ބަންގްލަދޭޝްގައި ދިމާވެފައިވާ ފެންބޮޑުވުމުގެ ހާދިސާއާ ގުޅިގެން، އިންޓަރނޭޝަނަލް އެއިޑް ކެމްޕޭން (އައިއޭސީ) ގެ ޓީމު އެ ޤައުމުގެ ގެއްލުން ލިބުނު އާއިލާތަކަށް ހުއްޓުމެއްނެތި އެހީތެރިކަން ފޯރުކޮށްދެމުންދާ ކަމަށް ބުނެފިއެވެ.

އައިއޭސީން މީސްމީޑިއާގައި ކުރި ޕޯސްޓެއްގައި ބުނެފައިވާ ގޮތުގައި، އެ ޓީމުން ވަނީ ރޭ މެންދަމު 3 އިން ފެށިގެން މުޅި ދުވަހު އެހީގެ ޕެކޭޖުތައް ހާލުގައި ޖެހިފައިވާ ފަރާތްތަކަށް ބަހައިދީފައެވެ.

އެގޮތުން އައިއޭސީގެ ޓީމުން އެހީ ފޯރުކޮށްދީފައިވަނީ ފެންބޮޑުވުމުގެ ސަބަބުން އެންމެ ބޮޑަށް ގެއްލުން ލިބިފައިވާ ކުމިލާ އަވަށުގައި ކަމަށްވެސް ބުނެފައުވެއެވެ.

މީގެ އިތުރުން ފެނީ އަދި ޚުލްނާ ޑިސްޓްރިކްޓްގައިވެސް އެހީ ފޯރުކޮށްދެވިފައިވާ ކަމަށާ، މި މަސައްކަތާ ގުޅޭ އިތުރު މަޢުލޫމާތު މީޑިއާއަށް ލިބެމުންދާ ވަރަކުން ހިއްސާކުރަމުން ގެންދާނެ ކަމަށް އައިއޭސީން ބުނެއެވެ. 

އައިއޭސީންވަނީ، މި ދަތި ދަނޑިވަޅުގައި ހާލުގައި ޖެހިފައިވާ ފަރާތްތަކަށް ރައްކާތެރިކަމާއި ކެތްތެރިކަން ދެއްވުމަށް ދުޢާކުރުމަށް އެދިފައެވެ.

މި އެހީތެރިކަމަކީ ބަންގްލަދޭޝްގައި ދިމާވެފައިވާ ފެންބޮޑުވުމުގެ ކާރިސާއާ ގުޅިގެން އައިއޭސީން ކުރިއަށްގެންދާ ކްރައިސިސް އިމަޖެންސީ ރިލީފްގެ ދަށުން ކުރިއަށް ގެންދާ މަސައްކަތެކެވެ.

ބަންގްލަދޭޝްގެ ޑިޒާސްޓަރ މެނޭޖްމަންޓް އެންޑް ރިލީފް މިނިސްޓްރީން ހާމަކޮށްފައިވާ ގޮތުގައި އެގައުމުގެ 11 ޑިސްޓްރިކްޓެއް ވަނީ ފެންބޮޑުވުމުގެ ހާދިސާއިން އަސަރުކޮށްފައެވެ. 

މި ހާދިސާގެ ސަބަބުން ގާތްގަނޑަކަށް 4.5 މިލިއަން މީހުންނަށް އަސަރުކޮށްފައިވާއިރު، 887,629 ގެއެއް އޮތީ ފެނު އަޑީގައެވެ. ގިނަ ވާރޭވެހުމާއި ފަރުބަދަމަތީ ސަރަހައްދުތަކުން ފެން ފޭބުމުގެ ސަބަބުން މި ޑިސްޓްރިކްޓުތަކުގެ ގިނަ ސަރަހައްދުތަކެއް އެއްކޮށް ބަންދުވެސް ވެގެން ދިޔައެވެ.