ޣައްޒާގެ ހަނގުރާމައާ ގުޅޭ ކަންކަމުގައި މަސައްކަތް ކުރުމަށް އެމެރިކާއިން ކަނޑައަޅާފައިވާ، ޚާއްސަ ސްޓޭޓް ޑިޕާޓްމަންޓުގެ އެންމެ އިސް އޮފިޝަލް އިސްތިއުފާ ދީފިއެވެ.

ސީއެންއެން އިން ރިޕޯޓުކުރިގޮތުގައި، އެމެރިކާގެ ސްޓޭޓް ޑިޕާޓްމެންޓުގެ އިސް އޮފިޝަލް، އެންޑްރޫ މިލާ އޭނާގެ މަގާމު ދޫކޮށްލަން ނިންމާފައިވަނީ އަމިއްލަ ސަބަބުތަކާ ހުރެއެވެ.

ބޭރުގެ ބައެއް މީޑިއާ ތަކުން ރިޕޯޓުކޮށްފައިވާ ގޮތުގައި، މިލާ މަޤާމުން އިސްތިއުފާ ދިނީ، އޭނާގެ އާއިލާއާއެކު ވަގުތު ހޭދަކުރުމަށެވެ.

އެމެރިކާގެ އިސް އޮފިޝަލް މިލާ އިސްތިއުފާ ދިން އިރު، އިސްރާއީލުން ޣައްޒާގައި ހިންގަމުންދާ ޤަޠުލުޢާންމު ހިންގުމާ ހަވާލުވެ ތިބި ގިނަ ބަޔަކު ދަނީ އިސްތިއުފާ ދެމުންކަން ފާހަގަކޮށްލެވެއެވެ. އެގޮތުން އިސްރާއީލުން އެކުލަވާލި ނަތަންޔާހޫގެ ހަނގުރާމަ ކެބިނެޓުގެ އިސް ދެ އޮފިޝަލަކުވެސް ވަނީ އިސްތިއުފާ ދީފައެވެ. އަދި މިކަމާ ގުޅިގެން، ނަތަންޔާހޫ ވަނީ ހަނގުރާމަ ކެބިނެޓު އުވާ ލައިފައެވެ.

އިސްރާއީލުން ފަލަޞްޠީނުގައި ހިންގަމުންދާ ލާއިންސާނީ ޖަރީމާ ތަކުގައި، މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް ހަމައެކަނި ޣައްޒާއިން ވަނީ 37,431 މީހުން ޝަހީދުވެފައެވެ. މީގެ ތެރޭގައި 15,000 އަށް ވުރެ ގިނަ ކުޑަކުދިން ހިމެނެއެވެ. އިސްރާއީލުން ހުއްޓުމެއްނެތި ދެމުންދާ ޙަމަލާ ތަކުގައި، ޣައްޒާއިން 85,653 މީހުން ޒަޚަމް ވެފައިވާއިރު، ގެއްލިފައިވާ މީހުންގެ ޢަދަދު ވަނީ 10،000 އިން މައްޗަށް ގޮސްފައެވެ. 

އޮކްޓޯބަރު މަހުގެ 7 ވަނަ ދުވަހަށް ފަހު، ހިފާފައިވާ ހުޅަނގު އައްސޭރިން ވަނީ، 135 ކުޑަކުދިން ހިމެނޭހެން 549 މީހުން ޝަހީދުކޮށްލާފައެވެ. އަދި އިސްރާއީލުން ދިން ޙަމަލާތަކުގައި އެކި ވަރުގެ އަނިޔާތައް ލިބި ހުޅަނގު އައްސޭރިން ޒަޚަމްވި މީހުންގެ ޢަދަދު ވަނީ 5,200 އިން މައްޗަށް ގޮސްފައެވެ.