ހައްޖުގެ އަޅުކަމުގައި ދިވެހި ހައްޖުވެރިންނަށް ހުރި އިންތިޒާމުތަކަށް ފާޑުކީ އޭނާ އެދުނު ގޮތަށް ކޮރަޕްޝަނަށް މަގުފަހިވާހެން ކަންކަން ނުކުރުމުން ކަމަށް ހައްޖު ކޯޕަރޭޝަނުގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.

ޝަކީލް މިހެން ވިދާޅުވެފައިވަނީ، މިއަހަރު ހައްޖުގެ އަޅުކަށް ދިޔަ މުހައްމަދު ނިޒާމް ނަމަކަށް ކިޔާ މީހަކު ފޭސްބުކުގައި ކުރި ޕޯސްޓެއްގައި، މިއަހަރު ހައްޖުގެ ކަންކަމުގައި މައްކާގައި ދިވެހިންނަށް ހަމަޖައްސާފައި އިންތިޒާމުތަކާ ގުޅޭ ގޮތުން ފާޑުކިއުންތައް އަމާޒުކޮށްފައި ފޭސްބުކުގައި ކޮށްފައިވާ ޕޯސްޓަކަށް ކުރި ކޮމެންޓެއްގައެވެ. 

ނިޒާމް ގެ ޕޯސްޓުގައި އޭނާ ވަނީ ހައްޖުވެރިންގެ ކަންކަން ބަލަހައްޓާ ޓީމުގެ ކޮމާންޑުތަކާ ބައެއް ހައްޖުވެރިން ހިލާފުވުމުން ކޮންޓްރޯލު ގެއްލި ވަގުތު ބޭކާރުވި ކަމަށާ، ހައްޖަށްދާ މީހުންނަށް އެހީވުމަށް ހަމަޖައްސާފައި ތިބީ، ތަންދޮރު ނުދަންނަ އެހީތެރިން ކަމަށާއި، ހައްޖަށް ދިޔުމަށް ދެއްކި ފައިސާއާ އެއް ފެންވަރުގެ ހިދުމަތެއް ނުލިބުނު ކަމަށް ބުނެފައެވެ. 

އަދި މީގެ އިތުރުން، ހައްޖު ކޯޕަރޭޝަނުގެ ޓީމުން، އެ ކުންފުނި އިސްތިހާރުކުރުމަށް ސައުދީގެ ގަވައިދާ ހިލާފަށް އުޅޭކަމަށް ވެސް ތުހުމަތުކޮށްފައި ވެއެވެ. 

އެ ޕޯސްޓަށް ރައްދު ދެއްވަމުން ޝަކީލް ވިދާޅުވީ ނިޒާމްގެ ޝަކުވާތަކުގެ އަސްލަކީ އަމިއްލަ މަންފާއަށްޓަކައި، އޭނާ އެދެމުން އައި ގޮތަށް ކޮރަޕްޝަނަށް މަގުފަހިވާނޭހެން އެއްވެސް ކަމެއް އެ ކޯޕަރޭޝަނުން ހަމަޖައްސައި ނުދިނުން ކަމަށެވެ. 

އެގޮތުން، ނިޒާމްގެ ބައްޕަ ހައްޖަށް ދިއުމަށް ލިބުނު ފުރުސަތުގައި އެހީވުމަށް، އޭނާ އާއި އޭނާގެ އަންހެނުން ހައްޖަށް ދިއުމުގެ ފުރުސަތު އުސޫލުން ބޭރުން ހަމަޖައްސައިދިނުމަށް އޭނާ ހުށަހެޅި ކަމަށާ، ހައްޖު ކޯޕަރޭޝަނުން ހުޅުވާލި ބިޑަކަށް ކުރިމަތިލުމަށްޓަކާ ވެސް އޭނާ ގުޅި ކަމަށް ޝަކީލު ވިދާޅުވިއެވެ.

"މި ސަބަބާހުރެ ނިޒާމްގެ ބައްޕަގެ ބަދަލުގައި މި އަހަރު ހައްޖަށް އައިސް ހުރެ މެނޭޖްމަންޓަށް ކޮޕަރޭޝަންގެ އެކި ކަހަލަ ތުހުމަތުތަައް ކުރަމުންދާއިރު އަޅުގަނޑު އެދެނީ ނިޒާމް އަވަހަށް ތައުބާވެ ހަގީގަތާ ހިލާފް ވާހަކަ ދެއްކި ކަމަށްޓަކާ ރައްޔިތުންގެ ކިބައިން މައާފަށް އެދެން،" ޝަކީލް ވިދާޅުވި އެވެ.