މިދިޔަ ސަރުކާރުންނާއި އޭރު ފެނަކައިގެ މެނޭޖްމަންޓުން ހިންގާފައި އޮތީ ވަރަށް ބޮޑު ޖަރީމާ އެއް ކަމަށް ފެނަކަ ކޯޕަރޭޝަން ގެ މެނޭޖިން ޑިރެކްޓަރ މުއާޒް މުހައްމަދު ރަޝީދު ވިދާޅުވެއްޖެ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަތޮޅު ތެރެއަށް ކުރައްވަމުން ގެންދަވާ ދަތުރުފުޅުގައި ބ.ކެންދޫގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން މުއާޒް ވިދާޅުވީ، އޭނާ ފެނަކައާ ހަވާލުވީ 4.3 ބިލިއަން ރުފިޔާގެ ދަރަންޏާ އެކީ ކަމަށެވެ.

މަހެއްގެ މައްޗަށް ފެނަކައަށް ލިބެނީ ގާތްގަނޑަކަށް 120 މިލިއަން ރުފިޔާކަން ފާހަގަކުރައްވަމުން މުއާޒް ވިދާޅުވީ ވެރިކަން ބަދަލުވިއިރު ފެނަކައިގައި 8،000 އެއްހާ މުވައްޒަފުން މަސައްކަތް ކުރަމުން އައި ކަމަށާއި، ކޮންމެ މަހަކު މުވައްޒަފުންގެ މުސާރައިގެ ގޮތުގައި އެކަނިވެސް 86 މިލިއަން ހަރަދު ކުރަން ޖެހޭ ކަމަށެވެ. އަދި ބާކީ އޮތް އެއްޗަކުން ފެނަކަ ހިންގުމުގެ ހަރަދާއި އެހެނިހެން ހަރަދުވެސް ކުރަން ޖެހޭކަން ވެސް މުއާޒް ވިދާޅުވިއެވެ.

މުއާޒް ވިދާޅުވީ، މާކެޓްގައި، 23 މިލިއަން ރުފިޔާއަށް ނިމޭ އޮފީސް އިމާރާތެއް އެޅުމަށް 55 މިލިއަން ރުފިޔާ ޚަރަދުކުރިއިރު އެއިމާރާތުގެ 60 ޕަސެންޓް ނުނިމޭ ކަމަށެވެ. އަދި އިން ހައުސްކޮށް ހިންގި ޕްރޮޖެކްޓްތަކުން ކުރީގެ ސަރުކާރުންނާއި މެނޭޖްމަންޓުން ވެފައިވަނީ ވަރަށް ބޮޑު ހިޔާނާތެއް ކަމަށާއި، މިއީ ވަރަށް ބޮޑު އިހުމާލެއް ކަން ވެސް މުއާޒް ފާހަގަކުރެއްވިއެވެ.

މުއާޒް ވަނީ ނިމިދިޔަ 2023 ވަނަ އަހަރު އެކަނިވެސް ދަތުރުފަތުރުގެ ޚަރަދުގެ ގޮތުގައި 117 މިލިއަން ރުފިޔާ ހޭދަ ކޮށްފައިވާ ކަމަށާއި ކޮންމެ އަހަރަކުވެސް އެވަރެޖްކޮށް މި އަދަދު ހުންނަނީ 100 މިލިއަނުގައި ކަން ފާހަގަކުރައްވާފައެވެ.

ފެނަކައޭ ބުނީމަ ރައްޔިތުންނަށް ސިފަ ވަނީ ކޮރަޕްޝަން ކަމަށާއި މިކަން ރަނގަޅު ކުރުމަށް މަސައްކަތް ކުރަމުން ގެންދަވާކަމަށް ވެސް މުއާޒް ގެ ވާހަކައިގައި ވިދާޅުވިއެވެ.

ރައީސް ޑރ.މުއިއްޒު އަތޮޅު ތެރެއަށް ކުރައްވާ ދަތުރުފުޅު ތެރޭގައި ވެސް ބައެއް ރަށްތަކުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން އެމަނިކުފާނު ވެސް ވަނީ އެންމެ ހާލުގައި އޮތީ ފެނަކަ ކަން ފާހަގަކުރައްވާފައެވެ.