ހުޅުމާލޭގެ ދެވަނަ ފިޔަވަހީގައި ސަރުކާރުން އަލަށް އިމާރާތްކުރާ ސުކޫލުގެ ބިންގާ އަޅުއްވައިފި އެވެ. 

ހުޅުމާލޭގެ ސުކޫލުތަކަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން ސަރުކާރުން އެޅުމަށް ހަމަޖެހިފައިވާ ސުކޫލުތަކުގެ ތެރެއިން، ފޭސް-2 ގައި އަޅާ ދެވަނަ ސުކޫލުގެ ބިންގާ މިއަދު އަޅުއްވާދެއްވީ ރައީސުލްޖުމްހޫރިއްޔާ ޑރ މުހައްމަދު މުއިއްޒެވެ. 

މި ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ ވަޒީރުންނާއި އިސްވެރިން ބައިވެރިވެވަޑައިގެންނެވި އެވެ.

Advertisement

މި ސުކޫލުގައި 54 ކްލާސްރޫމާއި، ހޯލަކާއި ސުކޫލުތަކުގައި ހިމެނޭ އެހެނިހެން ވަސީލަތްތަކުގެ އިތުރުން ކުޅިވަރު ކުޅޭނެ ޓާފު ދަނޑެއް ހިމެނެއެވެ. 

ގާތްގަނޑަކަށް 1700 ކުދިންގެ ޖާގައިގެ މި ސުކޫލު އިމާރާތް ކުރަނީ ކޮންޓްރެކްޓާ ފައިނޭންސްގެ ދަށުން އާރު.ސީ.ސީއާއި ހަވާލުކޮށްގެން ނެވެ. 

ސުކޫލުގެ އަމަލީ މަސައްކަތް ޖެނުއަރީ މަސްތެރޭ ފެށުމަށް ހަމަޖެހިފައިވާއިރު، މަސައްކަތް ނިންމުމަށް ހަމަޖެހިފައިވަނީ 18 މަސް ދުވަސް ތެރޭގަ އެވެ. 

ހުޅުމާލޭގެ ދެވަނަ ފިޔަވަހީގައި އާ ސުކޫލެއް އިމާރާތްކުރެވި ޚިދުމަތް ދޭން ފެށުމާއެކު، ހުޅުމާލޭ ސުކޫލުތަކަށް ދިމާވެފައިވާ ޖާގައިގެ ދަތިކަމަށް ކޮންމެވެސް ވަރެއްގެ ޙައްލެއް ލިބި ފޭސް ދޭއްގައި ދިރިއުޅޭ ކުދިންނާއި ބެލެނިވެރިންނަށް ވެސް ބޮޑެތި ފަސޭހަތަކެއް ލިބިގެންދާނެ ކަމަށް ސަރުކާރުން ވަނީ ބުނެފަ އެވެ.