ސްރީލަންކާގެ މަތީ ތަޢުލީމުދޭ މަރުކަޒެއް ކަމަށްވާ އެޕެކްސް އެޑް އިން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ހުއްދަ ދީފައިވާ ކަމަށް ބުނެ ދޫކަރަމުން ދަނީ އަސްލު ނޫން ލިޔުމެއް ކަމަށް އެމްކިއުއޭ އިން ބުނެފިއެވެ.
މިއަދު އެމްކިއުއޭއިން ނެރުނު ބަޔާނުގައި ވަނީ އެޕެކްސް އެޑް އާ ގުޅޭގޮތުން އެ އޮތާރިޓީއަށް ޝަކުވާ ހުށަހަޅާފައިވާކަމަށެވެ. އަދި އެޕެކްސް އެޑް މަރުކަޒުގެ ކޯސްތަކުގައި އެމްކިއުއޭއިން ހުއްދަ ދީފައިވާކަމަށް ބުނެ އިސްތިހާރު ކޮށްފައިވާތީ އެކަން އެގޮތަށް ނުކުރުމަށް ތަކުރާރުކޮށް އަންގާފައިވާނެ ކަމަށެވެ.
އެމްކިއުއޭ އިން ހާމަ ކުރެއްވި ގޮތުގައި އެޕެކްސް އެޑް އަކީ ސްރީލަންކާގެ ޓެކްނިކަލް އެންޑް ވޮކޭޝަނަލް އެޑިއުކޭޝަން ކޮމިޝަން (ޓިވެޓް) އިން ވެސް ހުއްދަ ނުދޭ ސަނަދެއް ދޫކޮށްގެން ކުރިން ސަސްޕެންޑުކޮށް، ފަހުން އަލުން ހުއްދަ ދީފައިވާ މަރުކަޒެކެވެ.
އެމްކިއުއޭ އިން ދޫކުރާ ޕްރޮގްރާމް ޤަބޫލުކުރާކަމުގެ ލިޔުމަކީ ދަރިވަރަކު ހުށަހަޅާ މައުލޫމާތުގެ މައްޗަށް ބިނާކޮށް ގިނަ ކަންތައްތަކެއް ބެލުމަށްފަހު ސީދާ އެ ދަރިވަރަކަށް ދޫކުރާ ލިޔުމެކެވެ.
ރާއްޖެއިން ބޭރަށް ކިޔަވަންދާ ދަރިވަރުން އެމްކިއުއޭއަށް ހުށަހަޅައިގެން ކިޔަވަން ފެށުމުގެ ކުރިން އެ ދަރިވަރަކު ކިޔވާ ޕްރޮގްރާމަކީ މޯލްޑިވްސް ނެޝަނަލް ކޮލިފިކޭޝަން ޕްރޮގްރާމް (އެމް.އެން.ކިއު.އެފް) އަށް ޝަރުތު ހަމަވާ ޕްރޮގްރާމެއް ކަން ކަށަވަރުކޮށް ތަޢުލީމް ހާސިލުކުރާ މަރުކަޒަކީ އެ ޤައުމުގެ މަތީ ތަޢުލީމާ ތަމްރީނާ ބެހޭ ވުޒާރާގައި ރަޖިސްޓްރީ ކޮށްފައިވާ ތަނެއްކަން ކަށަވަރު ކުރުމަށް އެމްކިއުއޭ އިން ވަނީ އިލްތިމާޒު ކުރައްވާފައެވެ.
Advertisement
This content is created and paid for by advertisers and does not involve Voice Journalists
