ރައީސް ޑރ. މުޙައްމަދު މުޢިއްޒު އޮގަސްޓް މަހުގެ ފުރަތަމަ ހަފްތާގައި ރަސްމީ ދަތުރުފުޅެއްގައި ލަންކާއަށް ވަޑައިގަންނަވާ ކަމަށް ލަންކާގެ މީޑިޔާއަކުން ހާމަކޮށްފިއެވެ.

ލަންކާގެ މީޑިޔާއިން ރިޕޯޓުކޮށްފައިވާ ގޮތުގައި، ރައީސް ޑރ.މުޢިއްޒުގެ މި ދަތުރުފުޅުގައި ދެ ގައުމުގެ ދެމެދުގައި ގުޅުން ބަދަހިކުރުމަށް މަޝްވަރާކުރައްވާނެއެވެ. އެގޮތުން ޚާއްޞަކޮށް ސަލާމަތީ، ވިޔަފާރި، ތަޢުލީމީ އަދި ޞިއްޙީ ދާއިރާތަކުގައި އެއްބާރުލުން އިތުރުކުރެއްވުމަށް މަސައްކަތް ކުރައްވާނެ ކަމަށްވެސް ބުނެފައިވެއެވެ.

މީގެ އިތުރުން،  ލަންކާގެ މީޑިޔާތަކުން ރިޕޮޓުކޮށްފައިވާ ގޮތުގައި، ޖިނާއީ މައްސަލަތަކުގައި އެއްބާރުލުން ދިނުމާ ގުޅޭ އެއްބަސްވުމެއްގައި ސޮއިކުރުމަށް ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސް ޑރ.މުޢިއްޒު ވަނީ މަޖިލީހަށް ސިޓީއެއް ފޮނުއްވާފައެވެ. މި އެއްބަސްވުމުގެ ސަބަބުން ދެ ގައުމުގެ ދެމެދުގައި އޮންނަ ގުޅުން އިތުރަށް ބަދަހިވެ، ޖިނާއީ މައްސަލަތަކުގައި އެއްބާރުލުން އިތުރުވާނެ ކަމަށް ބެލެވެއެވެ.

Advertisement

މީޑިއާ މަސްދަރުތަކުން ހާމަކުރި ގޮތުގައި، "ޓްރީޓީ ބިޓްވީން ދަ ގަވަރމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަރމަންޓް އޮފް ދަ ޑިމޮކްރެޓިކް ސޯޝަލިސްޓް ރިޕަބްލިކް އޮފް ސްރީ ލަންކާ އޮން މިއުޗުއަލް ލީގަލް އެސިސްޓަންސް އިން ކްރިމިނަލް މެޓާސް" ގެ ނަމުގައި މި އެއްބަސްވުން އެކުލަވާލުމަށް ދިވެހި ސަރުކާރުން ނިންމާފައިވަނީ ޖޫން 2 ވަނަ ދުވަހުއެވެ.

ރައީސްގެ ހުށަހެޅުއްވުމާ ގުޅިގެން، ރައްޔިތުންގެ މަޖިލީހުގެ ރައީސް ވަނީ މި މައްސަލަ އިތުރަށް ދިރާސާކުރުމަށް މަޖިލީހުގެ ޚާރިޖީ ގުޅުންތަކުގެ ކޮމިޓީއާ ހަވާލުކުރައްވާފައެވެ.