ރައީސުލް ޖުމުހުރިއްޔާ އަޒުލްކުރުމަށް މަސައްކަތް ކުރުމަކީ ޤައުމަށް ޤައްދާރުވުންކަމަށް އެމްޑީޕީ ދޫކުރައްވާ މިވަގުތު ވެރިކަންކުރާ ޕާރޓީ ޕީއެންސީ އާއި ރޭ ގުޅިވަޑައިގެންނެވި މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.

މަވޯޓާ ޝަރީފް މިގޮތައް ވިދާޅުވެފައި ޕީއެންސީއިން ރޭ ބޭއްވި ބޮޑު ޖަލްސާގައި އެމްޑީޕީ ދޫކުރައްވާ ވެރިކަން ކުރާ ޕާރޓީއަށް ސޮއިކުރައްވާ ޕީއެންސީ އާއި ގުޅިވަޑައިގެންނެވި 13 މެމްބަރުންގެ ފަރަތުން ވާހަކަފުޅު ދައްކަވަމުންނެވެ.

މަވޯޓާ ޝަރީފްގެ ވާހަކަގައި ފާހަގަ ކުރެއްވި ގޮތުގައި އެބޭފުޅުން އެމްޑީޕީ ދޫކުރައްވާ ޕީއެންސީ އާއި ގުޅިވަޑައިގެންނެވީ މިވަގުތު އެމްޑީޕީގެ ޕީޖީ ގުރޫޕުގެ ޢަމަލްތައް ހުރިގޮތުން އެބޭފުޅުނަށް އެ ޕާރޓީގައި ތިބުމަށް ނުފެނުމުން ކަމަށެވެ. މިގޮތުން ޝަރީފް އެންމެ ބޮޑަށް ފާހަގަކުރެއްވި އެއް ކަމަކީ އަދުގެ ރައީސުލް ޖުމުހުރިއްޔާ ޑރ. މުހައްމަދު މުއިއްޒުގެ ކެބިނެޓަށް ރުހުން ދިނުމުގެ މައްސަލަ އާއި މެދު އެމްޑީޕީގެ ޕީޖީ ގްރޫޕުން ޢަމަލުކުރައްވަމުން ގެންދަވާގޮތެވެ.

ޝަރީފް ފާހަގަކުރެއްވި ގޮތުގައި ރައީސް ޑރ. މުހައްމަދު މުއިއްޒުގެ ކެބިނެޓަށް ރުހުން ދިނުމުގައި ބަލަން ޖެހޭ ކަންތައްތަކަށް ބެއްލެވުމަށްފަހު ރުހުން ދޭން ޖެހޭ ފަރާތްތަކަށް ރުހުންދީ އަދި ރުހުން ދޭން ނުޖެހޭ ފަރާތެއް ވާނަމަ އެކަންވެސް މަޖިލީހުން ލަހެއްފަހެއްނެތި ނިންމަން ޖެހެއެވެ. ނަމަވެސް އެމްޑީޕީގެ ޕީޖީ ގްރޫޕުން މިކަމުގައި ޢަމަލްކޮށްފައި ވަނީ ވަރަށް ޣައިރު ގާނޫނީ ގޮތަކަށް ކަމަށް ޝަރީފް ސިފަކުރެއްވިއެވެ.

މީގެ އިތުރުންވެސް ޝަރީފް ފާހަގަކުރެއްވި ގޮތުގައި ރޭ ޕީއެންސީ އާއި ގުޅިވަޑއިގެނނެވި 13 އިއްޒަތްތެރި މެމްބަރުންނަކީވެސް ޤައުމީ ފިކުރު އިސްކުރައްވާ ވެރިކަންކުރާ ޕާރޓީ ޕީއެންސީ އާއި ގުޅިވަޑައިގެންނެވި މެމްބަރުންނެވެ.