ދިވެހިންނަށް ސައިބާ ސެކިޔުރިޓީގައި ގައުމީ ލެވެލްގައި ޚިދުމަތް ކުރުމުގެ ފުރުސަތު ދިނުމަށް ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަޠީފް އެދިވަޑައިގެންފިއެވެ.

ރަައްޔިތުންގެ މަޖިލީހުގެ މިއަދުގެ ޖަލްސާގައި ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނަށް އިސްލާހު ގެނައުމުގެ ބިލު ސަރުކާރުގެ ފަރާތުން ހުށަހަޅުއްވާފައިވާއިރު، އެ ބިލަށް ބަހުސް ކުރައްވަމުން ޢިމްރާން ވަނީ ސައިބާ ސެކިޔުރިޓީއާއި ގުޅުން ހުރި ކަންކަމަކީ ދިވެހިރާއްޖޭގެ ސަލާމަތާއި ރައްކާތެރިކަމާއި ގުޅުންހުރި ކަންތައްތައް ކަން ފާހަގަކުރައްވާފައެވެ.

ކަންމިހެން ހުރި ނަމަވެސް ރާއްޖޭގައި ނިމިދޔަ ސަރުކާރުތަކުން އެފަދަ ކަންކަމުގައި ބަރޯސާވެފައިވަނީ ބޭރުގައުމު ތަކުގެ ފާމް ތަކުގެ އެހީއަށްކަން ފާހަގަކުރައް އިމްރާން ވަނީ، ދިވެހި ޒުވާނުންވެސް އެ ދާއިރާއިން ވަރަށް ބޮޑަށް ކުރިއަރާފައިވާކަން ފާހަގަކުރައްވާފައެވެ.

Advertisement

އެގޮތުން ބޭރު ގައުމުތަކުގެ އެކިއެކި ކުންފުނިތަކަށް އެ ދާއިރާއިން ދިވެހިން ޚިދުމަތްކޮށްދީފައިވާ ކަމަށާ، ރާއްޖޭގައި އެފަދަ ބިލެއް ފާސްވެގެން އަންނަ އިރު، އެފަދަ ޒުވާނުންނަށް އެ ދާއިރާއިން ރާއްޖެއަށް ޚިދުމަތް ކުރުމަށް ފުރުސަތުދޭންޖެހޭ ކަމަށް އޭނާ ވިދާޅުވިއެވެ.

“އެހެންވީމާ އަޅުގަނޑު އުއްމީދު ކުރަނީ މި ގާނޫނަށް އިސްލާހު ގެނެވިގެންދާއިރު ދިވެހިންނަށް ސައިބާ ސެކިޔުރިޓީގައި ގައުމީ ލެވެލްގައި ޚިދުމަތް ކުރުމުގެ ފުރުސަތު ލިބިގެން ދިޔުން” ޢިމްރާން ވިދާޅުވިއެވެ. 

މީގެ އިތުރުންވެސް އިމްރާން ވަނީ، އޮންލައިން ސިސްޓަމް ތަކުގެ ތެރެއިން އެކިއެކި ވައްކަން ކުރަމުންދާ ކަން ފާހަގަކުރައްވައި އެފަދަ ކަންކަން ހުއްޓުވުމަށް ސައިބާ ސެކިޔުރިޓީ އާއި ގުޅުންހުރި ބިލު ފާސްކުރުން މުހިންމުކަމަށް ވިދާޅުވެފައެޗެ.