ފިޔާގެ އަގު ހިފެހެއްޓުމެއް ނެތި މަތިވަމުންދާ މައްސަލައަށް ޙައްލު ހޯދުމަށް ސަރުކާރު ކުންފުނި އެސްޓީއޯއިން ކޮންޓްރޯލު ރޭޓެއްގައި ފިޔާ އެތެރެކޮށް ހޯލްސޭލްކޮށް ވިއްކަން ފަށައިފި އެވެ.

އެކަން އެންގުމަށް އެސްޓޯއީއިން ނެރުނު ބަޔާނެއްގައި ބުނެފައިވަނީ އެ ކުންފުނީގެ ހިސާބުތައް ދައްކާގޮތުގައި އިންޑިއާގެ ބާޒާރުގައި އޮގަސްޓުމަހުން ފެށިގެން ފިޔާގެ އަގު އުފުލެމުން އައިސް އޮކްޓޯބަރު މަހާއި ހަމައަށް އައިރު ރާއްޖޭގެ ބާޒާރަށް ވެސް އެކަމުގެ އަސަރުކޮށް 400ރ އަށް ފިޔާ ބަސްތާއެއްގެ އަގު އުފުލިފައިވާކަން ފާހަގަކުރެވިފައިވާ ކަމަށެވެ.

އެއާއެކު ރާއްޖޭގެ ބާޒާރުގައި ފިޔާގެ އަގު މަތިވަމުން ގޮސް ޑިސެމްބަރު މަހާ ހަމައަށް އައިއިރު ފިޔާ ބަސްތާއެއްގެ އަގު 800ރ – 900ރ ދެމެދުގެ އަގަކަށް އުފުލިފައިވާ ކަމަށާއި ފިޔާގެ އަގު މި މިންވަރަށް އުފުލުމުން އެކަމުގެ ޝަކުވާ އެސްޓިއޯއަށް ވެސް ލިބެމުންދާ ކަމަށެވެ.

Advertisement

އެސްޓީއޯއިން ބުނީ އެ ކުންފުނި ވުޖޫދުވުމުގެ މައިގަނޑު އެއް އަސްލަކީ އާއްމު ކާބޯތަކެތީގެ ރައްކާތެރިކަން ރައްޔިތުންނަށް ކަށަވަރުކޮށްދިނުން ކަމަށެވެ.

އެހެންކަމުން އަސާސީ ކާބޯތަކެތަކެތި އެތެރެކުރުމުގައި ރާއްޖެއަށް ހުރަހެއް ނެތްކަން ސަރުކާރުން ކަށަވަރުކޮށްދީފައިވާ ފަދައިން ޢާއްމުންގެ ކަންބޮޑުވުމަށް ހައްލު ހޯދައިދިނުމަށް އެސްޓީއޯއިން ފިޔަވަޅުތައް އަޅާފައިވާނެކަމަށް އެ ކުންފުނިން ނެރުނު ބަޔާނުގައި ވަނީ ބުނެފައެވެ.

އެގޮތުން ބާޒާރުގައި ފިޔާގެ އަގު ކޮންޓްރޯލް ކުރުމަށާއި ފިޔާ ލިބޭނެ ކަމުގެ ޔަގީންކަން ކަށަވަރުކުރުމަށް އެސްޓީއޯއިން މިހާރު ރާއްޖޭގެ ބާޒާރަށް ބޭނުންވާ މިންވަރު ދެނެގަނެ، ފިޔާ އެތެރެކުރަން ފަށާފައިވާކަމަށް އެސްޓީއޯއިން ބުނެއެވެ.

އެކަމުގެ ތަފްސީލު ބަޔާންކޮށް އެސްޓީއޯއިން ބުނީ ފުރަތަމަ ޝިމްޕްމަންޓުގެ ގޮތުގައި 4500 ބަސްތާގެ ފިޔާ އެތެެރެކުރެވިފައިވާ ކަމަށެވެ.

އެތެރެކުރެވޭ ފިޔާ އާއްމުންނަށް ވިއްކާނީ ވެސް އާންމު ވިޔަފާރިތަކުން ކަމަށާއި، ވިޔަފާރިތަކަށް ފިޔާ ދޫކުރާނީ އެސްޓީއޯއިން ކަނޑައަޅާފައިވާ މެކްސިމަމް އަގައްވުރެ ވިއްކާ އަގު ބޮޑު ނުކުރުމަށް އިލްތިމާސްކޮށް ޝަރުތުކުރުމަށް ފަހުގައިކަމަށް އެ ކުންފުނިން ބުނެއެވެ.

އެސްޓީއޯއިން ވަނީ ފިޔާ ކިލޯއެއްގެ އަގު 20 ރުފިޔާއަށް ވުރެ ބޮޑު ނޫން އަގެއްގައި ވިއްކުމަށް އިލްތިމާސްކޮށްފައެވެ. 

އެސްޓީއޯއިން އިމްޕޯޓް ކޮއްފައިވާ ފިޔާގެ ފުރަތަމަ ޝިޕްމެންޓް މިހާރު ބާޒާރަށް ނެރެފައިވާއިރު އެ ކުންފުނީގެ އަމާޒަކީ މާކެޓް ސްޓޭބަލައިޒް ކުރުންކަމުގައިވުމުން ފިޔާ ސަޕްލައި ޝޯޓޭޖް މައްސަލައަށް ހައްލު ލިބި ބާޒާރުގެ އަގު ކޮންޓޮރޯލްވަންދެން އެ ކުންފުނިން ރާއްޖޭގެ ބާޒާރަށް ބޭނުންވާ ފިޔާ ސަޕްލައި ފޯރުކޮއްދޭނެކަމަށް އެސްޓީއޯއިން ވަނީ ބުނެފައެވެ.