ރައީސުލްޖުމްހޫރިއްޔާ ޑރ މުހައްމަދު މުޢިއްޒު ތުރުކީވިލާތަށާއި، ކޮޕް28 ގައި ބައިވެރިވެވަޑައިގެންނެވުމަށް ދުބާއީއަށް ކުރެއްވި ރަސްމީ ދަތުރުފުޅުގެ ޚަރަދުތައް ރައީސް އޮފީހުން ހާމަކޮށްފިއެވެ. 

މީގެ ކުރީ ސަރުކާރުތަކުގައި ރައީސުލްޖުމްހޫރިއްޔާ ކުރައްވާ ރަސްމީ ދަތުރުފުޅުތަކުގެ ޚަރަދުތައް ލިބެނީ އެ މަޢުލޫމާތު ހޯދުމަށް އާރްޓީއައި ލައިގެން އެދޭ ފަރާތްތަކަށް އެކަންޏެވެ. 

ނަމަވެސް، ރައީސް ޑރ މުޢިއްޒުގެ ސަރުކާރުގެ ކަންކަން ވީހާވެސް ހާމަކަން ބޮޑުގޮތެއްގައި ކުރިއަށްގެންދެވުމަށް، އެމަނިކުފާނު ވަނީ އެމަނިކުފާނު ކުރައްވާ ހުރިހާ ރަސްމީ ދަތުރުފުޅެއްގެ ޚަރަދުތައް ގިނަވެގެން 15 ދުވަހުގެ ތެރޭގައި ހާމަކުރެއްވުމަށް ނިންމަވާފައެވެ.

އެގޮތުން، އެންމެ ފަހުން ތުރުކީވިލާތަށާއި ކޮޕް28 ގައި ބައިވެރިވެވަޑައިގެންނެވުމަށް ދުބާއީއަށް ކުރެއްވި ރަސްމީ ދަތުރުފުޅުގެ ޚަރަދުތަކުގެ ތަފްސީލް ވަނީ ހާމަކޮށްފައެވެ.

• ފަސްޓް ކްލާސް ހަތަރު ޓިކެޓް-- -/683,229.36ރ

• ބިޒްނަސް ކްލާސް 12 ޓިކެޓް-- -/1,539,239.82ރ

• އިކޮނޮމީ ކްލާސް 12 ޓިކެޓް-- -/232,086.42ރ

ދެ ގައުމަށް ރައީސް މުޢިއްޒާއި ސަރުކާރުގެ ވަފުދު ކުރެއްވި ދަތުރުފުޅުގެ ޓިކެޓުގެ ޖުމްލަ އަގަކީ، -/2,454,555.60 ރުފިޔާއެވެ. 

މީގެ އިތުރުން ތުރުކީވިލާތަށް ކުރެއްވި ދަތުރުގެ ޕޮކެޓް މަނީގެ ގޮތުގައި 22 ބޭފުޅުންނަށް 217,828 ރުފިޔާ ޚަރަދުކޮށްފައިވާއިރު، އިންސިޑެންޓަލް ޚަރަދުގެ ގޮތުގައި 41,548.80 ރުފިޔާ، ދެ ކަންތަކަށް ޖުމްލަ 259,376.80 ރުފިޔާ ޚަރަދުކޮށްފައިވެއެވެ. 

ރައީސް އޮފީހުން ބުނީ ތުރުކީވިލާތަށް ރައީސުލްޖުމްހޫރިއްޔާގެ އަރިހުގައި ވަޑައިގެންނެވި ވަފުދުގެ ހުރުމާއި ފަރިއްކޮޅު ޚަރަދާއި އެތެރޭގެ ދަތުރުފަތުރުގެ ޚަރަދުތައް ހަމަޖައްސައިދިނީ އެ ގައުމުގެ ސަރުކާރުން ކަމަށެވެ. 

އަދި އިސްތަންބޫލް-އަންކާރާ-އިސްތަންބޫލްގެ ފްލައިޓް ދަތުރު ހަމަޖައްސައިދިނީ ވެސް އެ ޤައުމުގެ ސަރުކާރުން ކަމަށެވެ.

• ޕޮކެޓް މަނީ (19 ބޭފުޅުން) -- 182,546 ރ

• ފަރިއްކޮޅު ޚަރަދު (9 ބޭފުޅުން) -- 145,944.76 ރ

• ދަތުރުފަތުރު ޚަރަދު -- 75,488.38 ރ

• އެކޮމޮޑޭޝަން ޚަރަދު (9 ބޭފުޅުން) -- 168,892.06 ރ

• ސިމްކާޑު ޚަރަދު -- 26,412.59 ރ

• ދުބާއީގައި ދިރިއުޅޭ ދިވެހި ރައްޔިތުންނާ ބައްދަލު ކުރެއްވުން -- 155,182.21 ރ

• އިންސިޑެންޓަލް -- 20,766.72 ރ 

ދުބާއީއަށް ކުރެއްވި ދަތުރުގައި ވަޑައިގެންނެވި 10 ބޭފުޅުންގެ ހުރުމާއި ފަރިއްކުޅުގެ ޚަރަދުތައް ޔޫއޭއީ ސަރުކާރުން ހަމަޖައްސައިދީފައިވާއިރު އެ ދަތުރަށް ޖުމްލަ 775,232.72 ރުފިޔާ ވަނީ ޚަރަދުކޮށްފައެވެ. 

ރައީސް އޮފީހުން ޢާއްމުކޮށްފައިވާ މަޢުލޫމާތުގައިވާގޮތުން، ތުރުކީވިލާތަށާއި ދުބާއީއަށް ކުރެއްވި ދަތުރުފުޅަށް ޖުމްލަ 3,489,165.12 ރުފިޔާ ވަނީ ޚަރަދުކޮށްފައެވެ.