ދައުލަތުގެ ދަރަނިތައް ނެގުމާއި ބެލެހެއްޓުމާއި މެނޭޖު ކުރުމަށް ޑެޓް މެނޭޖްމެންޓް އޮފީހެއް ހުޅުވުން ލާޒިމު ކުރާ ދައުލަތުގެ ދަރަންޏާ ބެހޭ ބިލު މަޖިލީހަށް ހުށަހަޅައިފިއެވެ. 

ސަރުކާރުގެ ފަރާތުން މި ބިލު ހުށަހަޅުއްވާފައިވަނީ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. އެ ބިލުގެ ފުރަތަމަ ކިޔުން އިއްވާފައިވަނީ އިއްޔެ އޮތް މަޖިލީހުގެ ޖަލްސާގައެވެ. 

މަމްދޫހު ހުށަހެޅުއްވި ބިލުގައި ބުނެފައިވާ ގޮތުން، ބިލު ގާނޫނަކަށް ބަދަލުވެ އަމަލު ކުރަންފަށާތާ ހަމަސް ދުވަހުގެ ތެރޭގައި، ސަރުކާރުގެ ދަރަނި ބެލެހެއްޓުމަށްޓަކައި މިނިސްޓަރު ކުރަންޖެހޭ ކަންކަން ކުރުމަށާ، ދައުލަތުގެ ދަރަނި ބަލަހައްޓައި މެނޭޖްކުރުމަށް، ޑެޓް މެނޭޖްމެންޓް އޮފީހެއް، ފިނޭންސް މިނިސްޓްރީގެ ދަށުން ހިންގާ އިދާރާއެއްގެ ގޮތުގައި ގާއިމު ކުރަން ޖެހޭނެއެވެ.

އަދި، ޑެޓް މެނޭޖްމެންޓް އޮފިސް ވުޖޫދުވުމާއެކު ފިނޭންސް މިނިސްޓްރީގައި މިހާރު އޮތް ޑެޓް މެނޭޖްމެންޓް ޑިޕާޓްމެންޓުގެ އެންމެހާ ގާޏޫނީ ޒިންމާތަކާއި މުވައްޒަފުންނާއި މުދަލާއި ވަސީލަތްތަކާއި އިލްތިޒާމުތަކާއި އިމްތިޔާޒުތައް އަލަށް އުފެދުނު އިދާރާއަށް ބަދަލުވެގެން ދާނެކަމަށްވެސް ބިލުގައި ބުނެފައިވެ އެވެ.

އަދި ޑެޓް މެނޭޖްމެންޓް އޮފީހުގެ މަސްއޫލިއްޔަތުތައް އަދާކުރަން ޖެހޭނީ ޕްރޮފެޝަނަލް ކަމާއެކު ސިޔާސީ ނުފޫޒުން ނުވަތަ އެނޫންވެސް ފަރާތެއްގެ ނުފޫޒުން އެއްކިބާވެގެން ކަމަށް ބިލުގައި ބުނެފައިވާއިރު، ޑެޓް މެނޭޖްމެންޓް އޮފީހުގެ ކަންކަމާ ގުޅޭގޮތުން ރައްޔިތުންގެ މަޖިލީހަށް ޖަވާބުދާރީވާން ޖެހޭނީ ފިނޭންސް މިނިސްޓަރެވެ.

އަލަށް އުފައްދާ ޑެޓް މެނޭޖްމެންޓް އޮފީހުގެ މަސްއޫލިއްޔަތުތަކުގެ ތެރޭގައި، ދައުލަތުން ނަގާފައިވާ ދަރަންޏާއި، ދޫކޮށްފައިވާ ސޮވެރެން ގެރެންޓީތަޖާއި، ދައުލަތުގެ މާލިއްޔަތު ގާނޫނުގެ ދަށުން ސަރުކާރުން ދޫކޮށްފައުވާ ޓްރެޝަރީ ލޯނާއި، ސަބްސިޑިއަރީ ލޯނާއި ބެހޭ މައުލޫމާތު ރިކޯޑް ކުރުމާއި ބެލެހެއްޓުން ހިމެނެއެވެ.

އަދި ރާއްޖޭގެ ކްރެޑިޓް ރޭޓިން އެކަށީގެންވާ މިންގަނޑެއްގައި ހިފެހެއްޓުމަށް ކުރަންޖެހޭ މަސައްކަތް ކުރުމާއި ދައުލަތުގެ ދަރަނި ދައްކަންޖެހޭ މުއްދަތުތަކުގައި ދެއްކުމަށްޓަކައި ކުރަން ޖެހޭ ކަންކަން ކުރުމާއި ދައުލަތުގެ ދަރަނީގެ ޕޯޓްފޯލިއޯގައި ހިމެނޭ ހިރާސްތައް ކުޑަކުރުމަށްޓަކައި ކުރަންޖެހޭ ކަންކަން ކުރުންވެސް މި އޮފީހުގެ މަސްއޫލިއްޔަތު ތަކުގެ ތެރޭގައި ހިމެނެ އެވެ.