ހުސްވެފައިވާ ޖުމްހޫރީ ޕާޓީގެ ނައިބު ލީޑަރުކަމުގެ މަޤާމަށް 4 ބޭފުޅުން ކުރިމަތިލައްވައިފި އެވެ. 

ޖުމްހޫރީ ޕާޓީގެ 5 ނައިބު ލީޑަރުން ތިއްބަވާއިރު، އޭގެ ތެރޭގައި ހިމެނިވަޑައިގަންނަވާ އިގްބާލް އާދަމް އެ ޕާޓީން ވަކިވެވަޑައިގެން ރައީސް އޮފީހުގެ މިނިސްޓަރު ކަމާ ހަވާލުވެވަޑައިގަތުމާ ގުޅިގެން އެ މަޤާމަށް ބޭފުޅަކު ހޮވުމަށް ވަނީ ހުޅުވާލާފަ އެވެ. 

އެ ފުރުސަތުގައި 4 ބޭފުޅުން އެ މަޤާމަށް ކުރިމަތިލައްވާފައިވައިރު، އޭގެ ތެރޭގައި ހިމެނިވަޑައިގަންނަވަނީ: 

1. ޓޫރިޒަމް މިނިސްޓްރީގެ ކުރީގެ ޑެޕިއުޓީ މިނިސްޓަރު އައްސަދު ރިޒާ

2. ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު އަދި ގާސިމް އިބްރާހީމްގެ އެޑްވައިޒަރު އަހްމަދު ނިހާން ހުސައިން މަނިކު

3. ޓްރާންސްޕޯޓް މިނިސްޓްރީގެ ކުރީގެ ސްޓޭޓް މިނިސްޓަރު އަދި ޖޭޕީގެ ތަރުޖަމާން އަލީ ސޯލިހް

4. ޖޭޕީގެ ކައުންސިލް މެންބަރު މުހައްމަދު ސައީދު (ބޮކި ސައީދު)

ހުސްވެފައިވާ ޖޭޕީގެ ލީޑަޝިޕްގެ މަގާމުތަކަށް ބޭފުޅުން ހޮވުމަށް ހަމަޖެހިފައިވަނީ އާދިއްތަ ދުވަހުގެ މެންދުރުފަހު 2:00 ގަ އެވެ. މި އިންތިޚާބުގައި ވޯޓުލާނީ އެ ޕާޓީގެ ކައުންސިލްގައި ހިމެނިވަޑައިގަންނަވާ ބޭފުޅުން ނެވެ. 

ރިޔާސީ އިންތިޚާބުގައި ޖުމްހޫރީ ޕާޓީއަށް ބޮޑު ނާކާމިޔާބީއަކާއި ކުރިމަލިތާން ޖެހުނު ކަމުގައި ވިޔަސް، އެ ޕާޓީގެ ހިންގުން ހަރުދަނާކޮށް، ސިޔާސީ މަސައްކަތް ވަރުގަދަ ކުރައްވާނެ ކަމަށް ޕާޓީގެ ލީޑަރު ޤާސިމް އިބްރާހިމް ވަނީ ވިދާޅުވެފަ އެވެ. 

އެގޮތުން ކުރިއަށް އޮތް ރައްޔިތުންގެ މަޖިލީހުގައި ޖުމްހޫރީ ޕާޓީން ވާދަކުރާނެ ކަމަށާއި، އެކުގައި ވާދަކުރުމަށް އެ ޕާޓީން ވަނީ ދާދިފަހުން އެމްޑީޕީއާއި އެކު މަޝްވަރާ ކުރިއަށް ގެންގޮސްފަ އެވެ. 

ހުސްވެފައިވާ ޕާޓީގެ ލީޑަޝިޕްގެ މަގާމުތަކަށް ބޭފުޅުން އިންތިޚާބު ކުރެވިގެން ދިއުމާއި އެކު، ޕާޓީގެ މަސައްކަތްތައް ފެށިގެންދާނެ ކަމަށް ޖޭޕީން ވަނީ ބުނެފައެވެ.