަށް ގެންދާން ޖެހޭނެގޮތުގެ ރިކޮމެންޑޭޝަންތަކެއް ވެސް ހިމަނާފައެވެ. 

އެހެން ނަމަވެސް ނިމިގެން ދިޔަ ދައުރުގައި އެ ރިޕޯޓުގައި ފާހަގަކޮށްފައިވާ އެއްވެސް ކަމެއް ގަވައިދުން ކުރިއަށް ގެންގޮސްފައި ނުވާކަން މުއާޒު ވަނީ ފާހަގަކުރައްވާފަ އެވެ. އަދި އެ މައްސަލަ ދިމާވާން މެދުވެރިވި މައިގަނޑު ސަބަބީ ވެސް ކަމާގުޅުންހުރި އިދާރާތަކުން އަންގާފައިވާ ގޮތަށް މެއިންޓަނަންސް މަސައްކަތްތައް ކުރިއަށް ގެންދިއުމުގައި ފަރުވާކުޑަކޮށް ދޫކޮށްލާފައި އޮތުންކަމަށް އޭނާ ވިދާޅުވި އެވެ.