އަންނަ ނޮވެމްބަރުގައި ބޭއްވުމަށް ހަމަޖެހިފައިވާ އެމެރިކާގެ ރިޔާސީ އިންތިޚާބުގެ ކުރިން، އޭނާގެ ވާދަވެރިޔާ ކަމަލާ ހެރިސްއާއެކު އިތުރު ބަހުސެއްގައި ބައިވެރިނުވާނެކަމަށް ކުރީގެ ރައީސް ޑޮނަލްޑް ޓްރަމްޕް ބުނެފިއެވެ.

މިދިޔަ އަންގާރަ ދުވަހު އެމެރިކާގެ ރިޔާސީ ބަހުސް ދެ ކެންޑިޑޭޓުންގް މެދުގައި ބާއްވާފައިވާއިރު، ބަހުސާއި ގުޅޭގޮތުން ވާހަކަ ދައްކަމުން އިއްޔެ ޓްރަމްޕް ބުނީ، ފިލަޑެލްފިޔާގައި ބޭއްވުނު ފުރަތަމަ ބަހުސުގައި އޭނާއަށް ކާމިޔާބީ ލިބިފައިވާކަން "ސާފުކޮށް" ފެންނާތީ، ހެރިސް އިތުރު ބަހުސަކަށް އެދޭ ކަމަށެވެ.

އަދި ހެރިސް ހުންނެވި، ނާއިބު ރައީސާ ކަމުގެ މަޤާމުގެ މަސްއޫލިއްޔަތު ތަކަށް "ފޯކަސް" ކުރަންޖެހޭ ކަމަށްވެސް ޓްރަމްޕް ބުނެފައިވެއެވެ.

ޓްރަމްޕް މިހެން ބުނެފައިވާއިރު، އަންގާރަ ދުވަހުގެ ބަހުސަށްފަހު ނެގުނު ޕޯލް ތަކުން ދައްކާގޮތުގައި، ވޯޓު ދޭ މީހުންނަށް ޤަބޫލުކުރެވުނީ ހެރިސް އޭނާގެ ވާދަވެރިޔާއަށްވުރެ ރަނގަޅަށް ބަހުސްގައި ބައިވެރިވި ކަމަށެވެ.

މި ބަޔާނަށް ޖަވާބުދެމުން، ނޯތު ކެރޮލައިނާގައި ބޭއްވުނު ކެމްޕޭން ރެލީއެއްގައި ހެރިސް ބުނީ އިތުރު ބަހުސެއް ބޭއްވުމަކީ ވޯޓުދޭ ފަރާތްތަކަށް އެ ދެ ކެންޑިޑޭޓުން "ކޮށްދޭންޖެހޭ" ކަމެއް ކަމަށެވެ.

އޭބީސީ ނިއުސްއިން ގެނެސްދިން 90 މިނެޓުގެ ބަހުސަށްފަހު ދެ ކެންޑިޑޭޓުންވެސް ވަނީ އެ ބަހުސް ކާމިޔާބުކުރިި ކަމަށް ބުނެފައެވެ. މި ބަހުސްގައި ހެރިސް ވަނީ ޓްރަމްޕްގެ ރެލީތަކުގެ ޖަމާއަތުގެ ބޮޑުމިނާއި 2021 ވަނަ އަހަރުގެ ޖެނުއަރީ 6 ވަނަ ދުވަހު ޔޫއެސް ކެޕިޓަލްގައި ހިނގި ހަމަނުޖެހުމުގައި ޓްރަމްޕްގެ ޢަމަލުތަކާ ބެހޭގޮތުން ވާހަކަދައްކައި ޓްރަމްޕަށް ބަހުގެ ހަމަލާތަކެއް އަމާޒުކޮށްފައެވެ.

އޭގެ ސަބަބުން، ޓްރަމްޕާއި އޭނާގެ ތާއީދުކުރާ ފަރާތްތަކުން ވަނީ ބަހުސް މޮޑަރޭޓްކުރި އޭބީސީގެ ދެ ނޫސްވެރިން ހެރިސްއަށް ފަަހިވާގޮތަށް ހަމަހަމަކަން ގެއްލޭ ގޮތަށް ޢަމަލުކުރި ކަމަށް ތުހުމަތުކޮށްފައެވެ.

އިންތިޚާބަށް އަދި ދެ މަސް ދުވަސް ބާކީ އޮތް އިރު، މިހާތަނަށް ނެގިފައިވާ ޕޯލްތަކުން ދައްކާ ގޮތުގައި ދެ ކެންޑިޑޭޓުންގެ މެދުގައި ވަރަށް ބޮޑު ވާދައެއް އެބައޮތެވެ.