އަންނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލިހުން މިއަދު ފާސްކޮށްފިއެވެ. 

ރައްޔިތުންގެ މަޖިލިހުގެ ޖަލްސާގައި މިއަދު އެ ބަޖެޓް ފާސްކޮށްފައިވަނީ ބަޖެޓު ފާސްކުރުމަށް އެހި ވޯޓުގައި މަޖިލިހުގެ ތަޅުމުގައި ތިއްބެވި 68 މެންބަރުންގެ ވޯޓާއެކުއެވެ. 

މިއަދު ރައްޔިތުންގެ މަޖިލިހުން ފާސްކުރި އަންނަ އަހަރަށް ލަފާކުރާ ދައުލަތުގެ ބަޖެޓު ފާސްކޮށްފައިވަނީ، ބަޖެޓު ކޮމިޓީން ފޮނުވާފައިވާ ގޮތަށެވެ. 

މަޖިލީހުގެ މެޖޯރިޓީ އޮންނަ އެމްޑީޕީން ވަނީ ކޮމެޓީން ފޮނުވާފައިވާ ގޮތަށް ބަޖެޓް ފާސް ކުރަން ޕާލިމެންޓްރީ ގްރޫޕްގައި ތްރީލައިން ވިޕެއް ނެރެފައެވެ.

އަންނަ އަހަރަށް ލަފާކޮށް މަޖިލީހަށް 49.5 ބިލިއަން ރުފިޔާގެ ބަޖެޓަށް ހުށެހެޅި ނަމަވެސް ކޮމިޓީން ފާސްކޮށްފައިވަނީ 300 މިލިޔަން ރުފިޔާ އިތުރުކޮށް 49.8 ބިލިއަން ރުފިޔާގެ ބަޖެޓެކެވެ.

އެމްޑީޕީގެ މެޖޯރިޓީ އޮންނަ ކޮމިޓީން ބަޖެޓަށް ގެނައި އެންމެ ބޮޑު އެއް ބަދަލަކީ ރައީސް ޑރ. މުހައްމަދު މުއިއްޒުގެ ސަރުކާރުން ބޭނުންވެގެން ފުށިދިއްގަރުފަޅުގެ މަޝްރޫއު ހިންގުމަށް ކަނޑައެޅި 400 މިލިއަން ރުފިޔާ ކަނޑާލައި އެހެން މަޝްރޫއުތަކަށް ބަހާލުމެވެ. އެ މަޝްރޫއު ހުށަހަޅާފައިވަނީ ޕީއެސްއައިޕީ މަޝްރޫއެއްގެ ގޮތުގައެވެ.

ފުށިދިއްގަރުފަޅު ހިއްކަން ފެށުމަކީ ރައީސް ޑރ. މުއިއްޒުގެ ވެރިކަމުގެ ފުރަތަމަ 100 ދުވަހަށް ރާވަވާފައިވާ ކަމެކެވެ. އެގޮތުން މާލެ ސަރަހައްދުން ބޯހިޔާވަހިކަން ފޯރުކޮށްދިނުމަށް ރައީސް ޑރ. މުއިއްޒުގެ ސަރުކާރުން ހިންގުމަށް ހަމަޖެހިފައިވާ އެންމެ ބޮޑު މަޝްރޫއަކީ ފުށިދިއްގަރުފަޅު ހިއްކާ އެ ތަނުން ރައްޔިތުންނަށް ބޯހިޔާވަހިކަން ފޯރުކޮށްދިނުމެވެ. ނަމަވެސް ކޮމިޓީން ވަނީ މި ފައިސާ ބަޖެޓުން އުނިކޮށް ހުޅުމާލެ، ގުޅީފަޅު އަދި ގިރާވަރުފަޅު ހިއްކާއި އެ ތަންތަނުގައި ފެނާއި ނަރުދަމާ އަދި މަގު ހެދުމާއި އަސާސީ ޚިދުމަތްތައް ގާއިމުކުރުމަށް ބަޖެޓަށް ފައިސާ އިތުރުކޮށްފައެވެ.